දෙමළ භාෂවෙන් ජාතික ගීය ගායනා කිරීම හරහා කිසිවෙකුට වරදක් නොවන බව ආණ්ඩු පාක්ෂික වාමාංශික අමාත්‍යවරයෙකු පෙන්වා දී තිබේ.
ඉන් සිදුවන්නේ දෙමළ ජනයාගේ සිත් තුළ කැමැත්තක් ඇති වීම බව පවසන රාජ්‍ය අමාත්‍ය වාසුදේව නානායක්කාර එසේ ඔවුන්ගේ සිත් තුළ කැමැත්ත ඇති කිරීම හොඳ දෙයක් බවත් එයින් ඔවුන්ටත් ජාතිය පිළිබඳ හැගීමක් ඇති වන බවයි අවධාරණය කරන්නේ.
පසුගිය රජය විසින් ජාතික ගීය දෙමළින් ගායනා කිරීම ඉඩ සැලැස්වීම ඉතා යහපත් දෙයක් බවට රාජ්‍ය අමාත්‍යවරයා ඇහැළියගොඩ පැවති ජන හමුවක දී ප්‍රකාශ කර ඇත.
“ගිය ආණ්ඩුව ජාතික නිදහස් දින උත්සවයේදී අලුත් දෙයක් ආරම්භ කළා. ඒ තමයි ආරම්භයේදී සිංහලෙන් ජාතික ගීයත් උත්සවය අවසානයේදී දෙමළෙන් ජාතික ගීය වාදනය කිරීමට පහුගිය ආණ්ඩුව කටයුතු කළා. ඒක නරක දෙයක් නෙමෙයි ඒකෙන් කාටත් වරදක් වෙන්නෙ නෑ.”
කෙසේ වෙතත් වාසුදේව නානායක්කාර අමාත්‍යවරයාද සිටින වත්මන් රජය ඉදිරියේදී පැවැත්වෙන ජාතික නිදහස් දින උත්සවයේදී ජාතික ගීය සිංහලෙන් පමණක් ගායනා කිරීමට තීරණය කර ඇති බවට මාධ්‍ය වාර්තා පළ වී තිබුනි.
දෙමළ භාෂාවෙන් ජාතික ගීය ගායනා කිරිමේ අයිතිය ව්‍යවස්ථාවෙන්ම ලබා දී ඇති බව පෙන්වා දෙන රාජ්‍ය අමාත්‍යවරයා එය දෙමළින් ගායනා කිරීමට ඉඩ ලබා නොදුනේ කොටි සංවිධානයේ නායක වෙලුපිල්ලේ ප්‍රභාකරන් බව වැඩි දුරටත් කියා සිටියේය.
Facebook Comments
