ගුරු මර්දනයට ත්‍රස්ත අනපනත් ගෙන ඒමේ සැලසුමක් ගැන අනතුරු ඇඟවීම්

0

වැඩ කරන ජනතාවගේ අයිතීන් දිනා දීම වෙනුවෙන් සටන් වදින කම්කරු නායකයන්ට ත්‍රස්ත ලේබල් අලවා ඔවුන්ගේ ජීවිත අනතුරේ හෙලිමට ආණ්ඩුව ගන්නා උත්සාහය වෘත්තිය සමිති නායකයන් විසින් හෙලා දැක තිබේ.

දින විස්සක් ද ඉක්මවා යන සාර්ථක වැඩ වර්ජනයක් දියත් කර ඇති ගුරු නායකයන් ඉලක්ක කොටගෙන රජයත්, ඊට හිතවාදී සංවිධාන සහ ජනමාධ්‍යත් ගෙනයන ජාතිවාදී ප්‍රහාර අනිකුත් වෘත්තීය සමිතිවල කෝපයට හේතුවී තිබේ.

රජයේ මෑතම ප්‍රහාරය වුනේ “බෙදුම්වාදී දෙමළ කොටින්ට එරෙහිව 2009 දී ශ්‍රී ලංකා හමුදාවේ ජයග්‍රහණය කඩාකප්පල් කිරීමට වෑයම් කළ බලවේග ඉන් වසර 12 කට පසුව අද පවතින වෘත්තීය සමිති ව්‍යාපාර වල විරෝධතා පිටුපස කුමන්ත්‍රණයක යෙදී සිටින බව” ශ්‍රී ලංකා පොදුජන පෙරමුණේ මහ ලේකම් පාර්ලිමේන්තු මන්ත්‍රී නීතිඥ සාගර කාරියවසම් විසින් ප්‍රකාශ කරනු ලැබීමයි.

ලක්ෂ ගණනක ගුරුවරුන්ගේ අයිතීන් දිනා දීම වෙනුවෙන් අඛණ්ඩ අරගලයක යෙදී සිටින ගුරු වෘත්තිය සමිති නායකයන්ට කොටි ලේබල් ඇලවීම තුලින් පෙන්නුම් කරන්නේ ත්‍රස්තවාදය වැලැක්වීමේ පනත යොදා ගනිමින් ඔවුන් මර්දනය කිරීමේ උත්සාහයක් බවයි පුහුණු විද්‍යාපීඨ හා උපාධිධාරී ගුරු සංවිධානය පවසන්නේ.

“සල්ලි නැති කතාව පිලිගන්න තරම් ගුරුවරු මෝඩ නැහැ නේ. ඒ නිසා සටන දිගටම යනවා. ඒ නිසා දැන් ආණ්ඩු පක්ෂයේ ප්‍රධාන ලේකම් ඉස්සරහට දාල පෙන්නන්න හදනව කොටි පරාජය කරන්න විරුද්ධව කුමන්ත්‍රණ කරපු අයගේම නූතන කුමන්ත්‍රණය කියල මේ ගුරු සටන. ඒ කියන්නේ අපි ඔක්කොම ගුරු සංගම්, ඒවයේ නායකයෝ PTA පාවිච්චි කරල මර්ධනය කරන්නය කියන එකනේ. මේ විදියට සාකච්ඡා අතහැරල මර්ධනය දියත් කරන්න ආණ්ඩුවට බලපෑම් කරමින් විරුද්ධ පාර්ශව කරුවන්ට චෝදනා එල්ල කිරීම මහ නින්දිත වැඩක්,” යි පුහුණු විද්‍යාපීඨ හා උපාධිධාරී ගුරු සංවිධානයේ ලේකම් ශාන් දිල්රුක්ෂිආරච්චි මාධ්‍යවේදීන් සමග පවසා සිටියාය.

“යුද ජයග්‍රහණය වැලැක්වීමට වැර දැරූ එම කණ්ඩායම ම අද රට තුල විරෝධතා හා වැඩවර්ජන රැල්ලක් ඇති කිරීමට ඉදිරිපත්ව සිටිනවා” ආණ්ඩු පක්ෂයේ මහ ලේකම්වරයා පවසා තිබුනි.

ආණ්ඩුවේ අගමැති, අධ්‍යාපන ඇමැති, අමාත්‍යාංශ ලේකම් මෙන්ම සෑම ගුරු-විදුහල්පති සංගම් වල යෝජනා ප්‍රතිපත්තියක් හැටියට පිලිගෙන ඒවා ඉටු කිරීමට මේ මොහොතේ ඇති එකම නොහැකියාව මුදල් හිඟකම යැයි කියන අතරේ ආණ්ඩු පක්ෂ නායකයන් මෙවැනි තර්ජනාත්මක ප්‍රකාශ නිකුත් කිරීම විශ්මය දනවන්නක් බවක් ශාන් දිල්රුක්ෂිආරච්චි වැඩි දුරටත් ප්‍රකාශ කළේ.

