දකුණේ සිංහල නායකත්වයට දෙමළ අපේක්ෂා ඉටු කිරීමට මේ තාක් නොහැකි වී ඇති හෙයින් ඉදිරි ජනාධිපතිවරණයේ දී දෙමළ පොදු අපේක්ෂකයකු ඉදිරිපත් කිරීමට උතුරේ එකඟතාවක් පළ වී තිබේ.
දෙමළ දේශපාලන පක්ෂ හතක් සහ දෙමළ සිවිල් සමාජ ක්‍රියාකාරීන් හත් දෙනෙකු “දෙමළ ජාතික පොදු රාමුව ” නමින් ජුලි 22 වැනිදා යාපනයේ දී ගිවිසුම් අත්සන් කර ඇත්තේ මුල්ලිවයික්කාල් සංහාරයට පසු ගෙවි ගිය වසර 15 කාලය තුළ ශ්‍රී ලංකාවේ ජාතික ප්‍රශ්නයට දේශපාලන විසඳුමක් සහ දෙමළ ජනතාවට සමාන අයිතිවාසිකම් ලබා දීම සඳහා මෙතෙක් පැවති ආණ්ඩු කිසිදු පියවරක් ගෙන නොමැති නිසා ඉදිරි ජනාධිපතිවරණයේදි දෙමළ පොදු අපේක්ෂකයකු ඉදිරිපත් කිරීමට තීරණය කරමිනි.
තමිල් ඊළාම් විමුක්ති සංවිධානය (ටෙලෝ) නියෝජනය කරමින් එහි නායක පාර්ලිමේන්තු මන්ත්‍රී සෙල්වම් අඩෛක්කලනාදන්, ප්ලොට් නායක පාර්ලිමේන්තු මන්ත්‍රී ධර්මලිංගම් සිද්ධාර්ථන්, EPRLF නායක හිටපු මන්ත්‍රී සුරේෂ් ප්‍රේමචන්ද්‍රන්, දෙමළ ජනතා ජාතික සන්ධානයේ නායක පාර්ලිමේන්තු මන්ත්‍රී සී.වී විග්නේෂ්වරන්, දෙමළ ජාතික පක්ෂයේ නායක හිටපු පාර්ලිමේන්තු මන්ත්‍රී නීතිඥ නල්ලතම්බි ශ්‍රී කාන්තා, දෙමළ ජාතික හරිත ව්‍යාපාරයේ සභාපති සහ උතුරු පළාත් සභාවේ හිටපු කෘෂිකර්ම අමාත්‍ය පොන්නුතුරෙයි අයින්ගරනේෂන් සහ ප්‍රජාතන්ත්‍රවාදී සටන්කාමින්ගේ පක්ෂයේ නායක සී වේන්දන් යාපනයේ තන්දෙයි සිල්වා ශාලාවේදි එම ගිවිසුමට දේශපාලන පක්ෂ නියෝජනය කරමින් අත්සන් කර තිබුනි.
පළාත් බද වාර්තාකරුවන් පවසන්නේ දෙමළ සිවිල් සමාජය නියෝජනය කරමින් ගිවිසුමට අත්සන් තැබු ක්‍රීයාකාරීන් හත් දෙනා වන්නේ, යාපනය විශ්ව විද්‍යාලයේ දේශපාලන අංශයේ මහාචාර්ය කේ.ටී ගනේෂලිංගම්, සමාජවිද්‍යා පර්යේෂණ මධ්‍යස්ථානයේ නීතිඥ සී.ඒ ජෝතිලිංගම්, දේශපාලන විචාරකයන් වන එම්. නිලාන්දන් හා ඒ ජදීන්ද්‍රා, සහ දේශපාලන සහ සමාජ ක්‍රියාකාරීන් වන ටී. වසන්තරාජා හා සෙල්වින් ඉරේනියස්, රාජලිංගම් විග්නේෂ්වරන්ය.
කොන්දේසි නමයක් යටතේ අත්සන් තැබු එම ගිවිසුමෙහි සදහන්ව ඇත්තේ “දෙමළ ජාතික පොදු රාමුව” පොදු අපේක්ෂකයකු ලෙස තෝරා පත් කර ගන්නා අපේක්ෂකයා නම් කිරීමෙන් පසු ඔහු සහ ඔහු ජනාධිපතිවරණයට ඉදිරිපත් වන පිලිගත් දේශපාලන පක්ෂය වෙන වෙනම අනිකුත් පක්ෂ හය සහ සිවිල් සමාජ ක්‍රියාකාරීන් හත් දෙනා සමග තනි තනිව ගිවිසුම් අත්සන් කළ යුතු බවයි.
