පළමු රාජපක්‍ෂ සමයේ මරා දැමු දෙමළ මාධ්‍යවේදියෙක් යාපනේදී සැමරේ

0

දාහතර වසරකට පෙර නාඳුනන තුවක්කුකරුවන් විසින් යාපනේදී වෙඩි තබා මරා දැමු මාධ්‍යවේදී සහදේවන් නිලක්ෂන් සමරුවක් යාපන මාධ්‍ය සමාජය විසින් සංවිධානය කර තිබේ.

පළමු රාජපක්ෂ පාලන සමයේ 2007 අගෝස්තු 01වැනිදා උදෑසන 5,30 ට පමණ යතුරු පැදියකින් පැමිණි නාඳුනන තුවක්කුකරුවන් විසින් යාපනයේ බටහිර කොකුවිල් හි දුම්රිය පොළ පාරේ ඔහුගේ නිවස ඉදිරිපිට දී වෙඩිතබා ඝාතනය කරන ලදී.

නිලක්ෂන් යාපනය විශ්ව විද්‍යාලයේ මාධ්‍ය සමීක්ෂණ හා පුහුණු ආයතනයේ ජනමාධ්‍ය විෂය හැදෑරීමෙහි නිරතව සිටි අර්ධ කාලීන මාධ්‍යවේදියෙක් වූ අතර යාපනය දිස්ත්‍රික් ශිෂ්‍ය බලමණ්ඩලය විසින් පළකරන ලද ජනප්‍රිය ශිෂ්‍ය ප්‍රකාශනයක් වූ ‘සන්ගම්’ සඟරාවේ සංස්කාරක ද විය.

යාපන මාධ්‍ය සමාජය සංවිධානය කළ මෙම සති අන්ත සමරුව නිලක්ෂන්ගේ මව, පියා, සහෝදරයා ඇතුළු පවුලේ ඥාතීන්ගේ හා යාපනයේ මාධ්‍යවේදී වේදිනියන්ගේ සහභාගිත්වයෙන් පැවැත්විණි.

රැස්ව සිටි පිරිස මෙහිදී සහදේවන් නිලක්ෂන් ගේ සේයාරුවකට මල් දම් පළඳා පුෂ්පෝහාර දැක්විය.

“අද දවසේත් උතුරු නැගෙනහිර මාධ්‍යවේදීන් වෙත එල්ල වන පීඩනයේ හා මර්දනයේ නිමාවක් නොමැත” යනුවෙන් යාපන මාධ්‍ය සමාජය වෙනුවෙන් අදහස් දැක්වූ මාධ්‍යවේදී රත්නම් දයාපරන් වැඩි දුරටත් කියා සිටියේ ‘’අවුරුදු ගානකට කලින් ලියපු දේකට වුනත්, සමාජ මාධ්‍යයේ තබන සටහනකට, හුවමාරු කරගන්නා ෆොටෝ එකකට වුනත් කොළඹට කැඳවා දීර්ඝ ලෙස ප්‍රශ්න කෙරෙන, ඒ හරහා කෙරෙන තර්ජන වල අඩුවක් නැහැ.’’ඒ සඳහා ඕනෑතරම් උදාහරණ යාපනය මුලතිව් , මඩකළපුව, කිලිනොච්චිය වගේ ප්‍රදේශ වල අඩුවක් නැතිව ඇති බවයි.

නිලක්ෂන් ඝාතනය ඇතුළු මරා දැමුණු සෙසු උතුරු නැගෙනහිර මාධ්‍යවේදීන් පිළිබඳව විධිමත් අපක්‍ෂපාති පරීක්ෂණයක් මෙතෙක් සිදු කිරීමට බලයට පත් කිසිදු ආණ්ඩුවක් කටයුතු කර නොමැත.

ශ්‍රි ලංකාවේ ප්‍රජාතන්ත්‍රවාදය සඳහා වූ ජනමාධ්‍යවේදියෝ [JDS] සංවිධානය ප්‍රකාශයට පත්කොට ඇති පසුගිය දශකය තුල මරා දැමුණු ජනමාධ්‍යවේදීන් හා මාධ්‍ය සේවකයන්ගේ 44 කගේ ලැයිස්තුවට අයත් බහුතර උතුරු නැගෙනහිර පළාත් නියෝජනය කරනු ලැබූ දෙමළ මාධ්‍යවේදීන්ය.

යහපාලන සමයේ පළමු මානව හිමිකම් දින සමරුවේදී ඒ ලැයිස්තුව ලබාගත් අගමැති රනිල් වික්‍රමසිංහද ඒ සම්බන්ධයෙන් පරීක්ෂණ පැවැත්වීමට උනන්දු වූ බවක් වාර්තා වී නොමැත.

මෙතෙක් යුක්තිය ඉටු නොවූ නිලක්ෂන් ඇතුළු අයියතුරෛ නඩේසන්, එල්.එම්.ෆලීල් [නට්පිට්ටිමුනෛ ෆලීල්], සුබ්‍රමනියම් සුගීර්දරාජන්, සින්නතම්බි සිවමහරාජා,සුබ්‍රමනියම් රාමචන්ද්‍රන්,චන්ද්‍රබෝස් සුදාහර්,සෙල්වරාසා රජීවර්මන්,ඉසෛවිළි චෙම්පියන් [සුභාජිනී], පරනිරූපසින්හම් තේවකුමාර්,රාසයියා ජයෙන්තිරන්,පුන්නියමූර්ති සත්‍තියමූර්ති,මහලිංගම් මහේස්වරන්,මාරියප්පු අන්තෝනිකුමාර්,ඉසෛප්‍රියා [ශෝභා], තිරුකුලසිංහම් තවබාලන් ආදී දෙමල මාධවේදී, වේදිනියන්ගේ ඝාතන JDS ලැයිස්තුවේ සඳහන්වේ.

Facebook Comments

wedding people