රුපියල් දහස දක්වා ඉහළ දැමු වතු කම්කරුවන්ගේ දෛනික වැටුප වතු හාම්පුතුන් විසින් කප්පාදු කරන බවට චෝදනා කරමින් වතුකරයේ උද්ඝෝෂණයක් දියත් කර තිබේ.
හැටන් මස්කෙලිය ලංකා වතුයායේ කම්කරුවන් ජුලි 17 බ්‍රහස්පතින්දා රුපියල් දහසේ දෛනික වැටුප ඉල්ලා විරෝධතා පැවැත්වු බවයි පළාත් බද මාධ්‍යවේදීන් පවසන්නේ.
වතු කම්කරුවන්ගේ දිනක මුලික වැටුප රුපියල් දහසක් ලෙස පඩිපාලක සභාව මගින් නියම කොට එය ගැසට් නිවේදනයක් මගින් ප්‍රකාශයට පත් කර ඇතත් වතු සමාගම් විසින් විවිධ අසාධාරණ කොන්දේසි පනවමින් මූලික වැටුප රුපියල් දහස කප්පාදු කිරීමට විරෝධය දක්වමින් පසුගිය දින කිහිපය තුලදී වතු කරයේ විරෝධතා දියත් කර තිබුනි.
මාර්තු මාසයේදී පමණක් වතු පාලනාධිකාරිය විසින් තමන්ට දෛනිකව රුපියල් දහසක් ලබා දුන් නමුත් අප්‍රේල් සහ මැයි මාස වලදී එම ගෙවීම් සිදු නොකළ බව හැටන් මස්කෙලිය ලංකා වතුයායේ කම්කරුවන් මාධ්‍යවේදීන් හා කියා තිබේ.
ලංකා වතුයායේ තේ කම්කරුවන් පෙන්වා දෙන්නේ දෛනික වැටුප දහස දක්වා වැඩි කිරීමට පෙර එක් අයෙක් දිනකට තේ දළු කිලෝ 16 ක් නෙළු නමුත් රුපියල් දහසක් ලබා දීමටනම් දිනකට තේ දළු කිලෝ 26 ක් කැඩිය යුතු බවට පාලනාධිකාරිය විසින් කොන්දේසි පනවා ඇති බවයි.
කම්කරුවන් වෙනදා උදෑසන 8.30 සිට පස්වරු 4.30 දක්වා සේවයේ නිතර වු කාල සීමාව පෙරවරු 7.00 සිට පස්වරු 5.00 දක්වා වැඩි කර ඇති බවත් ඔවුහු පෙන්වා දෙති.
විරෝධතාකරුවන් වැඩි දුරටත් අවධාරණය කරන්නේ කම්කරුවකු දිනකට තේ දළු කිලෝ 17 ක් නෙළුවහොත් වතු පාලනාධිකාරිය විසින් ඔහුට දිනකට ගෙවනු ලබන්නේ රුපියල් 500 ක මුදලක් පමණක් බවයි.
Facebook Comments
