ගෝඨාභය රාජපක්ෂ සිය ඇමරිකානු පුරවැසි භාවය අහෝසි කරගත් බව කියා රටම ගොනාට අන්දවා ඇති බව ආණ්ඩු පාක්ෂික අමාත්‍යවරයකු ප්‍රකාශ කර තිබේ.
සිය ඇමරිකානු පුරවැසි භාවය අහෝසි කර ගත් බවට පොහොට්ටු ජනපති අපේක්ෂකයා ඉදිරිපත් කරන සියලු ලේඛන “හොර ලියකියවිලි” බවට මංගල සමරවීර ඇමැතිවරයාචෝදනා කරයි.
“රාජපක්ෂ දිනන්නේ නෑ දින්නත් වෙන්නෙ ගීතා කුමාරසිංහ මහත්මියට වෙච්ච දේමයි. මේ වෙනකොට මෙතුමා මුළු රටම ගොනාට අන්දලා තියෙන්නේ. එතුමා මෙරට පුරවැසි භාවය හිමිකර ගත්තයි කියලා ඇමරිකන් පුරවැසි භාවය අහිමි කරගත්තැයි කියලා ප්‍රකාශයට පත් කළත් මේ වෙනකොට ඒ සියලුම ලියකියවිලි හොර ලියකියවිලි බවට පැහැදිලි,” යැයි ඇමැතිවරයා 12 අඟහරුවාදා පැවති මාධ්‍ය හමුවකදී පවසා ඇත.
මෙරට පුරවැසි භාවය නොසලකා ජන්දයට තරඟ කිරිමට අවස්ථාව ලබා දීම නරක පුර්වාදර්ශයක් බව කී අමාත්‍යවරයා අනාගතයේදී මෙවැනි ආකාරයට වෙනත් රටවල පුරවැසියන් පවා මැතිවරණයට ඉදිරිපත් වනු ඇති බවට අනතුරු ඇඟවීය.
“ඉන්දීයවේ කෙනෙක් නාම යෝජනා බාර දුන්නොත් දෙන්න වෙනවා. ඇමරිකන්කාරයෙකුට නාමයෝජනා ඉල්ලුවොත් ලබා දෙන්න වෙනවා. ඒක පස්සෙ බේර ගන්න ඕනෙ කාරනාවක් කියලා තමයි මැතිවරණ කාර්යාලය කියන්නෙ නමුත් මම හිතන්නෙ රටක් හැටියට විශේෂයෙන්ම ගෝඨාභය රාජපක්ෂ මහතාට ජන්දය ලබා දීමට කටයුතු කරන අය දැනගෙන තමයි තමන්ගේ ජන්දය පාවිච්චි කරන්න ඕනේ.”
කෙසේවෙතත්, එම “හොර ලියවිලි” සම්බන්ධයෙන් කිසියම් නීතිමය පියවරක් ගන්නේදැයි අමාත්‍යවරයා පැහැදිලි කළේ නැත.
රාජ්‍ය බුද්ධි අංශ විසින් ජනාධිපතිවරයා හට ලබා දී ඇති නවතම සමීක්ෂණ වාර්තා අනුව පොහොට්ටු ජනපති අපේක්ෂකයා හංසයා ලකුනින් තරඟ කරන සජිත් ප්‍රේමදාසට වඩා සීයයට අටක පමණ ජන්ද ප්‍රතිශතයක් පිටුපසින් සිටින බවද මුදල් අමාත්‍ය මංගල සමරවීර වැඩි දුරටත් කියා සිටියේය.
Facebook Comments
