සංහිඳියාව යථාර්ථයක් බවට පත්කර ගත හැක්කේ තමන්ගේ මෙන්ම අන් අයගේ ද අයිතිවාසිකම් සහ වරප‍්‍රසාදවලට ගරු කිරීම තුළින් බව ජනාධිපතිවරයා පවසා සිටී.
රට තුළ ස්ථීරසාර සාමයක් ඇතිකර ගනිමින් සියලු ජාතින් අතර සහෝදරත්වය සහ සංහිඳියාව ශක්තිමත් වූ එකම රටක් ගොඩනැගීමට අප කැප විය යුතු බවට ජනපති මෛත්‍රීපාල සිරිසේන කියා සිටියේ ඊයේ (27) ශ්‍රී ලංකා ඉස්ලාමීය මධ්‍යස්ථානය විසින් සංවිධානය කරනු ලැබූ ජාත්‍යන්තර සමුළුවේ සමාරම්භක උත්සවයට සහභාගි වෙමිනි.
අප සෑම කෙනෙක්ම එකම රටක එකම ශ්‍රී ලාංකිකයින් ලෙස ජීවත්වීමට අධිෂ්ඨාන කරගන්නේ නම් අප අපේක්ෂා කරන සාමකාමී සමාජය ගොඩනැගීම අපහසු නොවන බවටයි ජනාධිපතිවරයා මෙහිදි අවධාරණය කළේ.
අද ලෝකයේ තිබෙන ප‍්‍රශ්න හා ගැටලු සඳහා විසඳුම් සෙවීමේදී ආධ්‍යාත්මික නායකයින් විසින් කරනු ලැබූ මඟපෙන්වීම් ඉතා වැදගත් බව පෙන්වා දුන් ජනාධිපතිවරයා මිනිසා බලය සහ ධනය සඳහා සටන් කිරීමේ අවසන් ප‍්‍රතිඵලය වන්නේ මිනිසෙක් විසින් තවත් මිනිසෙක් විනාශ කිරීම බව ද පැවසීය.
ලෝකයේ යුද ගැටුම් වැළැක්වීමට අප සාකච්ඡා කළ යුත්තේ යුද්ධය කරන පිරිස් සමග නොව යුද්ධයට අවශ්‍ය අවි ආයුධ නිෂ්පාදනය කරන්නන් සමග බවට විශ්වාස පළ කල ජනපති මෛත්‍රීපාල තමන්ගේ රට තුළ අවි ආයුධ නිෂ්පාදනය වැළැක්වීමට සෑම රාජ්‍යයකටම හැකි නම් ලෝක සාමය ඇති කිරීම සඳහා ගනු ලබන වැදගත්ම පියවර වන්නේ එය බවයි කියා සිටියේ.
Facebook Comments
