පින්නවල අලි අනාථාගාරයේ සිටින අලි ඇතුන්ගෙන් යම් ප්‍රමාණයක් සුදුසුකම් ලත් පුද්ගලයන්ට හෝ ජුජා ස්ථාවලට ලබා දීමට කැබිනට් මණ්ඩලය තීන්දු කර ඇත.
ඒ අනුව පින්නවල අලි අනාථාගාරයේ හීලෑ අලිඇතුන්ගෙන් කොටසක් නිශ්චිත කොන්දේසිවලට යටත්ව අමාත්‍ය මණ්ඩලය විසින් පත් කරනු ලබන කමිටුවක් මඟින් තෝරා ගනු ලබන සුදුසුකම්ලත් පුද්ගලයන් සහ ආයතන වෙත ලබා දීමටත් ඒ සඳහා වන විධිවිධාන ඇතුළත් නියෝග නිකුත් කිරීමටත් තිරසර සංවර්ධන හා වනජීවී අමාත්‍ය ගාමිණි ජයවික්‍රම පෙරේරා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
අක්කර 30ක් වූ මුළු භූමි ප්‍රමාණයක් සහිත පින්නවල අලි අනාථාගාරයේ මේවනවිට අලින් 88දෙනෙකු රඳවා ඇති අතර එම සතුන් නඩත්තු කිරීම දුෂ්කර කාර්යයක් වී ඇති බැවින් රජය මෙම පියවර ගෙන ඇති බවටයි වාර්තා වන්නේ.
ජාතික සත්ත්වෝද්‍යාන දෙපාර්තමේන්තුව යටතේ කළමනාකරණය කරනු ලබන අලිඇතුන් සංචිතයක් මඟින් පෙරහැර සඳහා හීලා අලිඇතුන් ලබාදීමත් හීලෑ අලිඇතුන්ගේ ලියාපදිංචිය විධිමත් කිරීම හා ආරක්ෂාව සැලසීම සඳහා නියෝග නිකුත් කිරීමත් සඳහා වූ නිර්දේශයන්ට අනුමැතිය ලැබී තිබේ.
Facebook Comments
