ඉතාලියෙන් ගෙනා කොරෝනා නිසා පොලිසියකට ප්‍රතිකාර

කොරෝනා ව්‍යාප්තිය අඩාල කිරීමට ඇඳිරි නීතිය පනවා ඇති පුත්තලම දිස්ත්‍රික්කයේ පොලිස් ස්ථානයක් හා එහි නිලධාරින් ස්වයං නිරෝධායනයට ලක් කිරීමට මහජන සෞඛ්‍ය පරීක්ෂකවරුන් පියවර ගෙන තිබේ.

මුන්දලම පොලිසියේ රඳවා තිබු පුද්ගලයෙකු හට කොරෝනා රෝගය ආසාදනය වී ඇති බවට හෙළි වීමත් සමඟ මෙම පියවර ගෙන ඇත.

මාර්තු 08 වනදා රථ වාහන වැරැද්දක් සම්බන්ධව අත්අ අඩංගුවට ගත් ජා-ඇල ප්‍රදේශයේ පදිංචිකරුවකු වන එම පුද්ගලයා ඉතාලියේ සිට මෙරටට පැමිණි අයකු බව පොලිසිය පවසයි.

අත් අඩංගුවට ගත් සැකකරු පුත්තලම වැඩ බලන මහේස්ත්‍රාත් අබිදුල් කාදර් විසින් මේ මස 11 වනදා දක්වා රක්ෂිත බන්ධනාගාර ගත කර ඇති අතර ඉන් මුදා හැර දින කිහිපයකින් කොරෝනා රෝග ලක්ෂණ පෙන්නුම් කර තිබේ.

පසුව කරන ලද පරීක්ෂණ වලින් එම පුද්ගලයා හට කොරෝනා රෝගය වැළදී ඇති බව තහවුරු වී ඇත.

සැකකරු අත් අඩංගුවට ගත් පොලිස් නිලධාරින් හා ඔහුගෙන් ප්‍රකාශ ලබා ගත් නිලධාරින් ස්වයං නිරෝධායනයට ලක් කිරීමට පියවර ගත් බවයි මහජන සෞඛ්‍ය පරීක්ෂක නිලධාරින් පවසන්නේ.

එම පුද්ගලයා රඳවා තැබු පොලිස් සිර මැදිරිය හා මීගමු රිමාන්ඩ් සිර මැදිරිය සහ සෙසු රැඳවියන්ද නිරෝධායනයට ලක් කර ඇති බවයි වැඩි දුරටත් වාර්තා වන්නේ.

ශ්‍රී ලංකාවේ දී මේ වනවිට හඳුනාගෙන ඇති කොරෝනා ආසාදිතයන් අතරින් රෝගීන් වැඩිම පිරිසක් ඇත්තේ ඉතාලියේ සිට පැමිණි ස්වදේශිකයන්ය.

රෝහලට යන්න එපා

කොරෝනා වෛරසය තමන්ට ආසාදනය වී ඇති බවට සැක කරන අයෙක් වේ නම් ලඟම පිහිටි රෝහල වෙත යොමු වීම නුසුදුසු බවට අනතුරු අඟවන සුවසැරිය සෞඛ්‍ය තොරතුරු මධ්‍යස්ථානයේ ප්‍රකාශකයකු අප සමග සදහන් කළේ පහත දැක්වෙන පියවර අනුගමනය කිරීම ඉතා වැදගත් බවයි.

1. ස්වයං නිරෝධායනයට ලක් වීම
2. තවෙකකුට එය බෝ වීමට ඇති අවස්ථා නැති කිරීම
3. ප්‍රතිකාර ලබා ගත හැකි බවට නම් කර ඇති රජයේ රෝහලකට දුරකතනයෙන් අමතා උපදෙස් ලබා ගැනීම
4. රෝහල කරා යෑමට පෙර තමන් එහි පැමිණෙන බවට රෝහල් කාර්යමණ්ඩලය දැනුවත් කිරීම
5. පොදු ප්‍රවාහන පහසුකම් භාවිත නොකිරීම
6. පුර්ව දැනුවත් කිරීමක් සිදු කර 1990 අමතා සුවසැරිය ගිලන් රථයක් ගෙන්වා ගැනීම
7. එහි ගමන් කිරීමේදී මුඛ ආවරණයක් (මාස්ක්) පැලදීම
8. රෝහල් භුමියට ඇතුලත් වීමෙන් පසු අනෙකුත් රෝගීන් ගැවසෙන ස්ථානය වෙත යොමු නොවීම

තම මධ්‍යස්ථානය මගින් ආරක්ෂිත පියවර සම්බන්ධයෙන් ජනතාව දැනුවත් කිරීම සදහා බෙදාහැර තිබෙන මුද්‍රිත අත්පත්‍රිකා අධ්‍යයනය කරන ලෙසත් සුවසැරිය ප්‍රකාශකයා වැඩි දුරටත් ඉල්ලා සිටියේය.

මීට අමතරව කොරෝනා වෛරස් ආසාදනයෙන් වැලැකී සිටීමට අවශ්‍ය උපදෙස් ඇතුලත් කොට ලෝක සෞඛ්‍ය සංවිධානය විසින් නිෂ්පාදනය කර තිබෙන වීඩියෝ පටයක් සිංහල, දෙමළ සහ ඉංශ්‍රීසි යන භාෂා ත්‍රිත්වයෙන්ම ප්‍රසිද්ධියට පත් කර දී තිබේ.

කොරෝනා වසංගතය සම්බන්ධයෙන් අත්‍යාවශ්‍ය දුරකතන අංක කිහිපයක්

1990 : සුව සැරිය ගිලන් රථ සේවාව
117 : ජනාධිපති කාර්ය සාධක බලකාය
011-2695112: වසංගත රෝග අංශය
011-2112705: නිරෝධායන අංශය