මුළු දිවයිනටම ඇඳිරි නීතිය දමා තිබියදී කොරෝනා බියට එරෙහිව අනුරාධපුර බන්ධනාගාරය තුළ විරෝධතාවකට වෙඩි තැබීමකින් රැඳවියකු මිය ගොස් තිබේ.
වෙඩි තැබීමෙන් අවම වශයෙන් රැඳවියන් 5 දෙනකු තුවාල ලබා රෝහල් ගත කර ඇති බව සිරකරු අයිතීන් සුරැකිමේ කමිටුව සිලෝන් නිවුස් කළ විමසුමක දී කියා සිටියේය.
ඉන් අනතුරුව රැඳවියන් පිටතට ඒම වැලැක්වීම සහ ආරක්ෂාව සඳහා පොලිසිය, විශේෂ කාර්ය සාධක බලකාය හා කැරලි මර්දන ඒකකය යොදවා තිබෙන බව පොලිසිය නිවේදනය කර තිබේ.
කොරෝනා රෝගියෙකු බවට සැක කෙරෙන රැඳවියකු දින කිහිපයකට අනුරාධපුර බන්ධනාගාරයෙන් හමුවු අතර ඔහු ප්‍රතිකාර සඳහා රෝහල් ගත කර ඇත.
එම තත්ත්වය මත ඇප ලබා දිය හැකි සිරකරුවන්ට හා සුළු වැරදි මත රදවා සිටින රැඳවියන් කොන්දේසි මත හෝ නිදහස් කරන ලෙස ඉල්ලා බන්ධනාගාර රැඳවියන් පැවැත්වු විරෝධතාවයට වෙඩි තබා ඇති බවයි සිරකරු අයිතීන් සුරැකිමේ කමිටුවේ සුදේශ් නන්දිමාල් සඳහන් කර සිටියේ.
බන්ධනාගාරයට ඇතුළු වී ඇති පොලිසිය හා පොලිස් විශේෂ කාර්ය බලකාය සාමාජිකයන් බන්ධනාගරය තුලට කඳුළු ගෑස් ප්‍රහාරයක් එල්ල කර ඇති බව ඔහු පැවසීය.
“අනුරාධපුර බන්ධනාගාරයේ හිටපු කෙනෙක් කොරෝනා කියලා සැක කරලා ඉස්පිරිතාලේ නවත්තලා තියෙනවා. අද අනුරාධපුර රෝහලෙන් කොරෝනා හැඳුන කීප දෙනෙක් හොයා ගත්තා අපි ජනාධිපති තුමාටත් කිව්වා නිදහස් කරන්න පුලුවන් අය නිදහස් කරන්න කියලා. ඕනෙම කොන්දේසියක් දාලා ඒ අයව නිදහස් කරන්න. බන්ධනාගාරය පැතිරුනොත් පාලනය කරන්න බැරිව ලොකු විනාශයක් වෙනවා. දැනටත් හිරගෙදර ප්‍රමාණයට වැඩි අය දාලා තියෙනවා.” සුදේශ් නන්දිමාල් සඳහන් කළේය.
දිවයින පුරා පැතිර යන කොරෝනා රෝගය හේතුවෙන් සුළු වැරදිවලට සිරගතවූවන් සහ දඩ ගෙවා ගැනීමට නොහැකිව රඳවාගෙන සිටින පුද්ගලයන් නිදහස් කිරීමට කටයුතු කරන්නයි සිරකරු අයිතිවාසිකම් සුරැකීමේ කමිටුව ජනාධිපතිවරයාගෙන් ඉල්ලා තිබුණි.
ලොව පුරා රටවල් කිහිපයක් මේ වන විට සුළු වැරදි සම්බන්ධව බන්ධනාගාර ගතවුවන් නිදහස් කර ඇති බවට පැවසු සුදේශ නන්දිමාල් තමන් කරන ලද ඉල්ලීමට ජනපති ගෝඨාභය රාජපක්ෂගෙන් යහපත් ප්‍රතිචාරයක් නොලැබුන බවද කියා සිටියේය.
මේ වන විටත් අනුරාධපුර බන්ධනාගාර සැක සහිත රෝග ලක්ෂණ ඇති පුද්ගලයෙකු හඳුනා ගෙන ඇති නිසා යම් හෙයකින් කොරෝනා තත්ත්වය සිරකරුවන් අතර පැතිර ගියහොත් පාලනය කිරීමට නොහැකි වනු ඇති වන බවට ද තම සංවිධානය ජනපති දැනුවත් කළ බව ද හෙතෙම සඳහන් කළේය.
Facebook Comments
