ජාතීන් අතර වෛරය අවුළුවා ලීමට රාජ්‍ය මාධ්‍ය යොදා ගැනීම හෙලා දකිමින් පාර්ලිමේන්තු විපක්ෂයේ මන්ත්‍රීවරයෙක් ජනමාධ්‍ය ඇමැතිට අප්‍රසාදය පළ කොට තිබේ.
“පසුගිය සෙනසුරාදා (2021 සැප්තැම්බර් 18) උදෑසන 8.30 ට ජාතික රූපවාහිනිය ඔස්සේ විකාශනය වූ “ආයුබෝවන්“ වැඩසටහනට සහභාගි වූ ගලබොඩඅත්තේ ඥානසාර හිමියන් මුස්ලිම් ජනතාව සම්බන්ධයෙන් අපේ සිංහල බෞද්ධ ජනතාව අතර සැකය සහ වෛරය මතුකරන වෛරී ප්‍රකාශන ගණනාවක් කිසිදු බාධාවකින් තොරව ප්‍රකාශ කළේය. මෙලෙස ශ්‍රී ලංකාව තුල වෙසෙන ජාතීන් සහ ආගමිකයන් අතර වෛරය ඇවිස්සීම සඳහා රාජ්‍ය මාධ්‍ය අත්තනෝමතික ලෙස යොදාගැනීම ගැන බලවත් සිත්වේදනාව සහ අප්‍රසාදය” පලකරන බව සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් විසින් ජනමාධ්‍ය ඇමැති ඩලස් අලහප්පෙරුම වෙත ලිපියක් මගින් දැනුම් දී ඇත.
ඇවිදින බෝම්බකාරයන්
“ඉස්ලාම් භක්තිකයන් ගණනාවකගේ ඉමහත් වේදනාවට හේතුවූ එම අප්‍රියජනක වැඩසටහන ඔස්සේ ඥානසාර හිමියන් විසින් ශ්‍රී ලංකාවාසී මුස්ලිම් ජනතාව හඳුන්වන ලද්දේ “ඇවිදින බෝම්බකාරයන්” ලෙසය. “මුස්ලිම් අන්තවාදීන් ඕනෙම වෙලාවක ක්‍රියාත්මක වෙන්න පුළුවන්” යයි කියමින් සිංහල ජනතාව අතර සැක, බිය සහ වෛරය මතුකළ උන්වහන්සේ වරෙක නැගු අභූත චෝදනාවක් වූයේ “මුස්ලිම් ජනතාව සන්නද්ධ වෙමින් සිටින” බවයි. ඒ චෝදනාව එල්ල කිරීමට තරම් විශ්වසනීය සාක්ෂි තමන්වහන්සේ සතුව තිබුනේ නම්, රාජකීය පණ්ඩිත හිමියන් කළ යුතුව තිබුණේ ආරක්ෂක අංශවලට එම තොරතුරු ලබාදීම මිස රටේ බහුතරය අතර බිය සහ වෛරය පතුරුවාලීම නොවේ” යැයි පෙන්වාදෙන රහුමාන් මන්ත්‍රීවරයා අවධාරණය කර ඇත්තේ කිසිදු බාධාවකින් තොරව විකාශනය කළ, සංස්කරණය නොකොට අන්තර් ජාලය ඔස්සේ ද ප්‍රචාරය වන එම වැඩසටහන මෙහෙයවූ ප්‍රවීණ නිවේදක අසේල බණ්ඩාරනායක එම වෛරී භාෂාව කිසිවිටෙකත් අභියෝගයට ලක් නොකිරීම ද මහත් කනගාටුවට හේතුවන බවය.
රට තුල රාජ්‍ය මාධ්‍ය භාවිතාවේත්, පිටරටදී රාජ්‍ය නායකයා ලෝක නායකයන් හමුවේ කියන කතාවලත් පරස්පරය නිසා ජනාධිපතිවරයා සංහිඳියාව සම්බන්ධයෙන් කරන ප්‍රකාශවල අවංක භාවය විපක්ෂ මන්ත්‍රීවරයා සැකයට ලක් කරයි.
“ජනතාව සතු පොදු දේපලක් වන ගුවන් තරංග ඔස්සේ ජාතිවාදී ප්‍රකාශ ප්‍රචාරය කිරීම සඳහා යොදාගෙන තිබුනේ ජාතීන් අතර සංහිඳියාව සඳහා ඇප කැප වන බව ජනාධිපතිවරයා විසින් නිව් යෝර්ක් නුවරදී එක්සත් ජාතීන්ගේ මහලේකම්වරයා හමුවේ සහතික වීමට දිනකට පෙර වීම සැබවින්ම විශ්මය ජනකය. ජනාධිපති ගෝඨාභය රාජපක්ෂ විසින් එහිදී රටේ සංහිඳියාවට දායක වීමට පැමිණෙන ලෙස දෙමළ ඩයස්පෝරාවට විවෘත ආරාධනයක්ද කර තිබීම සතුටට කරුණකි. එසේ වෙතත්, රාජ්‍ය මාධ්‍ය සුළු ජාතික ප්‍රජාවන්ට එරෙහිව නිදහසේ වෛරය පතුරුවන විට ජනාධිපතිවරයාගේ ආරාධනයේ අවංකභාවය පිළිබඳව රට තුලත්, ඉන් පිටතත් සැක මතුවීම ස්වභාවිකය“ යැයි මාධ්‍ය ඇමැති අලහප්පෙරුමගේ අවධානයට ලක් කරන රහුමාන් විපක්ෂයේ මන්ත්‍රී පෙන්වා දී ඇත්තේ අගමැතිවරයා ඉතාලියේ පැවති ජාත්‍යන්තර අන්තර් ආගමික සමුළුවේදී විවිධ ආගම් අතර වෙනස්කම් කියාපානු වෙනුවට සෑම ආගමකම ඇති සමානතා ගැනත්, විදේශ අමාත්‍ය ජී එල් පීරිස් එම සමුළුවේදීත්, ජිනීවා නුවර එක්සත් ජාතීන්ගේ මානව හිමිකම් සමුළුවට කළ දේශනයේදීත්, පොදුරාජ්‍ය මාණ්ඩලීය මහලේකම් පැට්‍රීෂියා ස්කොට්ලන්ඩ් සමග කළ අන්තර්ජාල සාකච්ඡාවකදීත් අවධාරණය කර තිබුණේ රටේ අනාගත සුබසිද්ධිය සඳහා ජාතීන් අතර පැවතිය යුතු සංහිඳියාවේ වැදගත්කම අවධාරණය කර තිබු බවය.