දෙමළ ජාතික පක්ෂයේ ලේකම් මෙන්ම හිටපු පාර්ලිමේන්තු මන්ත්‍රී එම්. කේ. සිවාජිලිංගම් ද යාපනයේ මාධ්‍ය සමාජයේ දී ජුනි 11 වැනිදා මාධ්‍ය හමුවක් පවත්වමින් අවධාරණය කර තිබුනේ පොදු අපේක්ෂකයෙකු ඉදිරිපත් නොවුනහොත් අවසාන වශයෙන් තමන් හෝ ඒ වෙනුවෙන් ඉදිරිපත් වීමට පසුබට නොවන බවයි.
විරෝධය
ඉදිරි ජනාධිපතිවරණයේ ප්‍රතිපලය දැනටමත් තීරණය වී අවසන් බව පවසන ඉලංගෙයි තමිල් අරසු කච්චි මන්ත්‍රී, ජනාධිපති නීතිඥ එම්. ඒ සුමන්තිරන් මන්ත්‍රීවරයා එහි ගණන් මිමී පෙන්වීමට ඇති අකමැත්ත ප්‍රකාශ කරමින්, ඊලාම් දෙමළ ජනතාවගේ ස්වයංතීරණ අයිතිය, පොදුජන ස්ථාවරය සහ ජනතාවගේ ඡන්දය මැයෙන් ජුනි 9 වැනිදා යාපනය තන්දෙයි සෙල්වා ශාලාවේ පැවති සාකච්ඡා සභාවක දී සිය පක්ෂ සාමාජිකයන්ට අවධාරණය කර තිබුනේ දෙමළ පොදු අපේක්ෂකයකු ඉදිරිපත් කළහොත් ඊට එරෙහිව මැතිවරණ ප්‍රචාරක කටයුතු සිදු කළ යුතු බවයි.
“මොන තීරණය එනවද කියලා බිත්තියේ ලියලා ඉවරයි. සංඛ්‍යාලේඛන පෙන්වීමට කැමැති නැහැ. දෙමළ ජාතික ස්ථාවරයේ සිටින සියලුම ජනතාව ඡන්දය ප්‍රකාශ කළත් එය සියයට 20ට ළඟා වන්නේ නැහැ. දෙමළ පොදු අපේක්ෂකයෙක් පත් කළොත් අපි ඔහුට එරෙහිව ප්‍රචාරක කටයුතු කළ යුතුයි. ඔහු අන්ත පරාජයකට පත් වෙනකොට මේ අපේ දේශපාලන ස්ථාවරය නොමෙයි, කාගේ හෝ විහිළු වෙන වැඩක් කියලා කියන්න පුළුවන් වෙන්න ඕන. මම මේක කියන්නේ ප්‍රධාන ධාරාවේ දෙමළ පක්ෂයේ කෙනෙක් විදියට. මම අපේ පක්ෂයේ අයටත් කියනවා. ජනතාව අතර ප්‍රබල ලෙස ප්‍රචාරක කටයුතු කිරීමේ විශාල වගකීමක් අපට තිබෙනවා.”
වර්ජනය
ඒකීය රාජ්‍යයක් තුළ රටේ බහුතර ජන වර්ගය වෙනුවෙන් පමණක් ශ්‍රී ලංකාවේ රාජ්‍ය නායකයා කටයුතු කරන බව පෙන්වා දෙන පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්ගේ නායකත්වය හා පාර්ලිමේන්තු මන්ත්‍රී සෙල්වරාජා ගජේන්ද්‍රන්ගේ ලේකම් ධුරය යටතේ ක්‍රියාත්මක වන, දෙමළ ජාතික ජනතා පෙරමුණ (TNPF) ජනාධිපතිවරණය වර්ජනය කරන මෙන් උතුරු නැගෙනහිර ජනතාවගෙන් ඉල්ලා සිටිමින් දැනටමත් ප්‍රචාරක කටයුතු ආරම්භ කර තිබේ.
2024 ජනාධිපතිවරණයේ ඡන්ද විමසීම පැවැත්වීමට නියමිතව ඇත්තේ සැප්තැම්බර් 17 වැනිදාත්, ඔක්තෝබර් 16 වැනිදාත් අතර දිනයක බව මැතිවරණ කොමිෂන් සභාවේ සභාපති ආර්.එම්.ඒ.එල්.රත්නායක ජුලි 16 වැනිදා මාධ්‍ය හමුවක් පවත්වමින් ප්‍රකාශ කර තිබුනි.
Facebook Comments
