ශ්‍රී ලංකා පොදුජන පෙරමුණේ ජනාධිපති ධුර අපේක්ෂකයාගේ දැන්වීමක් සඳහා වත්මන් යුද හමුදාපතිවරයාගේ රුව සහ ප්‍රකාශයක් යොදා ගැනීම සම්බන්ධව කරුණු පැහැදිලි කරන ලෙස ජනාධිපති ලේකම්වරයාට හා ආරක්ෂක අමාත්‍යංශ ලේකම්වරයාට දැන්වු මැතිවරණ කොමසාරිස් ප්‍රකාශ කර සිටී.
එම ක්‍රියාව වැරැද්දක් බව ගෝඨාභය රාජපක්ෂගේ ජන්ද නියෝජිතයාට හා පක්ෂ ලේකම්වරයාට ද දන්වා යැවු බව පවසන මැතිවරණ කොමසාරිස් මහින්ද දේශප්‍රිය එවැනි දෙයක් සිදුවීම සම්බන්ධයෙන් කනස්සල්ල පළ කළේය.
“අපිට ඒ පැමිණිල්ල ඉරිදාම ලැබුණා. අපි බෙහෙවින් කණගාටු වෙනවා ඒ දැන්වීම ගැන. ඒ වගේ ඒක වැරදි කියන එක අපි අදාළ අපේක්ෂකයාගේ ජන්ද නියෝජිතයාට හා පක්ෂ ලේකම්වරයාටත් ජන්දගේ දේශපාලඥයාටත් දන්වලා තියෙනවා. ඒ එක්කම ජනාධිපති ලේකම්වරයාටත් හා ආරක්ෂක අමාත්‍යංශ ලේකම්වරයාටත් අපි දන්වලා තියෙනවා මේ ගැන කරුණු පැහැදිලි කිරීමක් එවන්න කියලා.”
හිටපු හමුදාපතිවරුන් කිහිප දෙනකුගේ හා වත්මන් යුද හමුදාපති ශවේන්ද්‍ර සිල්වා නිල ඇඳුම සහිත ඡායාරූප සමඟ ඔවුන් කරන ලද ප්‍රකාශ කිහිපයක් උපුටා දක්විමින් ගෝඨාභය රාජපක්ෂගේ මැතිවරණ දැන්වීමක් සති අන්ත පුවත්පත් වල පළ කර තිබුනි.
එම පුවත්පත් දැන්වීමක් පළ කිරීම මැතිවරණ නීති බරපතල ලෙස උල්ලංඝනය කිරීමක් බව පවසමින් නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස වෙනුවෙන් අජිත් පි පෙරේරා අමාත්‍යවරයා විසින් පසුගිය 14 වැනිදා මැතිවරණ කොමිසමට පැමිණිල්ලක් කරන ලදි.
වර්තමාන යුද හමුදාපතිවරයාගේ මෙන්ම විශ්‍රාමික හමුදා නිලධාරීන්ගේ නිල ඇඳුම් සහිත ඡායාරූප දේශපාලන පක්ෂයක ප්‍රවර්ධනය සඳහා යොදා ගැනීම නුසුදුසු ක්‍රියාවක් බව මැතිවරණ කොමසාරිස් මහින්ද දේශප්‍රිය 16 බදාද පැවති මාධ්‍ය හමුවක දී අවධාරණය කළේය.
“පැරණි ප්‍රකාශයක් වෙන්න පුළුවන්. නමුත් වත්මන් යුද හමුදාපතිවරයාගෙ නිල නාමය සහ තනතුර යොදාගෙන ඒක භාවිතා කිරීම ඉතාම කණගාටුදායක කරුණක්. ඒ කරුණ කිසිදු යහපත් දේශපාලන සංස්කෘතියකට අනුගත වෙන්නේ නැහැ” යැයි හෙතෙහ පැවසීය.
මෙම දැන්වීම සම්බන්ධයෙන් යුද හමුදාපති ලුතිනන් ජනරාල් ශවේන්ද්‍ර සිල්වා ප්‍රකාශයක් නිකුත් කරනු ඇති බවට විශ්වාසය පළ කළ මැතිවරණ කොමසාරිස්වරයා එසේ සිදු නොවුන හොත් එම දැන්වීම ඔහුගේ ද අනුදැනුම මත සිදුවු බවට සැක කිරීමට සිදු වන බව ද කියා සිටියේය.
කිසිදු පක්ෂයකට යුද්ධය අයිති නොවන බව අවධාරණය කළ මැතිවරණ කොමසාරිස් මහින්ද දේශප්‍රිය “කිසිදු පක්ෂයකට නැති අය මේ යුද්ධය වෙනුවෙන් සටන් කරලා තියෙනවා. යුද්ධයේදී ලැබූ ජයග්‍රහණ රටේ එකක් මිසක් පෞද්ගලිකව පක්ෂයක එකක් නෙවෙයි.” වැඩි දුරටත් පෙන්වා දුන්නේය.
Facebook Comments
