ආගමේ නාමයෙන් ත්‍රස්තවාදය ගැන කතා කරන විට, මුස්ලිම් හා ඉස්ලාම් ත්‍රස්තවාදය යන වචන පාර්ලිමේන්තුව තුළ භාවිත කිරීම ඉවත් කළ යුතු බවට දිගාමඩුල්ල දිස්ත්‍රික්කය නියෝජනය කරන ජනතා නියෝජිතයක් ඉල්ලා තිබේ.
සමස්ත ලංකා මහජන කොංග්‍රසයේ දිගාමඩුල්ල දිස්ත්‍රික් පාර්ලිමේන්තු මන්ත්‍රී නීතිඥ එස්. එම්. එම්. මුෂාරෆ් ජුලි 12 වැනිදා පාර්ලිමේන්තුව අමතමින් සදහන් කළේ එදින පාර්ලිමේන්තුවේ එම යෙදුම වැඩි වශයෙන් භාවිත කරන ආකාරය තමන් නිරීක්ෂණය කළ බවයි.
පාස්කු ප්‍රහාරය සම්බන්ධයෙන් මුස්ලිම් ත්‍රස්තවාදයක් ගැන කතාකරන කිසිවකුත් මුස්ලිම්වරුන්ට එරෙහිව ප්‍රචණ්ඩත්වය මුදා හැරීම සිංහල ත්‍රස්තවාදයක් ලෙස හඳුන්වන්නේ නැත්තේ ඇයිදැයි මන්ත්‍රීවරයා පාර්ලිමේන්තුවෙන් ප්‍රශ්න කළේය.
“ආගමේ නාමයෙන් ත්‍රස්තවාදය ගැන කතා කරන සෑම අවස්ථාවකම, අද පාර්ලිමේන්තුවේ කතා කරන බොහෝ දෙනා මුස්ලිම් ත්‍රස්තවාදය පිළිබද වැඩියෙන් කතා කළ බව මම නිරීක්ෂණය කළා. ඉස්සෙල්ලම මේ පාර්ලිමේන්තුව වගේ, මහ සභාවලින් ඉස්ලාම් ත්‍රස්තවාදය, මුස්ලිම් ත්‍රස්තවාදය කියන වචන ඉවත් කරන්න ඕන.”
මුස්ලිම් ත්‍රස්තවාදය යන යෙදුමට එරෙහිව තමන් සාමකාමී අරගලයක යෙදී සිටින බව පවසන ජනතා නියෝජිතයා එහිදී අවධාරණය කළේ ලෝකයේ රටවල් දේශපාලනික අවශ්‍යතා වෙනුවෙන් මුස්ලිම් ත්‍රස්තවාදය කියන වචනය භාවිත කර ඔවුන් ඉස්ලාම් ආගමට විරුද්ධව ක්‍රියා කරනවා විනා මුස්ලිම්වරුන් ත්‍රස්තවාදීන් නොවන බවයි.
“අද ත්‍රස්තවාදය කියන්නේ, ඒක කුමන්ත්‍රණයක්. අද අපි මුස්ලිම් ත්‍රස්තවාදය යන යෙදුමට එරෙහිව සාමකාමි අරගලයක නිරතව සිටිිනවා. දෙවන ලෝක යුද්ධය තෙක් මුස්ලිම්වරු මේ ලෝකයේ ත්‍රස්තවාදීන් නෙමෙයි. පලස්තීනයේ යුදෙව්වන් පදිංචි කර ඔවුන්ට සරණාගතභාවය ලබා දීමට පලස්තීනයේ මුස්ලිම් ජනතාව බාධාවක් වන නිසා මුස්ලිම්වරුන් ලොවටම ත්‍රස්තවාදීන් ලෙස හුවා දක්වමින් පලස්තීනය දෙකඩ කළ හැකි දේශපාලන කුමන්ත්‍රණයක් තුළ ඉස්ලාමීය ෆෝබියා (භීතිකාව) කියන එක නිර්මාණය උනා. ඊට පස්සේ හැම රටකම දේශපාලනික වශයෙන් යමක් කළ යුතු නම් ඉස්ලාමීය ෆෝබියාව දාලා, මුස්ලිම් ත්‍රස්තවාදය කියන වචනය භාවිත කරලා එයාලා ඉස්ලාම් ආගමට විරුද්ධව ක්‍රියා කරනවා මිසක් මුස්ලිම්වරුන් ත්‍රස්තවාදීන් නෙමෙයි.”
