යුද්ධයේ දී සිදුවු අපරාධ සම්බන්ධව ශ්‍රී ලංකා යුද හමුදාවට නැගෙන චෝදනා වලට පිළිතුරු දීමට සුදානම් බව නව ප්‍රජාතන්ත්‍රවාදි පෙරමුණේ අපේක්ෂකයා ප්‍රකාශ කර තිබේ.
එහිදී “රණවිරුවන් පරිත්‍යාග නොකරන” බවට සහතික වූ සජිත් ප්‍රේමදාස පවසන්නේ ඒ ප්‍රශ්න මගහරින ගෝඨාභය රාජපක්ෂ යුද සමයේ හමුදාපතිට ඒ සම්බන්ධයෙන් “බෝලය පාස් කළ” බවයි.
යුද්ධයේ අවසාන භාගයේ භාරවූවන්ට අත්වූ ඉරණම පිළිබඳව “ද හින්දු” පුවත් පතේ මීරා ශ්‍රීනිවාසන් කොළඹ පැවති මාධ්‍ය හමුවකදී විමසූ විට හිටපු ආරක්ෂක ලේකම් ප්‍රකාශ කළේ “මම හමුදාපති නෙවෙයි” යනුවෙනි.
තම සහෝදර හිටපු ජනාධිපති මහින්ද රාජපක්ෂ ද යුද්ධයට නායකත්වය නුදුන් බව ඔහු වැඩිදුර ප්‍රශ්න කිරීම් හමුවේ කියා සිටියේය.
“මේ රටේ රණවිරුවා ආරක්ෂා කරන පුද්ගලයෙක් නම්, කිසිම දවසක කියන්නේ නෑ, අපෝ මම නෙමෙයි මේකට වග කියන්නේ, අපෝ අයියා නෙමෙයි මේකට වග කියන්නේ, මේකට වග කියන්නේ හමුදාපති කියලා, එහෙම බෝල පාස් කරන්නේ නෑ මිත්‍රවරුණි,” යි සජිත් ප්‍රේමදාස දොඩන්ගස්ලන්ද හිරිපිටියේ පැවති මැතිවරණ ප්‍රචාරක රැළියකදී ප්‍රකාශ කළේය.
එම ප්‍රශ්න වලට පිළිතුරු දුන්නේ නම්, සිය ප්‍රතිවාදී අපේක්ෂකයාට මෙන්ම හිටපු ජනාධිපතිවරයාටත් පුද්ගලිකව හානි සිදුවන බව හංසයා ලකුණින් ජනාධිපතිවරණයට තරඟ කරන සජිත් ප්‍රේමදාස වැඩි දුරටත් කියා සිටියේය.
රජය විසින් පිහිටුවන ලද අතුරුදහන් වුවන් පිළිබඳ කාර්යාලය පවසන පරිදි යුද්ධය අවසනයේ අතුරුදහන්වු වැඩි පිරිසක් හමුදාවට භාර වුවන්ය.
Facebook Comments
