ශ්‍රී ලංකා නිදහස් පක්ෂයේ හිටපු ආසන සංවිධායකවරු පිරිසක් වෙනුවට නව සංවිධායකවරු පිරිසක් පත්කරනු ලැබුවේ කිසිවකුගෙන් පළිගැනීමට හෝ කිසිවකුට හිරිහැර කිරීමට නොවන බවත් එය පක්ෂයේ ප්‍රතිසංවිධානය වෙනුවෙන් ගත් එක් පියවරක් පමණක් බව ශ්‍රී ලංකා නිදහස් පක්ෂයේ මහ ලේකම්වරයා පවසනවා.
ශ්‍රී ලංකා නිදහස් පක්ෂ කාර්යාලයේ දී ඊයේ (18) පැවැති මාධ්‍ය සාකච්ඡාවකට සහභාගී වෙමින් ශ්‍රී ලංකා නිදහස් පක්ෂයේ මහ ලේකම් ඇමැති දුමින්ද දිසානායක මේ බව සඳහන් කළේය.
නව ආසන සංවිධායකවරුන් පත්කිරීමට තීරණය කළේ පක්ෂයේ ප්‍රතිසංවිධාන කමිටුව විසින් බවත්, අලුතින් පත්කළ ආසන සංවිධායකයන් සියයට සියයක්ම පාහේ ඉකුත් කාලයේදී මහින්ද රාජපක්ෂ මහතා සමඟ මෙන්ම චන්ද්‍රිකා බණ්ඩාරනායක කුමාරතුංග මහත්මිය සමඟ ද සහයෝගයෙන් කටයුතු කළ අය බවයි මහ ලේකම්වරයා අවධාරණය කරන්නේ.
ශ්‍රී ලංකා නිදහස් පක්ෂය ඉදිරියට ගෙන යාම, පක්ෂය ශක්තිමත් කිරීම මෙන්ම ගම් මට්ටමින් පක්ෂය ශක්තිමත් කිරීමේ අපේක්ෂාවෙන් නව මුහුණුවලට ඉඩ ලබා දුන් බවයි අමාත්‍ය දුමින්ද දිසානායක පෙන්වා දෙන්නේ.
ඉවත් කළ ඇතැම් ආසන සංවිධායකයන් පක්ෂයේ ජ්‍යෙෂ්ඨයන් ලෙස ජනප්‍රිය වුව ද පක්ෂ යාන්ත්‍රණය තුළ නොසිටි අතර පක්ෂය ශක්තිමත් කිරීමට කටයුතු නොකළ පුද්ගලයන් බවට මහ ලේකම්වරයා චෝදනා කර සිටිනවා.
අලුතින් පත්කළ ආසන සංවිධායකයන් ද පක්ෂයේ යාන්ත්‍රණය තුළ කටයුතු නොකළහොත් මෙන්ම පක්ෂ ව්‍යවස්ථාවට පටහැනි ලෙස කටයුතු කළහොත් ඔවුන් සම්බන්ධයෙන් ද තීරණයක් ගැනීමට පක්ෂයේ ප්‍රතිසංවිධාන කමිටුව නොපැකිළෙන බව ද ඇමැතිවරයා වැඩිදුරටත් පැවසීය.
Facebook Comments
