කොරෝනා ව්‍යසනය මෙන්ම විසුරුවා ඇති පාර්ලිමේන්තුව නිසා මූල්‍ය අර්බුදයකට රට ඇද වැටීමේ අවදානමක් පවතින බව පවසන එක්සත් ජාතික පක්ෂ නායකයා ඒ පිළිබදව ද මෙතෙක් රජයේ සැලකිල්ල යොමු වී නැති බවට චෝදනා කර තිබේ.
පරිපූර්ණ ඒකාබද්ධ සැලැස්මක් සැකසීමට රජය කටයුතු නොකිරීම නිසා කොරෝනා වෛරසය රට පුරා ව්‍යාප්තවීමේ අවදානමක් පවතින බව රනිල් වික්‍රමසිංහ 20 සිකුරාදා නිවේදනයක් නිකුත් කරමින් කියා සිටියේය.
“කොරෝනා වෛරසය රට පුරා ව්‍යාප්තවීමේ අවදානමකට ශ්‍රී ලංකාව ඇද වැටී ඇත. ඒ සදහා පරිපූර්ණ ඒකාබද්ධ සැලැස්මක් සැකසීමට තවමත් රජය කටයුතු කර නොමැත. ඒ අතර තවත් දැවැත්ත මූල්‍ය අර්බුදයකට රට ඇද වැටීමේ අවදානමක් ද මතුව තිබේ. ඒ පිළිබදව ද මෙතෙක් රජයේ සැලකිල්ල යොමු වී නොමැත.”
රජයේ ඒකාබද්ධ අරමුදලෙන් මුදල් වියදම් කළ හැක්කේ පාර්ලිමේන්තුව විසින් සිදු කරන ලද සම්මතයකින් බව සිහිපත් කරන එජාප නායකයා 2020 ජනවාරි 01 වැනි දා සිට 2020 අප්‍රේල් 30 වැනි දා දක්වා මූල්‍ය කටයුතු සිදු කරලීම සදහා පාර්ලිමේන්තුව විසින් අතුරු සම්මත ගිණුමක් සම්මත කර දී ඇති බව පවසයි.
මෙම කාලයෙන් තුල ආණ්ඩුක්‍රම ව්‍යවස්ථාවට අනුව ජනාධිපතිවරයාට කිසිදු ආකාරයකින් අතුරු සම්මත ගිණුමට පරිබාහිරව මුදල් වියදම් කිරීමට නොහැකි බව සහ අප්‍රේල් 30 වෙනිදායින් පසු රජයේ ඒකාබද්ධ අරමුදලෙන් මුදල් වියදම් කිරීමේ බලයක් නොමැති බවයි ඔහු පෙන්වා දෙන්නේ.
කොරෝනා වෛරස නිසා දින නියමයක් නොමැතිව පාර්ලිමේන්තු මැතිවරණය කල් දමා ඇති අතර අභිනව පාර්ලිමේන්තුව රැස්වන තෙක් මුදල් වියදම් කීරිමට නොහැකි වීම හේතුවෙන් රජයේ සේවක වැටුප් ගෙවීමේ සිට කොරෝනා වෛරසයෙන් ගැලවීමේ සෞඛ්‍ය සේවා පවත්වාගෙන යාම දක්වා සියළු කටයුතු අර්බුදයකට ලක්වීමේ අවදානයමක් පවතින බව එජාප නායකයා අවධාරණය කර ඇත.
මෙම අර්බුදකාරී තත්ත්වය වටහා ගත් තමන් වහාම පක්ෂ නායක රැස්වීමක් කැඳවීමට කරන ලද ඉල්ලීමට රජයෙන් යහපත් ප්‍රතිචාරයක් නොලැබුන බවට චෝදනා කරන එජාප නායක රනිල් වික්‍රමසිංහ මෙවන් අර්බුදකාරී අවස්ථාවන් ජයගත හැක්කේ දේශපාලන වාසි පිටුපස හඹා යෑමෙන් නොව රට සුරක්ෂිත කිරීමේ අරමුණට ප්‍රමුඛත්වය දීමෙන් බව වැඩි දුරටත් සිහිපත් කර දී තිබේ.
Facebook Comments