ආණ්ඩු පක්ෂයේ මහ ලේකම්වරයාගේ ප්‍රකාශයට ප්‍රතිචාර දක්වමින් වෛද්‍ය රසායනාගාර විද්‍යාඥ වෘත්තියවේදීන්ගේ විද්වත් ආයතනයේ සභාපති සදහන් කළේ යුක්තිසහගත අයිතිවාසිකම් ලබා ගැනීම වෙනුවෙන් සාර්ථක ලෙස ඉදිරියට යන සාර්ථක වෘත්තීය සමිති ක්‍රියාමාර්ග දියත් වන සෑම මොහොතකම එම ක්‍රියාමාර්ග මෙහෙයවන නායකයන්ට මඩ ගැසීම්, ඔවුන් දඬුකදේ ගැසීම් මෙන්ම මර්දනය කිරීම හරහා ඔවුන් නතර කිරීමේ වෑයම දීර්ඝ කාලයක සිට ක්‍රියාත්මක වන බවයි.

“ඔහොම මර්දනයන් කරල ලෝකයේ හරි ලංකාවේ හරි කිසිම ආණ්ඩුවක් කවදාවත් සාරවත් විසදුමක් ලබල නෑ. ආයේමත් මේ ආණ්ඩු පක්ෂයේ ලේකම්ට බෙදුම්වාදී යුද්ධය ගැන කථාකරන්න වෙලා තියෙන එකෙන් ම ඒක ඔප්පු කරනවානේ” රවී කුමුදේශ් වෘත්තියවේදියා සදහන් කළේය.

ලක්ෂ තුනක් පමණ වන සමස්ත ගුරු විදුහල්පති ඒකාබද්ධ සටනක් කුමන්ත්‍රණයක් ලෙස හැඳින්වීම ම සාගර කාරියවසම් ගේ සංවේදන දුබලතාවයක් මතුකරන්නක් බව පෙන්වා දෙන රවී කුමුදේශ් අවධාරණය කරන්නේ ගතවූ සති කීපය ඇතුලත දී එම ලේකම්වරයා මේ දුබලතාවය පෙන්වූ පළමු අවස්ථාව මෙය නොවන බවයි.

“අයිතීන් වෙනුවෙන් සටනක් කරන අයට, විශේෂයෙන් ඒ සටනට නායකත්වය දෙන අයට මඩ ගැසීම්, තර්ජන ගර්ජන එල්ල වෙනවා. මේ සටන් වල විශේෂ ඉලක්ක නැහැනේ. ඉතිං හැම ආණ්ඩුවක් එක්කම වෘත්තීය සමිති තමන්ගේ අයිතිවාසිකම් ගැන සටන් කරනවානේ. මොකද්ද මේ සටනේ විශේෂය කොටි චෝදනා එල්ල කරන්න,” යැයි ප්‍රශ්න කරන රවී කුමුදේශ් ඊට හේතු ලෙස පෙන්වා දෙන්නේ “විශේෂය තමයි මේ සටන කල්ලියකට කණ්ඩායමකට සීමා නොවී මුළු ගුරු සංහතියම පාරට බට සටනක් වීම” බවයි.

ඔහු වැඩි දුරටත් අවධාරණය කළේ ශක්තිමත් බහුජන සටන් ක්‍රියාමාර්ගයක් හුදු ආණ්ඩුවකට පමණක් නොව එයට අනුබද්ධ තවත් විවිද පාර්ශව කරුවන්ට එනම් කොන්ත්‍රාත්කරුවන්, ව්‍යාපාරයකයන් ආදී මෙකී නොකී හැමටම අභිියෝගයක් වන ප්‍රජාතන්ත්‍රීය සටනක් වන බවයි.

“මේ සැමට සම්බන්ධ මඩ ප්‍රචාරකයන්, තර්ජනාත්මක සමාජ මාධ්‍ය හසුරුවන්නන්, වගේම සංවිධානාත්මකව දුරකථන මගින් පුද්ගලිකව ශාරීරික තර්ජන කරන්නන් ඉන්නවා. ඔවුන්ට විශාල වශයෙන් ගෙවීම් කරනවානේ. ඒකයි. දැන් මම අහන්නේ ඊට වඩා මේ රටට ලාබ නැද්ද මේ වැඩකරන ජනතාවගේ යුක්ති සහගත අයිතීන් ලබා දීල යුක්තිසහගත එකඟත්වයක් ඇති කිරීම,” යි රවි කුමුදේශ් තව දුරටත් ප්‍රශ්න කළේය.

