කොළඹදී ජයපුරම් පොලිසිය විසින් අත් අඩංගුවට ගන්නා ලද පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ට එරෙහිව පනවා තිබු විදේශ සංචාර තහංචිය කිලිනොච්චි මහේස්ත්‍රාත් විසින් ඉවත් කර ඇප පිට නිදහස් කර යවා තිබේ.
මන්ත්‍රීවරයා අධිකරණයට ඉදිරිපත් කිරීමේදී පොලිසිය විසින් ඉදිරිපත් කරන ලද තොරතුරු හා වීඩියෝ දර්ශන අතර පරස්පරයක් පෙනී යන බව නිරීක්ෂණය කළ මහේස්ත්‍රාත්වරයා ඒ සම්බන්ධයෙන් පූර්ණ පරීක්ෂණයක් පවත්වන ලෙස කිලිනොච්චි ජ්‍යෙෂ්ඨ පොලිස් අධිකාරිට නියම කර ඇත.
මහේස්ත්‍රාත්වරයා වැඩිදුරටත් පවසා ඇත්තේ එම පරීක්ෂණ වාර්තාව ගැන තමන් සෑහීමකට පත් නොවෙතොත් දිස්ත්‍රික්කයේ නියෝජ්‍ය පොලිස්පතිවරයාගෙන් වාර්තාවක් ඉල්ලා සිටින බවයි.
නීති විරෝධී ලෙස මන්ත්‍රීවරයා අත් අඩංගුවට ගත් පොලිසිය පවරන ලද නඩුව ම ‘බොරුවක්’ බව දෙමළ ජාතික ජනතා පෙරමුණේ ප්‍රකාශක කනගරත්නම් නීතිඥවරයා පවසයි.
මන්ත්‍රීවරයා ජූනි 8 වැනිදා ප්‍රකාශයක් ලබා දීමට නියමිතව තිබියදී ඊට පෙරදා ඔහු අත් අඩංගුවට ගැනීමේ හදිසිය ගැන අධිකරණය පොලීසියෙන් ප්‍රශ්න කර ඇත.
පොලිසිය විසින් ඔහු අත් අඩංගුවට ගන්නා ලද්දේ ඉකුත් 2 දා නැගෙනහිර වඩමරාච්චි යේ ක්‍රීඩා සමාජයක පැවති රැස්වීමක් අතරතුර පොලිස් බුද්ධි අංශ සාමාජිකයකු විසින් දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ට පහරදීම, තවත් අයකු විසින් පිස්තෝලයක් එල්ල කිරීම හා අනන්‍යතාවය හෙළිදරව් නොකිරීම ආදිය පිළිබඳව කිසිදු විමර්ශනයක් නොකරය.
උතුරු නැගෙනහිර දෙමළ ජනයාට නිරන්තරයෙන් එල්ලවන රාජ්‍ය මර්දනයට එරෙහිව නැගී සිටින දෙමළ ජාතික ජනතා පෙරමුණේ නායකයා අත් අඩංගුවට ගෙන ඇත්තේ එම පක්ෂය දඩයම් කිරීමේ සැලසුමක අංගයක් ලෙසින් බවට බිය පලවී තිබේ.
පොලිසියේ ක්‍රියාකාරිත්වය හෙලා දකිමින් TNPF සාමාජිකයෝ කිලිනොච්චි පොලිසිය ඉදිරිපිට කළු මුඛවාඩම් බැඳ විරෝධතාවක්ද දියත් කළහ.
“මගේ වරප්‍රසාද ප්‍රශ්නය පාර්ලිමේන්තුවේ මතුකිරීම කඩාකප්පල් කරන්නයි ඕගොල්ලෝ හදන්නේ. මේක සම්පුර්ණයෙන්ම නීති විරෝධීයි,” යනුවෙන් මන්ත්‍රීවරයා තම නිවසට ආ පොලිස් නිලධාරීන්ට ප්‍රකාශකරන ආකාරය JDS විසින් ප්‍රසිද්ධියට පත් කළ වීඩියෝ දර්ශනයක දැකගත හැක.
ඊට අමතරව දෙමළ ජනතා ජාතික පෙරමුණේ ක්‍රියාකාරීන් දෙදෙනකු ද අත්අඩංගුවට ගෙන රක්ෂිත බන්ධනාගාර ගත කරමින් මන්ත්‍රීවරයාගේ විදේශ ගමන් තහනමකට ලක් කර ඇත.
