රට තුල දේවස්ථාන හා හෝටල් ඉලක්ක කරගෙන සිදු කරන ලද මාරන්තික ප්‍රහාර මාලාව ගැන බුද්ධි අංශ විසින් තොරතුරු ලබා නොදීම සම්බන්ධයෙන් පරීක්ෂණයක් පැවැත්වීමට අගමැතිවරයා පියවර ගැනීමට යයි.
එල්ල විය හැක් ප්‍රහාර සම්බන්ධව බුද්ධි අංශ කලින් තොරතුරු ලබා දී තිබුණ ද ඒ පිළිබඳව තමන් හා අමාත්‍යවරුන් දැනුවත් කර නොතිබුණ බව අගමැති රනිල් වික්‍රමසිංහ 21 ඉරිදා විශේෂ ප්‍රකාශයක් සිදු කරමින් කියා සිටියේය.
“විශේෂයෙන් බරපතල කාරණයක් වන්නේ මේ ප්‍රහාර පිළිබඳව යම් තොරතුරු කළින් ලැබී තිබුණද ඒ පිළිබඳව ප්‍රමාණවත් අවධානයක් යොමු නොකිරීමයි. මේ පිළිබඳව තවුදුරටත් කරුණු පරික්ෂා කල බැලිය යුතුය. මා ඇතුලු ඇමැතිවරු අමාත්‍යවරු ඒ ගැන දැනුවත් කර නොතිබීමත් ඊට අදාළ කාරණයක්.” යැයි අගමැතිවරයා පැවසීය.
රට තුළ යම් ත්‍රස්තවදී ක්‍රියාවක් සිදු කර රට අස්ථාවර කිරීමට යම් කණ්ඩායමක් උත්සහ ගන්නේ නම් දේශීය හා විදේශීය සහයෝගය මත එය මැඩපැවැත්වීමට කටයුතු කරන බව ද අගමැතිවරයා සඳහන් කළේය.
අසත්‍ය ප්‍රචාර හමුවේ මහජනතාව නීතිය අතට ගෙන කටයුතු කළහොත් සිදු වන්නේ “ත්‍රස්තවාදීන්ගේ අරමුණ ඉටුවීම පමණක්” බව ද අගමැතිවරයා වැඩි දුරටත් අවධාරණය කරන ලදී.
පාස්කු ඉරිදා සිදුවු ප්‍රහාර මාලාව සම්බන්ධව 22 සඳුදා උදෑසන වන විට සැකකරුවන් 24 දෙනෙකු අත්අඩංගුවට ගන්නා ලද බව පොලිස් මාධ්‍ය ප්‍රකාශක කාර්යාලය නිවේදනය කළේය.
Facebook Comments
