දිවයිනට බල පා තිබෙන නියඟය හමුවේ ජලය සිදී ගිය වන්නියේ වැවක අනවසරයෙන් මසුන් මරමින් සිටියදී අල්ලා දුන් සිංහල ධීවරයන් පිරිසකට පලා යෑමට ඉඩ හැර ඔවුන් පොලීසියට බාර දුන් දෙමළ සහ මුස්ලිම් ධීවරයන් පිරිසක් අත්අඩංගුවට ගැනීමට විරෝධය පළ කරමින් උද්ඝෝෂණයක් දියත් කර තිබේ.
මුලතිව් දිස්ත්‍රික් ලේකම් කාර්යාලය ඉදිරිපිටදී අගෝස්තු 7 වැනිදා විරෝධතා දියත් කළ පළාත් වාසී ධීවර ජනයා දිස්ත්‍රික් ලේකම්වරියගෙන් ඉල්ලා සිටියේ මුස්ලිම් සහ දෙමළ ජනයාට අයත් සම්පත් පිටස්තරයන්ට බලහත්කාරයෙන් අත්පත්කරගැනීමට ඉඩ සලසා නොදෙන ලෙසයි.
පළාත් බද වාර්තාකරුවන් පවසන පරිදි මුලතිව්, තන්නිමුරිප්පු වැවේ අනවසරයෙන් මසුන් මරමින් සිටි සිංහල ධිවරයන් 38 දෙනකු ඔට්ටුසුඩාන් පොලීසියට අල්ලා දීමට මුස්ලිම් සහ දෙමළ ජනයා කටයුතු කර ඇති අතර ඔවුන් අතරින් 9 දෙනකු පොලිස් අත්අඩංගුවෙන් මිදී පළා ගොස් තිබේ.
තමන් විසින් පොලිසියට අල්ලා දුන් සිංහල ධිවරයන්ට පැන යෑමට කටයුතු සැලසීම සම්බන්ධයෙන් විරෝධය පෑමට හා අත්අඩංගුවට ගත් මුස්ලිම්, දෙමළ ජනයා නිදහස් කරන ලෙස බලකරමින් මුලතිව් දිස්ත්‍රික් ලේකම් කාර්යාලය ඉදිරිපිටදී විරෝධතා දැක්වු ජනයා සදහන් කළේ තන්නිමුරිප්පු වැවේ මසුන් මැරීමේ අයිතිය පවතින්නේ කුමුලමුනෙයි, තන්නිපුරම් හා හිජිරාපුරම් දෙමළ සහ මුස්ලිම් වැසියන්ට පමණක් බවට දිස්ත්‍රික් සංවර්ධන කමිටුවේදී තිරණය කර තිබු බවයි.
සිංහල ධීවරයන් අල්ලා දීමට කටයුතු කළ දෙමළ සහ මුස්ලිම් ධිවරයන් 17 දෙනකුට ප්‍රකාශ ලබා දීම සදහා පොලීසියට කැදවා ඔවුන් සියල්ලන්ම අත්අඩංගුවට ගැනීමට ඔට්ටුසුඩාන් පොලීසිය කටයුතු කර ඇති බවයි ප්‍රදේශවාසී ජනයා පවසන්නේ.
තමන්ට අයත් සම්පත් බලහත්කාරයෙන් කොල්ල කෑමට පිටතින් පැමිණි සිංහල ජනයාට ඉඩ නොදෙන ලෙසට විරෝධතාවය දියත් කළ උද්ඝෝෂකයන් මුලතිව් දිස්ත්‍රික් ලේකම් උමා මහේෂ්වරන් වෙත සන්දේශයක් භාර දෙමින් ඉල්ලා සිටි බව පළාත් බද වාර්තාකරුවෝ පවසති.
විරෝධතා දියත් කළ දෙමළ සහ මුස්ලිම් ජනයා චෝදනා කරන්නේ ගජබාපුර, සම්පත් නුවර, ජනකපුර හා කල්‍යාණපුර සිට පැමිණි සිංහල ජනයා මෙසේ අනවසරයෙන් මසුන් මැරීමේ නිරත වු බවයි.
අත්අඩංගුවට ගත් සිංහල ධිවරයන් 29 දෙනාත් දෙමළ හා මුස්ම් ධිවරයන් 17 දෙනාත් අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කර තිබේ.
Facebook Comments
