පොලිසියට, උසාවියට හා බන්ධනාගාරයට මඟ හරිමින් සිටි හිටපු සුව ඇමැතිවරයා අධිකරණයෙන් ඇප ලබා සිටී.
සුදු වෑන් පැහැර ගැනීම් සම්බන්ධව මාධ්‍ය හමුවක් පවත්වා ජනාධිපති අපේක්ෂයෙකු හට අපහාස කළ බවට චෝදනා එල්ල වී සිටින හිටපු අමාත්‍ය රාජිත සේනාරත්න රුපියල් ලක්ෂ පහ බැගින් වූ ශරීර ඇප දෙකක් මත මුදා හැරීමට කොළඹ ප්‍රධාන මහේස්ත්‍රාත් ලංකා ජයරත්න නියෝග කළාය.
නඩුව කැඳවු අවස්ථාවේදී නියෝජ්‍ය සොලිසිටර් ජෙනරාල් දිලීප පිරිස්, රාජිත සේනාරත්න මන්ත්‍රීවරයාට ඇප ලබා දීම සම්බන්ධයෙන් දැඩි විරෝධය පළ කළේය.
ඉකුත් 24 වනදා අත්අඩංගුවට ගැනීම සඳහා වරෙන්තු නිකුත් කිරීමෙන් පසුව සැකකාර රාජිත සේනාරත්න පැය 46 ට ආසන්න කාලයක් සැඟව සිට පසුව නාරාහේන්පිට ලංකා පෞද්ගලික රෝහලෙන් මතුවූ බව ඔහු අධිකරණයට පැවසීය.
අව් කණ්ණාඩියක් හා හිස්වැසුමක් පැළඳගෙන වෙස් වලාගෙන සැකකාර රාජිත සේනාරත්න ලංකා රෝහල වෙත ගොස් තිබෙන බව පැවසු රජයේ නියෝජ්‍ය සොලිසිටර් ජනරාල්වරයා ඉන් අනතුරුව ඔහු සෘජුවම හෘද ශල්‍ය ඒකකයේ පවතින දැඩි චිකිත්සක අංශයට ඇතුළත් කර ඇති බවයි කියා සිටියේ.
හිටපු අමාත්‍යවරයා හට කිසිඳු රෝගී තත්ත්වයක් නොමැති බව පෙන්වා දුන් නියෝජ්‍ය සොලිසිටර් ජෙනරාල් දිලීප පිරිස් ලංකා රෝහලේ වෛද්‍යවරු හට ද චෝදනා කළේය.
“ස්වාමීනී, ඉන් පසු අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් සැකකරු අත්අඩංගුවට ගැනීම සඳහා ලංකා පෞද්ගලික රෝහල වෙත ගියා. මෙම අවස්ථාවේ එහි සිටි උමාශංකර් නමැති වෛද්‍යවරයෙක් සැකකරු අසළට යාමට එම නිලධාරීන්ට අවසර ලබාදුන්නේ නැහැ. ප්‍රකාශයක් ලබා ගැනීමට පවා අවස්ථාවක් දුන්නේ නෑ. කිසිදු රෝගී තත්ත්වයක් නැති පුද්ගලයකු මේ ආකාරයෙන් දැඩි සත්කාර ඒකකයට ඇතුළත් කර ඔහුව අත්අඩංගුවට පත්වීම වැළැක්වීමට ලංකා රෝහලේ වෛද්‍යවරු කටයුතු කර තිබෙන බව මා සඳහන් කර සිටිනවා,”
මෙම ප්‍රශ්නගත මාධ්‍ය සාකච්ඡාව සම්බන්ධයෙන් අත්අඩංගුවට ගෙන රිමාන්ඩ් භාරයට පත් කර සිටින සැකකරුවන් දෙදෙනාට මුදල් ලබාදී තිබෙන්නේ මොහොමඩ් රූමි මොහොමඩ් හසීම් නැමැත්තෙකු වන අතර එම පුද්ගලයා ද මේ වන විට අතුරුදන්ව ඇති බව හෙතෙම අධිකරණය හමුවේ කියා සිටියේය.
එබැවින් මොහොමඩ් රූමි නැමැත්තා අත්අඩංගුවට ගැනීම සඳහා වරෙන්තුවක් නිකුත් කරන ලෙසත්, ඔහුගේ විදේශ ගමන් තහනම් කිරීමේ නියෝගයක් නිකුත් කරන ලෙසත් ඔහු අධිකරණයෙන් ඉල්ලා සිටි අතර මෙම තත්වය හමුවේ සැකකාර රාජිත සේනාරත්නට ඇප ලබා දුනහොත් ඉන් පරීක්ෂණ කටයුතුවලට බාධා සිදුවිය හැකි බවට ඔහු විශ්වාසය පළ කරන ලදී.