මේ ආණ්ඩුව යටතේ දෙමළ ජාතික ජනතා පෙරමුණේ පාර්ලිමේන්තු මන්ත්‍රීවරයෙකු අත්අඩංගුවට ගත් දෙවැනි අවස්ථාව මෙයයි. මිට ඉහතදී එම පෙරමුණේ මහ ලේකම්, පාර්ලිමේන්තු මන්ත්‍රී සෙල්වරාසා ගජේන්ද්‍රන් පොලිසිය මගින් අත්අඩංගුවට ගෙන අධිකරණය මගින් ඇප මත මුදා හැරිණි.
පොලිසිය උපුටා දක්වන දකුණේ සිංහල මාධ්‍ය පවසන්නේ නැගෙනහිර වඩමාරච්චියේ විභාග මධ්‍යස්ථානයක රාජකාරි කළ පොලිස් නිලධාරින් හා පොන්නම්බලම් මන්ත්‍රීවරයා අතර බහින් බස් වීමක් සිදුවූ බවයි. එහිදී පොලිස් රාජකාරියට බාධා කළ චෝදනා යටතේ අත්අඩංගුවට ගත් TNPF කාන්තා සංවිධායකවරියක වන ජෙගදීස්වරී සත්ගුණදේවි හෙවත් අරුල්මදී සහ උදය සිවම් නමැති ක්‍රියාධරයා ජුනි හත් වැනිදා දක්වා රක්ෂිත බන්ධනාගාර ගතකර ඇත. ගජේන්ද්‍ර කුමාර් පොන්නම්බලම් මන්ත්‍රීවරයාට ද විදෙස් ගමන් තහනම් නියෝගයක් කිලිනොච්චි අධිකරණයෙන් ලබා ගැනීමට [06 ] දිනයේ සමත් වූ බව පොලිස් මාධ්‍ය ප්‍රකාශක නිහාල් තල්දුව පවසයි.
අදාළ සිද්ධිය සම්බන්ධයෙන් ප්‍රකාශයක් ලබා දෙන ලෙස ලියවිල්ලක් මන්ත්‍රීවරයාගේ කොළඹ “ගීතාංජලී“ නිවසට ඊයේ [06] පැමිණි කොල්ලුපිටිය පොලිසිය ලබා දුන්නත්, එය ප්‍රතික්ෂේප කළේ සිංහල බස කියවීමට ලියවීමට නොදන්නා තමන් එහි සඳහන් දේ තේරුම් ගත නොහැකි බැවින් යැයි සිය ටුවිටර් ගිණුමේ සටහනක් තබා තිබේ. පොලිසිය පවසන අයුරින් එහි සඳහන් වී ඇත්තේ වඩමරාච්චි සිද්ධිය ගැන ජුනි 08 වැනිදා මර්දන්කේනි පොලිසියට පැමිණ ප්‍රකාශයක් ලබා දෙන ලෙසයි. තම වරප්‍රසාද කඩවීම ගැන පාර්ලිමේන්තුවේ ප්‍රකාශයක් කිරීමෙන් අනතුරුව පොලිසියට වාර්තා කරන බවට මරුදන්කර්නි පොලිස් ස්ථානාධිපතිට දන්වා තිබියදී අද [07] උදෑසන ඔහුගේ කොළඹ නිවසට පැමිණි පොලිස් කණ්ඩායමක් මන්ත්‍රීවරයාව අත්අඩංගුවට ගෙන මරුදන්කර්නි පොලිසිය වෙත රැගෙන ගොස් ඇත.
“8 වැනිදා උදේ 10 ට මර්දන්කර්නි පොලිසියට ඇවිත් කට උත්තරයක් දෙනවා කියලා තියෙද්දී අද උදේ පොලිසිය ඇවිත් කරපු මේ අත්අඩංගුවට ගැනීමට කිසිම නෛතික පදනමක් නෑ,“යි දෙමළ ජාතික ජනතා පෙරමුණේ ප්‍රකාශක කනගරත්නම් සුගාෂ් පවසයි.