රට තුළ වැඩවර්ජන රැල්ලක් ඇති කිරීමට ඉදිරිපත්ව සිටින්නේ යුද ජයග්‍රහණය වැලැක්වීමට වැර දැරූ එම කණ්ඩායම් බවට සාගර කාරියවසම් මන්ත්‍රීවරයා එල්ල කරන චෝදනාවට ප්‍රතිචාර දක්වමින් ශ්‍රී ලංකා ප්‍රගති ගුරු සංගමයේ ප්‍රධාන ලේකම් මයුර සේනානායක කියා සිටියේ තමන් පෙනී සිටින්නේ ජන ඝාතන යුද්ධ වලට විරුද්ධව මිනිස්සුන්ගේ ජීවිතත් ඔවුන්ගේ ජීවිකාවත් ආරක්ෂා කර දීම වෙනුවෙන් බවයි.

“ඉතිං අපි ජන ඝාතන යුද්ධ වලට විරුද්ධව මිනිස්සුන්ගේ ජීවිතත් ඔවුන් හරිහම්බකරගත්ත දේත් ආරක්ෂා කරල දෙන්න තමා පෙනී සිටින්නේ. එහෙම කරන එක වැරැද්දක් නම්, අපි ඔය යුද්ධ වලට විරුද්ධව වැඩ කළා කියන්න ඉස්සෙල්ලා බුදුන් ජේසුස් කොටින්ට සහාය දෙන කුමන්ත්‍රණකාරයන් ය කියල ඒ ආගම් තහනම් කරල එපායැ වැඩ පටන් ගන්න. එහෙම නැතිව අද ගුරු-විදුහල්පති අයිතීන් වෙනුවෙන් ඉදිරිපත් වන අයයි මේ ශාස්තෘන්ගේ දහම පිලි ගත් අය හැටියට අවුරුදු 12 කට කලින් යුද්දෙකට විරුද්ධ වෙලා බෙදුම්වාදීන්ට විරුද්ධ යුද්ධයට බාධා කළ අයයි දෙගොල්ලොම එකය කියල මර්දනය කරන්න යෝජනා කරන එක නේ ඇත්ත කුමන්ත්‍රණය.”

“ඉතිං කුමන්ත්‍රණය තියෙන්නේ ඔබගේ පැත්තේ බව ඔබගේ ම ප්‍රකාශයෙන් පෙනෙන බවයි අපිට සාගර උන්නැහේට කියන්න තියෙන්නේ. ඔබලාගේ ආණ්ඩුව කොටි පරාජය කළා කියල ඕනෑම හත්ඉලව්වක් කරන්න ඇරල ඉන්න කියල ද අපිට කියන්නේ” ඔහු වැඩි දුරටත් මාධ්‍යවේදීන් සමග පවසා තිබේ.

ගුරු සංගම් නායකයන්ට හිරිහැර

අධ්‍යාපනය හමුදාකරණයට එරෙහිව හා අධ්‍යාපන ගැටළු සහ ගුරු – විදුහල්පති වැටුප් විෂමතාවය නොවිසදීමට එරෙහිව සටන් වැදීම නිසා වසංගත අනපනත් අයුතු ලෙස යොදා ගනිමින් ජ්‍යෙෂ්ඨ වෘත්තීය සමිති නායක ජෝසප් ස්ටාලින් ඇතුළු දකුණේ ක්‍රියාධාරීන් දින නමයක කාලයක් බලහත්කාරයෙන් උතුරේ ගුවන් හමුදා කදවුරක රඳවා තබා ගැනීමට ආණ්ඩුව කටයුතු කළේය.

ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ ජුලි 30 දා මාධ්‍ය හමුවක් පවත්වමින් හෙලි කර තිබුනේ බල්ලෙක් සේ මහ මග මරා දමන බවට තර්ජනය කරමින් පසුගිය 28 දා සවස 5.25ට පමණ කොරියාවේ සිට තමන්ට දුරකථන ඇමතුමක් ලැබුනු බවයි.

වසර 24ක් තිස්සේ ගුරුවරුන් සහ විදුහල්පතිවරුන් මුහුණ දෙන වැටුප් විෂමතාව පමණක් නොව සිසුන්ගෙන් සියයට 60ක් ඔන්ලයින් අධ්‍යාපනයෙන් ඉවත් වී යෑම ඇතුළු ගැටලු රාශියක් මුල් කරගෙන දියත්කර ඇති වෘත්තීය අරගලයට නායකත්වය දීම නිසා ආණ්ඩුව තමන්ව බිය වැද්දීමට මෙවැනි බාල උපක්‍රම ක්‍රියාත්මක කරවන බව සදහන් කළ ඔහු වැඩි දුරටත් අවධාරණය කලේ ආණ්ඩුව දැන් තමන්ට සහ ජෝසප් ස්ටාලින්ට අභූත චෝදනා එල්ල කරමින් ඉතාම බාල මඩ ප්‍රහාර එල්ලකරන බවයි.

Facebook Comments