පසුගිය රජය විසින් විදුහල්පතිවරුන්ට ලබා දුන් හමුදා පුහුණුව නැවතත් යහපාලන රජය මඟින් ආරම්භ කර තිබීම සම්බන්ධයෙන් ලංකා ගුරු සංගමය දැඩි විරෝධය පළ කර තිබේ.
‘‘නායකත්ව හා කණ්ඩායම් හැඟීම් වර්ධනය කිරීමේ තෙදින නේවාසික වැඩමුළුව – 2017’’ නමින් දකුණු පළාත් අධ්‍යාපන දෙපාර්තමේන්තුව මඟින් තෙදින නේවාසික පුහුණු වැඩමුළුවක් ලෙස ඌව කුඩාඔය කොමාන්ඩෝ රෙජිමේන්තු පුහුණු පාසලේ දී පැවැත්වීමට නියමිතව ඇති බවයි එම සංගමයේ පවසන්නේ.
මෙම පුහුණුව සඳහා මාතර කලාපයේ විදුහල්පතිවරුන්ගේ සහභාගිත්වය අනිවාර්ය බව ද එහි දක්වා ඇතැයි මාධ්‍ය නිවේදනයක් නිකුත් කරමින් ලංකා ගුරු සංගමයේ ප‍්‍රධාන ලේකම් ජෝෂප් ස්ටාලින් සඳහන් කරන්නේ.
පසුගිය රජය සමයේ ද විදුහල්පතිවරුන්ට හමුදා පුහුණූව ලබාදීමේ අත්තනෝමතික වැඩපිළිවෙළක් ක්‍රියාත්මක වූ අතර එවැනි පුහුණුවක් අතරතුරදී රද්දොළුගම ජාතික පාසලේ විදුහල්පති ලෙස එවකට කටයුතු ගාමිණී වික්‍රමසිංහ මහතා ජීවිතක්ෂයට පත් වු බව ද ජෝෂප් ස්ටාලින් සිය නිවේදනය මඟින් සිහිපත් කරයි.
පාසල්වලින් සිදුවිය යුත්තේ නිදහස් චින්තනයෙන් හෙබි අනාගත පරපුරක් බිහි කිරීම බවට අවධාරණය කරන ගුරු සංගම් නායකයා පෙන්වා දෙන්නේ හමුදා විනය තුළ සිදුවන්නේ අණට කීකරු වී කටයුතු කිරීමට හුරු කිරීමක් බැවින් විදුහල්පතිවරු හරහා පාසල් පද්ධතියට හමුදා විනය පැටවීම තුළ පාසල් පද්ධතියට නිදහස් චින්තනයෙන් යුත් ක්‍රියාකාරීත්වයන්ට පාසල් දරුවන්ට ඇති ඉඩකඩ ඇහිරී යාම බවයි.
විදුහල්පතවරුන් පුහුණු කිරීම සඳහා අධ්‍යාපන අමාතංශය සතුව පුහුණු ආයතන තිබියදී කමාන්ඩෝ රෙජිමේන්තු පුහුණූ පාසල් තුළදී විදුහල්පතිවරු පුහුණූ කිරීමෙන් පැහැදිලි වන්නේ හමුදා විනය පාසල් තුළට ගෙන ඒමට පසුගිය රජය මෙන්ම වත්මන් රජය ද උත්සහ කිරීමක් බවයි ලංකා ගුරු සංගමයේ ප‍්‍රධාන ලේකම් ජෝෂප් ස්ටාලින් සිය නිවේදනය මඟින් පෙන්වා දෙන්නේ.
Facebook Comments