“රටින් පිටතදී ආණ්ඩුවේ ඉහළම නායකයන් එසේ කියද්දී, ශ්‍රී ලංකා රූපවාහිනී සංස්ථාව ඥානසාර හිමියන් යොදාගෙන රට ඇතුලේ ප්‍රචාරය කළේ ජාතීන් බේද කරන වෛරයයි. ශ්‍රී ලංකාවේ ඉස්ලාම් භක්තිකයන්ගේ ඉහලම විද්වත් සභාව වන ජමියතුල් උලමා සභාවට අවමාන කරමින් එය තාලිබාන් සංවිධානයට සම්බන්ධ බවට කරන චෝදනා නිදහසේ ප්‍රචාරය කර හරින ලදී.”
පරීක්ෂණ පවත්වන්න
“මීට පෙර අවස්ථා කීපයකදී පෞද්ගලික රූපවාහිනී නාලිකා ඔස්සේ මුස්ලිම්වරුන්ටත්, කතෝලික නායකත්වයටත් එරෙහිව වෛරක්කාරී කතා කියා තිබියදී නැවතත් ගලබොඩඅත්තේ ඥානසාර ස්වාමීන්වහන්සේ ජාතික රූපවාහිනියට කැඳවා තිබීම පිළිබඳවද මෙහිදී සිහිපත් කළ යුතුය“ යැයි සඳහන් මාධ්‍ය අමාත්‍යවරයාට යොමු කළ එම ලිපියේ ඥානසාර හිමියන්ගේ අභූත චෝදනා වලට විරුද්ධව කතෝලික සභාව පොලිස්පතිට පැමිණිල්ලක්ද කර තිබියදී “ගලබොඩඅත්තේ ඥානසාර ස්වාමීන්වහන්සේට බාධාවකින් තොරව රාජ්‍ය මාධ්‍ය ඔස්සේ ජාතිවාදය පතුරුවන්නට මග පෑදුනේ කෙසේද යන්න ගැන වහාම පරීක්ෂණයක් පවත්වා මෙම බියකරු තත්වයට වගකිවයුත්තන් සම්බන්ධයෙන් විනයානුකුලවත්, පොදු නීතිය අනුවත් පියවර ගැනීමයි. එම පරීක්ෂණයේ ප්‍රතිපල ප්‍රසිද්ධියට පත්කිරීම සංහිඳියාව පවත්වාගෙන යන සුපසන් මාධ්‍ය භාවිතාවක් සඳහා අත්පොතක් වනු නියතය. ඒ සමගම දැනට අන්තර්ජාලය ඔස්සේ පැය විසිහතරේම කෙරෙන වෛරී ප්‍රචාරය අත්හිටුවීමටද පියවර ගැනීමත් වැදගත් “බවද පෙන්වා දෙයි.
මරණයේ දේශය
මහාචාර්ය නීලිකා මලවිගේ සිදු කළ ප්‍රකාශයක් රාජ්‍ය මාධ්‍ය ඔස්සේ විකෘති කර පළ කිරීමෙන් ඇයට සිදුවූ හානියට සමාව ඉල්ලා සිටීමෙන්,වගවීම බාරගැනීම පිළිබඳව පුර්වාදර්ශයක් සපයා ඇති ඔබ, මෙවර වරද වී ඇත්තේ සමස්ත ජනප්‍රජාවකට බැවින්ද , මහත් භීෂණකාරී අවදියක ජනතා නියෝජිතයකු ලෙස ඔබ පළමු වතාවට තේරී පත්වීමේදී මරණයේ දේශයට ජීවිතය රැගෙන එන බවට වූ පොරොන්දුව අනුව මේ දේශය නැවත මිණීවලට ඇදගෙන යන ජාතිවාදී වෛරය ප්‍රචාරය කිරීම නවතා සිංහල, දෙමළ, මුස්ලිම් කාටත් ජීවත් වීමට මග සලසා දෙමින් වගකිවයුතු අමාත්‍යවරයකු ලෙසින් මේ අපරාධකාරී වරද නිවැරදි කරගන්නා ලෙස මුජිබර් රහුමාන් මන්ත්‍රීවරයා ඩලස් අලහප්පෙරුම ඇමතිවරයාගෙන් ඉල්ලා සිටී.
Facebook Comments