“පොලිස් පහර දීම හා මන්ත්‍රී වරප්‍රසාද කඩ කිරීම ගැන අද පාර්ලිමේන්තුවේදී ප්‍රකාශයක් කිරීම වලක්වන්නයි මේ නීති අත්අඩංගුවට ගැනීම කළේ. වරප්‍රසාද ප්‍රශ්නය පාර්ලිමේන්තුවේ දී මතු කළා නම් මේ ආණ්ඩුවට එරෙහිව රටතුලත්, ජාත්‍යන්තරවත් විශාල විරෝධය මතු වෙනවා.“
සිය මන්ත්‍රී වරප්‍රසාද පොලිසිය විසින් කඩ කර ඇති බවට කතානායක වජිර යාපා අබේවර්ධන වෙත ලිඛිත දැනුම් දීමක් ඊයේ [06 ] ලබා දුන් අතර සිද්ධිය ඇතිවූ ජුනි 02 වැනිදා මන්ත්‍රීවරයා විසින් මානව හිමිකම් කොමිසමේ යාපන කාර්යාලයට ද පැමිණිලිලක් කර තිබේ. පාර්ලිමේන්තු මන්ත්‍රීවරයා අත් අඩංගුවට ගන්නා බව පොලිසිය විසින් කතානායකවරයා දැනුවත් කර ඇත.
පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් අත්අඩංගුවට ගැනීම හෙළා දකිමින් පාර්ලිමේන්තුවේ විපක්ෂයේ ප්‍රධාන සංවිධායක ලක්ෂමන් කිරිඇල්ල මන්ත්‍රී ආරක්ෂකයන් නොමැතිව කටයුතු කරන ඔහු හඳුන්වා දුන්නේ ` සාමකාමී මන්ත්‍රීවරයෙක් ` ලෙසටයි.
මිනීමැරුම් සම්බන්ධයෙන් චෝදනා ලබන මන්ත්‍රීවරුන් පාර්ලිමෙන්තුවට පැමිණෙද්දී ඒ සම්බන්ධයෙන් පියවර නොගෙන ගජෙන්ද්‍රකුමාර් මන්ත්‍රීවරයා අත් අඩංගුවට ගැනීම නීතිය දෙයාකාරයකට ක්‍රියාත්මක වීමක් ලෙසින් දෙමළ ජාතික සන්ධානයේ හෙලා දැකීමට ලක්වී තිබේ.
ගජේන්ද්‍රකුමාර් පොන්නම්බලම්ට පොලිසිය දැක්කම එයාට සැකයක් ඇතිවෙන එක සාධාරණයි. මොකද, එයාගේ පියාව වෙඩි තියලා මරලා තියෙන්නේ පොලිසියේ නිලධාරීන් දෙන්නෙක් කියලා මේ සන්දේ ලීඩර් පත්තරේ කියනවා,” යි ශානක්‍යන් රාසපුත්‍රම් මන්ත්‍රීවරයා පාර්ලිමේන්තුවේදී පැවසීය.
TNPF එකට මෙහෙම කරන්නේ ඇයි?
රාජ්‍ය මර්දන හස්තය නිරන්තරයෙන්ම දිගු වන උතුරු නැගෙනහිර දෙමළ ජාතික ජනතා පෙරමුනේ නායකත්වය හා සාමාජිකත්වය කෙරෙහි දෙමළ ජනයා දෛනිකව මුහුණ දෙමින් සිටින දහසකුත් ගැටළු වෙනුවෙන් පෙනී සිටින ප්‍රධාන දේශපාලන පක්ෂයකි.
බලහත්කාරයෙන් ඉඩම් අත්පත් කර ගැනීම, සිංහල බෞද්ධකරණය හා ජනාවාස පිහිටුවීම, ඉන්දීය ට්‍රෝලර් යාත්‍රා මෙරට මුහුද ආක්‍රමණය කිරීම හා උතුරු නැගෙනහිර ප්‍රදේශ වල රජයේ හමුදා මිලටරිකරණයට එරෙහිවත්, බලහත්කාරයෙන් අතුරුදහන් කළවුන්ට යුක්තිය සාධාරණත්වය ඉටුකිරීමට බල කිරීම, 13 වැනි ව්‍යවස්ථා සංශෝධනය හරහා වන ඉන්දියානු මැදිහත් වීමට එරෙහිව ස්වයං නිර්ණය මත පදනම් වූ ෆෙඩරල් පාලන ව්‍යුහයක් වෙනුවෙන් පෙනී සිටීම, ත්‍රස්ත පනත අහෝසි කිරීම හා දෙමළ දේශපාලන සිරකරුවන්ගේ නිදහස, යුද අපරාධ ඇතළු අනෙකුත් මානව හිමිකම් කඩ කිරීම් වැනි කරුණු සම්බන්ධයෙන් එම පක්ෂය දිගින් දිගටම මැදිහත් වී තිබේ.