2019 අප්‍රේල් මස 21 වන දින ශ්‍රී ලංකාවේ එල්ල වු පාස්කු බෝම්බ ප්‍රහාර මාලාව පිටුපසද ජාතික, ජාත්‍යන්තර හා දේශපාලන කුමන්ත්‍රණයක් පවතින බවට බොහෝ අධ්‍යයනවලින් කියැවෙන බවත් ඔහු සදහන් කළේය.
“ඒ නිසා පාස්කු ප්‍රහාරයට මුල්තැන දීලා මුස්ලිම් ත්‍රස්තවාදය ගැන අපි කතා කරනවා. සියලුම වාර්තා පවසන්නේ පාස්කු ප්‍රහාරයේ මහ මොළකරුවන් මුස්ලිම්වරුන් නෙමෙයි කියලා. මේක පිටිපස්සේ කෙනෙක් ඉන්නවා. බොහෝ අධ්‍යයනවලින් කියැවෙන්නේ ජාතික, ජාත්‍යන්තර හා දේශපාලන කුමන්ත්‍රණයක් තිබෙනවා කියලා. ඒක තමයි අපිත් කියන්නේ. මුස්ලිම් ජනතාව යොදාගෙන මේ රටේ ව්‍යාකූලත්වයක් ඇති කරන්න උත්සාහ කරනවා. ලොව පුරා මුස්ලිම්වරුන් භාවිතා කරන ආකාරයට මෙහෙත් කණ්ඩායම් කිහිපයක් භාවිතා කරා.”
ශ්‍රී ලංකාවේ මුස්ලිම්වරුන් ඉලක්ක කරගනිමින් සිංහල ජනතාව විසින් ප්‍රචණ්ඩ ක්‍රියා සිදු කළ අවස්ථාවන් වලදී එය සිංහල ත්‍රස්තවාදයක් ලෙස හැදින්වුයේදැයි පාර්ලිමේන්තුවෙන් ප්‍රශ්න කළ දිගාමඩුල්ල දිස්ත්‍රික් පාර්ලිමේන්තු මන්ත්‍රී නීතිඥ එස්. එම්. එම්. මුෂාරෆ් තව දුරටත් අවධාරණය කළේ ආගමේ නාමයෙන් පවතින ත්‍රස්තවාදය සම්පූර්ණයෙන් නැති කිරීමට හොඳ නීති රාශියක් පාර්ලිමේන්තුව තුලන් ගෙන ආ යුතු බවයි.
“අපි පොදුවේ අහනවා. අම්පාරේ, දිගන, අළුත්ගම මුස්ලිම් ජනතාවට එරෙහිව ප්‍රචණ්ඩ ක්‍රියාවලදී අපි කවුරුවත් මේක සිංහල ත්‍රස්තවාදයක් කියලා කතා කළාද? ඉතින් අපි ඉස්සෙල්ලාම මුස්ලිම් ත්‍රස්තවාදයයි, ඉස්ලාම් ත්‍රස්තවාදයයි කියලා මුස්ලිම්වරු ගැන විතරක් කතා කරන එක නවත්තලා, මේ ආගමේ නාමයෙන් තියෙන ත්‍රස්තවාදය සම්පූර්ණයෙන් නැති කරන්න හොඳ නීති රාශියක් මෙතනට ගේන්න ඕනේ.”
Facebook Comments
