ඉන්දීය කෝවිඩ් ප්‍රභේදයේ පැතිරීමේ දත්ත ගැන සැකයක්

ශ්‍රී ලංකාවෙන් දැනට වාර්තා වන ඉන්දියානු ඩෙල්ටා ප්‍රභේදය ආසාදිත පුද්ගලයන් ප්‍රමාණය මත පදනම් වීමෙන් පමණක් එම වයිරසය පැතිරීමේ පරිමාණය සහතික කොට කිව නොහැකි බව වසංගත මර්දනයේ නිරත සුව විරු නායකත්වය පෙන්වා දෙයි.

වසංගතයේ ප්‍රභේද පරීක්ෂා කිරීම ඉතා අවිධිමත්ව මග හැර තිබීම එයට හේතුව බවයි සෞඛ්‍ය වෘත්තීයවේදීන්ගේ විද්වත් සංගමය පවසන්නේ.

“ඉන්දියානු ඩෙල්ටා ප්‍රභේදය සහිත ආසාදිතයන් ප්‍රථම වතාවට ශ්‍රී ලංකාවේ ප්‍රජාව ආශ්‍රිතව සොයා ගනු ලැබ ඇත. නමුත් ප්‍රභේද පරීක්ෂා කිරීම ඉතා අවිධිමත්ව මග හැර තිබීම හේතුවෙන්, අක්‍රමවත් ලෙස ලැබෙන මෙම ප්‍රතිඵල මගින් රට තුළ ඩෙල්ටා ප්‍රභේදය කෙතරම් පැතිරී ඇත්දැයි යන්න කිසිසේත්ම තහවුරු කළ නොහැක.”

ප්‍රභේද පරීක්ෂණ සිදුකිරීමට බාධා පමුණුවමින් සිටින්නේ, සෞඛ්‍ය අමාත්‍යාංශය කිසියම් යටි අරමුණක් සඳහාදැයි සෞඛ්‍ය වෘත්තීයවේදීන්ගේ විද්වත් සංගමයේ සභාපති රවී කුමුදේශ් සැක පල කරයි.

නව තාක්ෂණය යොදා ගනිමින් රුපියල් දහදාහක ටත් වඩා අඩු මුදලකට ප්‍රභේද පරීක්ෂණයක් සිදු කළ හැකිව තිබියදී, සෞඛ්‍ය අමාත්‍යාංශයේ රසායනාගාර සඳහා හිතාමතාම එම පහසුකම ලබා නොදෙන්නේ රෝගය සැබෑ ස්වරූපය හෙළිදරව් වීම වැළැක්වීම සඳහා ද යන්න පිළිබඳව සාධාරණ සැකයක් මතු වන බව නිවේදනයක් නිකුත් කරමින් වෘත්තියවේදියා ප්‍රකාශ කර තිබේ.

ඉන්දියාවේ සිඝ්‍රයෙන් ව්‍යාප්ත වන B.1.617.2 හෙවත් ඩෙල්ටා කොවිඩ් ප්‍රභේදය ආසාදනය වු පස් දෙනෙක් කොළඹ, දෙමටගොඩ ප්‍රදේශයෙන් හමුවූ බව ශ්‍රී ජයවර්ධනපුර විශ්ව විද්‍යාලයේ ආසාත්මිකතා හා ප්‍රතිශක්ති විද්‍යාව සහ ශෛල ජෛව විද්‍යාතනයේ අධ්‍යක්ෂ වෛද්‍ය ආචාර්ය චන්දිම ජීවන්දර සදහන් කරයි.

මෙරට තුළ කොවිඩ් ව්‍යාප්තිය සම්බන්ධයෙන් සිදුකරනු ලබන ජානමය අනුක්‍රමණ පරීක්ෂණ වලදී මෙය හඳුනා ගත් බවයි ආචාර්ය චන්දිම ජිවන්දර වැඩිදුරටත් පවසන්නේ.

දෙමටගොඩ, ආරාමය පෙදෙසේ වාර්තා වූ කොවිඩ් ආසාදිත පුද්ගලයන් නම දෙනෙකුගේ ජෛව සාම්පල් පරීක්ෂණ සිදුකළ බවත් ඉන් පස් දෙනෙකුට ඉන්දියාවේ සිඝ්‍රයෙන් ව්‍යාප්ත වන B.1.617.2 හෙවත් ඩෙල්ටා කොවිඩ් ප්‍රභේදය ආසාදනයවී ඇති බවට අනාවරණය වී තිබේ.

මිට අමතරව කොළඹ නගරසභා බලප්‍රදේශයේ කොළඹ 6,8 සහ 10 යන ප්‍රදේශවලින්ද, කරාපිටිය සහ මඩකලපුව ප්‍රදේශයේ සිදුකළ ජෛ සාම්පල් පරික්ෂණ මගින් ඇල්ෆා කොවිඩ් ප්‍රභේදය ආසාදනය වූ ආසාදිතයන් හඳුනා ගත් බව ආචාර්ය චන්දිම ජීවන්දර වැඩිදුරටත් මාධ්‍යවේදීන් සමග පවසා තිබේ.

සෞඛ්‍ය වෘත්තීයවේදීන්ගේ විද්වත් සංගමයේ සභාපති රවී කුමුදේශ් සිය නිවේදනය මගින් පෙන්වා දෙන්නේ ලෝකයේ බොහෝ රටවල රතු කලාපවලට ඇතුලත් කර ඇති ශ්‍රී ලංකාව, ප්‍රභේද පරීක්ෂණ සිදු නොකිරීම නිසා ම ඒවායෙන් ඉවත්වන්නට නොහැකි, නොදියුණු සෞඛ්‍ය සේවාවක් ඇති රටක් බවට තහවුරු වෙමින් පවතින බවයි.

සංචාරක ව්‍යාපාරයටද එය බරපතළ තර්ජනයක් වන බැවින්, සෞඛ්‍ය අමාත්‍යාංශය පැහැර හැර ඇති එම වගකීම ගුවන් සේවා අමාත්‍යාංශය මගින් හෝ සිදුකරන ලෙස වෘත්තියවේදියා ඉල්ලා සිටි.

“ලෝක සෞඛ්‍ය සංවිධානයේ නිර්ණායකයන්ට අනුව අවම වශයෙන් විදේශ වල සිට පැමිණෙන ගුවන් මගීන්ගේ පරීක්ෂණය සිදුකිරීමේ වගකීම ගුවන්තොටුපල රසායනාගාරයට බාරගත හැකි බැවින්, අප ඒ පිළිබඳ වැඩපිළිවෙළක් යොදවන ලෙස ගුවන් සේවා අමාත්‍ය වරයාගෙන් ඉල්ලා සිටිමු.”