ගජේන්ද්‍ර කුමාර් පොන්නම්බලම් මන්ත්‍රීවරයා පාස්කු ප්‍රහාරයෙන් පසුව මුස්ලිම් ජනයාට එරෙහිව දියත් කෙරෙන රාජ්‍ය ප්‍රචණ්ඩත්වයට, කෝවිඩ් සමයේ මුස්ලිම් මල සිරුරු බලහත්කාරයෙන් පිළිස්සීමට, කම්කරු සටන් කඩාකප්පල් කිරීමේ ආණ්ඩුවේ සැලසුම්වලට මෙන්ම සිංහල තරුණයන්ගේ ගාලු මුවදොර අරගලයට හා දකුණේ ශිෂ්‍ය ව්‍යාපාරයට එරෙහිව ආණ්ඩුව දියත් කළ සෑම මර්දන පිලිවෙතකටම දැඩි ලෙස හෙළා දකිමින් පාර්ලිමේන්තුවේත්, ඉන් පිටත දීත් හඬ නැගීය.
දෙමළ ජාතික සන්ධානයෙන් බිඳුණු පසුව දෙමළ ජාතික ජනතා පෙරමුණ ලෙස ක්‍රියාත්මක නව දේශපාලන පක්ෂය කෙටි කලක් තුල උතුරු නැගෙනහිර දෙමළ ජනයාගේ විශ්වාසය දිනා ගැනීමට සමත් විය. ඒ අනුව අද වන විට එම ප්‍රදේශයේ සැලකිය යුතු ආණ්ඩු විරෝධී බලවේගය බවට ගජේන්ද්‍ර කුමාර් පොන්නම්බලම්ගේ නායකත්වයෙන් යුත් දෙමළ ජාතික ජනතා පෙරමුණය පත්ව ඇත.
“සිවිල් ඇඳුමින් සැරසුණු පොලිස් නිලධාරියෙක් පාර්ලිමේන්තු මන්ත්‍රී ගජේන්ද්‍ර කුමාර්ට පහර දී තුවක්කු එල්ල කිරීම සුළුවෙන් තකන්න බැහැ. ඔහුගේ පියා කුමාර් පොන්නම්බලම් මහ දවල් කොළඹදී වෙඩි තබා මරා දැමුවා. මේ වෙනකම් ඒ ගැන කිසිම පරීක්ෂණයක් කරලා නැහැ,“ යැයි හිටපු පාර්ලිමේන්තු මන්ත්‍රී සී.ශ්‍රීනේසන් පවසයි.
“ජෝශප් පරරාජසිංහම්, රවී රාජ්, චන්ද්‍ර නේරු පාර්ලිමේන්තු මන්ත්‍රීවරුන්ට වෙඩි තබා මරා දැම්මේ මේ සිවිල් ඇඳුමෙන් ආපු අය තමයි.“
1971 කැරලි කරුවන්ට, ජුලි වර්ජකයන්ට, 80 සත්‍යග්‍රහ නඩුවේ චුදිතයන්ට, අන්තර් විශ්ව විද්‍යාල ශිෂ්‍ය බලමණ්ඩලයේ ශිෂ්‍ය ක්‍රියාකාරීන් ඇතුළු දකුණේ රැඩිකල් තරුණ කොටස් වෙත නොමිලේ නීති සහාය ලබා දුන් කුමාර් පොන්නම්බලම් චන්ද්‍රිකා කුමාරතුංග ජනාධිපති පාලන සමයේදී මහ මග මරා දැමුනේ උතුරේ තරුණයන්ගේ අරගලයට විවෘතව සිය සහාය පළ කිරීම නිසාවෙනි.
TNPF ප්‍රකාශක නීතිඥ කනගරත්නම් සුගාෂ් පවසන්නේ පොලිසිය විසින් ගජෙන්ද්‍රකුමර් පොන්නම්බලම් අත් අඩංගුවට ගැනීමේ නිනිතිවිරෝධි ක්‍රියාවට එරෙහිව නීතිමය පියවර ගන්න බවයි.
මීළඟ නඩු විභාගය සැප්තැම්බර් 13 දාට නියමිතව ඇත.
Facebook Comments
