දෙමළ දේශපාලන සිරකරුවන්ගේ නිදහස ඉල්ලා ජනපතිට පෙත්සමක්

ත්‍රස්තවාදය වැළැක්වීමේ පනත යටතේ අත්අඩංගුවට ගෙන දීර්ඝ කාලීනව රඳවාගෙන සිටින දෙමළ දේශපාලන සිරකරුවන් සහ පුනරුත්ථාපනය කර සමාජ ගත කිරීමෙන් පසුවත් යළිත් අත්අඩංගුවට ගෙන සිර ගත කර සිටින හිටපු සටන්කාමීන් නිදහස් කරන ලෙස ඉල්ලා ජනාධිපතිවරයාට බාර දීම වෙනුවෙන් සන්දේශයකට අත්සන් ලබා ගැනීමේ ව්‍යාපාරයක් උතුරේ ආරම්භ වී තිබේ.

සටන්කාමීන්ගේ සුබසාධන සංගමයේ ප්‍රධානත්වයෙන් 2024 දෙසැම්බර් මස 28 වැනිදා වව්නියාවෙන් ආරම්භ කළ අත්සන් ලබා ගැනීමේ ව්‍යාපාරය දෙසැම්බර් 30 වැනිදා මන්නාරමේ ද 2025 ජනවාරි 2 වැනිදා මුලතිව් සහ ජනවාරි 3 වැනිදා කිලිනොච්චි යන නගරවලදී ද ක්‍රියාත්මක වු බවයි පළාත් බද වාර්තාකරුවන් පවසන්නේ.

සුළු ජාතීන්ට එරෙහිව අසමානුපාතිකව යොදාගන්නා බවට දේශීය හා විදේශීය වශයෙන් දැඩි ලෙස දෝෂ දර්ශනයට ලක්ව තිබෙන ත්‍රස්තවාදය වැළැක්වීමේ පනත අහෝසි කිරීමට කටයුතු කරන ලෙසත් සටන්කාමීන්ගේ සුබසාධන සංගමය වත්මන් ආණ්ඩුවෙන් ඉල්ලා සිටි.

ජනවාරි 3 වැනි සිකුරාදා කිලිනොච්චියේ දී දියත් කළ අත්සන් ලබා ගැනීමේ ව්‍යාපාරයේ සංවිධායකවරයකු වන ඉරණමඩු කෘෂිකර්ම සම්මේලනයේ ලේකම් මුත්තු සිවමෝහන් චෝදනා කළේ යුද්ධය අවසන් වීමෙන් පසු බලයට පත් සෑම රජයක්ම මැතිවරණ ජයග්‍රහනයට පෙර මිත්‍රත්වයේ දැත් දිගු කළත් බලයට පත් වීමෙන් පසු දේශපාලන සිරකරුවන් නිදහස් කිරීම අමතක කර දැමු බවයි.

”යුද්ධය අවසන් වී වසර 15ක් ගතවී ඇතත්, සෑම රජයක්ම තමන්ගේ ආණ්ඩුවක් පිහිටුවන විට සංහිඳියාව කියලා කියනවා, වෙනසක් කියලා කියනවා, අලුත් අදහස් එක්ක ගමන් කරමු කියලා කියනවා. සෑම මැතිවරණයකදීම සමගියෙන් ගමන් කිරීමට සියලු දෙනාටම මිත්‍රත්වයෙන් ආරාධනා කරනවා. නමුත් වසර 20, 25කට වැඩි කාලයක් දේශපාලන සිරකරුවන්ව ලෙස සිටින සිරකරුවන් නිදහස් කිරීම ඔවුන්ට බලයට පත් උනාට පස්සේ අමතක කරනවා.”

අඩුම තරමින් වත්මන් ආණ්ඩුව හෝ දේශපාලන සිරකරුවන් නිදහස් කර සංහිදියාව ප්‍රායෝගික ලෙස ක්‍රියාවේ යොදවන ලෙස ඔහු වැඩි දුරටත් ඉල්ලා තිබේ.

”අඩුම තරමේ වෙනසක් ගැන කතා කරන, ක්‍රියා කරන වත්මන් ආණ්ඩුව ඒ ගැන අවධානය යොමු කළ යුතුයි. බොහෝ දරුවන්ට තම දෙමාපියන් දැකීමට නොහැකි වෙලා තියනවා . දීර්ඝ කාලයක් සිරගතව සිටි ඔවුන්ව නිදහස් කිරීම හරහා ඔයාලාගේ සංහිදියාව සහ වෙනස ප්‍රකාශ කරලා දෙමළ ජනතාව අනාගතයේ නිදහසේ ජීවත් වීමට ඉඩ සලසන්න ඕනේ.”

ත්‍රස්තවාදය වැළක්වීමේ පනත අහෝසි කිරීම වෙනුවෙන් දෙමළ ජාතික සන්ධානයේ ප්‍රධානත්වයෙන් පසුගිය ආණ්ඩු සමයේ දියත් කෙරුණු මහජන පෙත්සම් ව්‍යාපාරයට උද්යෝගිමත් දායකත්වයක් සැපයූ ජනාධිපති ඇතුළු ජාජබ නායකත්වය මහ මැතිවරණයට පෙර ප්‍රකාශ කොට තිබුනේ පනත සංශෝධනය සම්බන්ධ පියවර ගැනීම පාර්ලිමේන්තුවට පවරන බවයි.