එහෙත් එම චෝදනා ප්‍රතික්ෂේප කරමින් කරුණු දැක්වූ සැකකාර රාජිත සේනාරත්න වෙනුවෙන් පෙනී සිටි ජනාධිපති නීතිඥ වසන්ත නවරත්න බණ්ඩාර සඳහන් කළේ ඉකුත් 24 වන දා වරෙන්තුව නිකුත් කිරීමෙන් පසුව සැකකාර රාජිත සේනාරත්න කොළඹින් බැහැර ප්‍රදේශයක සිට ඉකුත් 26 වනදා අධිකරණය වෙත ඉදිරිපත් වීමට පැමිණි බවයි.
එසේ පැමිණි අවස්ථාවේ ඔහු හදිසියේ රෝගාතුර වීම නිසා කොළඹ ලංකා පෞද්ගලික රෝහලට ඇතුළත් කළ බව ඔහු සඳහන් කළේය.
බන්ධනාගාර නිලධාරීන් කණ්ඩායමක් රෝහලට කඩාවැදී තම සේවාදායකයා බන්ධනාගාර රෝහල වෙත රැගෙන යාමට තැත් කර ඇති බවද මෙහිදී ජනාධිපති නීතිඥවරයා චෝදනා කළේය.
තම සේවාදායකයාට පොලිසිය විසින් එල්ල කරනු ලැබ තිබෙන චෝදනා ඇප දිය හැකි වැරදි බැවින් රාජිත සේනාරත්න ඇප මත මුදා හරින ලෙස ද රාජිත සේනාරත්න මන්ත්‍රීවරයාගේ නීතිඥවරයා අධිකරණයෙන් ඉල්ලා සිටියේය.
මෙම සිද්ධියට සම්බන්ධ තවත් සැකකරුවන් දෙදෙනෙකු අපරාධ පරීක්ෂක්ෂණ දෙපාර්තමේන්තුව විසින් අත්අඩංගුවට ගන්නා ලදුව අධිකරණයට ඉදිරිපත් කර රක්ෂිත බන්ධනාගාර ගත කර ඇති මහේස්ත්‍රාත්වරිය සිය තීරණය ප්‍රකාශයට පත් කරමින් සඳහන් කළේය.
ප්‍රශ්නගත මාධ්‍ය සාකච්ඡාවේදී ඔවුන් විසින් ප්‍රකාශ කරන ලද මිනීමැරුම්, පැහැරගෙන යාම් හා කොල්ලකෑම් සම්බන්ධයෙන් විමර්ශන කරන බව මුලින්ම අපරාධ පරීක්ෂණ දෙපාර්තමේන්තුව අධිකරණය හමුවේ සඳහන් කර තිබූ බව මහෙස්ත්‍රාත්වරිය සිහිපත් කළාය.
එහෙත් ඉකුත් නඩු දිනයේදී මිනීමැරුම් චෝදනා සම්බන්ධයෙන් අදාළ සැකකරුවන් දෙදෙනාට එරෙහිව විමර්ශන සිදු නොකරන බවට රජයේ නියෝජ්‍ය සොලිස්ටර් ජනරාල්වරයා විසින් දැනුම් දෙන ලද බවද පෙන්වාදුන් කොළඹ ප්‍රධාන මහෙස්ත්‍රාත් ලංකා ජයරත්න, එම තත්වය මත සැකකාර රාජිත සේනාරත්න මෙම නඩු කටයුත්තේ සැකකරුවකු ලෙස නම් කිරීම තුළ පරස්පරතාවක් දක්නට තිබෙන බව සඳහන් කළාය.
එමෙන්ම මෙහි සැකකරුවකු ලෙස රාජිත සේනාරත්න නම් කිරීමේ ක්‍රියාපටිපාටිය තුළ අවිධිමත් භාවයක් දක්නට තිබෙන බවද මහෙස්ත්‍රාත්වරිය වැඩි දුරටත් පෙන්වා දුන්නාය.
මෙම සිද්ධිය සම්බන්ධයෙන් රිමාන්ඩ් භාරයේ පසුවන සැකකරුවන් දෙදෙනාට අදාළ මාධ්‍ය සාකච්ඡාව පැවැත්වීම සඳහා මුදල් ලබා දුන් බවට චෝදනා එල්ල වී තිබෙන මොහොමඩ් රූමි මොහොමඩ් හසීම් නමැත්තා අත්අඩංගුවට ගැනීම සඳහා වරෙන්තුවක් නිකුත් කරන ලෙස කරන ලද ඉල්ලීමක් ප්‍රතික්ෂේප කළ මහෙස්ත්‍රාත්වරිය, ඔහුගේ විදේශ ගමන් තහනම් කිරීමට නියෝග කරන බවද සඳහන් කළාය.
Facebook Comments
