කුඩා ව්‍යාපාරිකයාට නිදහස දෙන්න ජනපති සුදානම්

0

රජය අනවශ්‍ය ලෙස මැදිහත්වීමෙන් කුඩා පරිමාණ ව්‍යාපාරවල දියුණුවට බාධා විය හැකි බවට විශ්වසය පළ කරන ජනාධිපතිවරයා අවශ්‍ය වන්නේ ඔවුනට පහසුකම් සහ නිපුණතා සංවර්ධනයට සහාය වීම් බව පවසයි.

රූපලාවන්‍ය හා කේශාලංකරණ ශිල්පීන්ගේ ගැටලු සාකච්ඡා කිරීම සඳහා 25 බ්‍රහස්පතින්දා ජනාධිපති කාර්යාලයේ පැවති සාකච්ඡාවේදී ජනාධිපති ගෝඨාභය රාජපක්ෂ මේ බව පෙන්වා දී ඇත.

රූපලාවන්‍ය හා කේෂාලංකරණ ක්ෂේත්‍රයේ නිරතවන්නන්ගේ වෘත්තීයභාවය වැඩිදියුණු කිරීම, මූල්‍ය පහසුකම් සැලසීම හා වෙළෙඳ ප්‍රවර්ධන හැකියාව ලබාදීම රජයේ වගකීම බවයි ජනපති පවසා ඇත්තේ.

බොහෝ දෙනාගේ ඉල්ලීම මත ව්‍යවසාස සංවර්ධන අධිකාරියේ සහාය රූපලාවන්‍ය ක්ෂේත්‍රයට ලබාදීමට කැමැත්ත පළ කර ඇති ජනාධිපතිවරයා එය එම පිරිස බැඳීම් වලට ලක් කිරීමට නොව අවශ්‍යතා ඉටුකර ගැනීමට දායකවීම සඳහා පමණක් බවයි අවධාරණය කරන්නේ.

සුළු, මධ්‍ය හා මහා පරිමාණ රූපලාවන්‍ය මධ්‍යස්ථාන අනූදහසක් රට පුරා ඇති අතර, ලක්ෂ හතර හමාරකට අධික පිරිසක් සේවයේ නිරත වෙති.

රූපලාවන්‍ය වෘත්තියක් ලෙස ගුණාත්මකව පවත්වාගෙන යාමට අවශ්‍ය පුහුණුව ලබාදීම පිළිබඳව දීර්ඝ වශයෙන් මෙහෙදී සාකච්ඡාවට ලක්ව ඇති අතර ජාතික වෘත්තීය සුදුසුකම් පාඨමාලාවේ (NVQ) 05,06 සහ 07 අදියර සිංහල, දෙමළ සහ ඉංග්‍රීසි භාෂා තුනෙන්ම පැවැත්වීමට අවශ්‍ය කටයුතු සැලසුම් කරන ලෙස ද ජනපති උපදෙස් දුන් බව ජනාධිපති මාධ්‍ය ඒකකය නිවේදනය කරයි.

ක්ෂේත්‍රයේ ඇති ගැටලු පිළිබඳව අවබෝධකරගෙන සිටීම පිළිබඳව ජනාධිපති ගෝඨාභය රාජපක්ෂ රූපලාවන්‍ය ශිල්පීන්ගේ ප්‍රශංසාව ලක්ව ඇත.

අමාත්‍ය දිනේෂ් ගුණවර්ධන, ජනාධිපති ලේකම් ආචාර්ය පී.බී. ජයසුන්දර ඇතුළු අමාත්‍යාංශ ලේකම්වරු, ව්‍යවසාය සංවර්ධන අධිකාරියේ සභාපති අනුෂ්ක ගුණසිංහ සහ රූපලාවන්‍ය හා කේශාලංකරණ ක්ෂේත්‍රයේ ප්‍රවීනයෝ පිරිසක් මීට එක්ව සිටියහ.

Facebook Comments

wedding people