ජාතික සමගිය ඇති කිරිම උදෙසා අතීතය අමතක කර සිංහල හා දෙමළ දෙපාර්ශවයම නිශ්ශබ්ද වී සිටිය යුතු බව උතුරු පළාත් සභාවේ හිටපු මන්ත්‍රීවරයෙක් ඉල්ලා සිටී.
පසුගිය දා උතුරේ පැවති මුල්ලිවයික්කාල් සමරුව සම්බන්ධව ප්‍රකාශයක් ලබා දීමට ත්‍රස්ත විමර්ශන ඒකකයට පැමිණි එම්.කේ සිවාජිලිංගම් හිටපු මන්ත්‍රීවරයා මේ බව කියා සිටියේය.
“උතුරේ මහ ඇමැතිතුමා විග්නේෂ්වරන් එක එක කතා කියනවා. මේක සිංහල දෙමළ රටක් නෙමෙයි කියලා කියනවා. ඇයි මේ යුද්ධයක් ඉවර වුන රටක අපිට සමගියෙන් ඉන්න පුලුවන් නේද”මාධ්‍යවේදියා ප්‍රශ්න කළේය.
හිටපු මහ ඇමැති විග්නේෂ්වරන් එසේ පිළිතුරු දී ඇත්තේ දකුණේ දේශපාලකයන් කරන ලද කතාවට බව පෙන්වා දුන් හිටපු මන්ත්‍රී සිවාජිලිංගම් දෙපාර්ශවයම එකිනෙකාට පිළිතුරු දීම නවතා නිශ්ශබ්ද වී සිටිම හරහා ජාතික සමගිය ඇති කිරීමට පහසු වන බවට විශ්වාසය පළ කළේය.
“දෙපැත්තම නිශ්ශබ්ද වෙන්න ඕනෙ. පරණ කතා කතා කරන්නේ නැතුව නිශ්ශබ්ද වෙන්න ඕනේ ජාතික සමගිය ඇති කරන්න. සිංහල, දෙමළ,මුස්ලිම්, හැම මිනිස්සුන්ගේම බලාපොරොත්තුව ජාතික සමගිය ඇති වෙන්න ඕන කියන එක. සිංහල මිනිස්සු මොනවා හරි කියනවා නම් දෙමළ මිනිස්සු දෙමළ මිනිස්සු මොනව හරි කියනවා නම් සිංහල මිනිස්සු පිළිතුරු දෙනවා. මේකෙන් කලබල ඇති වෙනවා.”
ඉදිරිය ගැන සිතා ජාතික සමගිය උදා කිරීමට දෙපාර්ශවයම අනවශ්‍ය කතා නතර කළ යුතු බව හිටපු මන්ත්‍රී එම්.කේ සිවාජිලංගම් වැඩි දුරටත් අවධාරණය කර ඇත.
Facebook Comments
