ජනපතිගේ ඉන්දියානු හා ජපන් සංචාරය අවසන් වූවායින් පසු විද්‍යානුකූල ලෙස අමාත්‍ය මණ්ඩල සංශෝධනයක් සිදු කරනු ලබන බවට එක්සත් ජනතා නිදහස් සන්ධානයේ මහලේකම්වරයා පවසයි.
පළාත් පාලන මැතිවරණයේ යහපාලන රජයේ ප්‍රධාන පක්ෂ දෙක ලද පරාජයෙන් පසු කැබිනට් පෙබරවාරි 25 වනදා එක්සත් ජාතික පෙරමුණේ කැබිනට් ඇමැති ධුර වල සංශෝධනයක් සිදු කරනු ලැබීය.
ඔළු ගෙඩි පමණක් මාරු කිරීමෙන් අමාත්‍ය මණ්ඩල මාරුව සිදු නොකොට විද්‍යානුකූල පදනමක් මත ඇමැති මාරුව සිදු කිරීමට ජනාධිපතිවරයා තීරණය කොට ඇතැයි ද ධීවර අමාත්‍ය හා මහවැලි රාජ්‍ය අමාත්‍ය මහින්ද අමරවීර පෙන්වා දෙයි.
සමාජ ජාලා අවහිරය
මේ අතර ඉදිරියේදී සමාජ ජාලා වෙබ් අඩවි සඳහා බරපතළ තීන්දුවක් ගන්නා බව ධීවර අමාත්‍ය හා මහවැලි රාජ්‍ය අමාත්‍ය මහින්ද අමරවීර කියා සිටියේ 11 ඉරිදා ශ්‍රී ලංකා මහවැලි අධිකාරිය මගින් සංවිධානය කොට තිබූ මොරගහකන්ද ජලාශයට අනුබද්ධ ඉහළ ඇළ හැර ඇළ ව්‍යාපෘතියේ නිරීක්ෂණ චාරිකාවකට එක් වෙමිනි.
රජය විසින් ක්‍රියාත්මක කර ඇති සමාජ ජාලා වෙබ් අඩවි තාවකාලිකව අවහිර කිරීම පිළිබඳව මාධ්‍යවේදීන් ඇසූ ප්‍රශ්නයකට පිළිතුරු ලබාදෙමින් ඔහු මේ බව කියා සිටි අතර පාර්ශ්ව දෙකකින් ඉල්ලීම් පවතින බවත්, එක් පාර්ශ්වයක් සම්පූර්ණයෙන්ම මෙම සමාජ වෙබ් අඩවි තහනම් කරන ලෙසත් අනෙක් පාර්ශවය පාලනයක් කරන ලෙසත් ඉල්ලා ඇති බව ද කියා සිටියේය.
සමාජ ජාලා වෙබ් අඩවි චීන රටේ තහනම් කොට ඇති බවද පෙන්වා දුන් එක්සත් ජනතා නිදහස් සන්ධානයේ මහලේකම් මහින්ද අමරවීර ලංකාව තුළ බොහෝ දුරට නීති පැනවීමට හැකි වන පරිදි සමාජ ජාලා වෙබ් අඩවි ඉදිරියට ක්‍රියාත්මක කිරීම සිදුවන බවද අවධාරණය කළේය.
Facebook Comments
