මලයහ ජනයා ජීවත් වන ප්‍රදේශයේ පාසල් රජයට පවරාගෙන වසර පනහකට වැඩි කාලයක් ගතව ඇතත් එම ඉඩම් වල අයිතිය මේතාක් පාසල් වලට පවරා නොදීම නිසා එහි ගුරු, විදුහල්පතිවරුන්ට විවිධ දුෂ්කරතාවන්ට මුහුණ දීමට සිදුව ඇති බව හෙළි වී තිබේ.
සමගි ජන බලවේගයේ නුවර දිස්ත්‍රික් පාර්ලිමේන්තු මන්ත්‍රී වේලු කුමාර් ජුලි 10 වැනිදා ඒ බව හෙළි කළේ සුසිල් ප්‍රේමජයන්ත වර්තමාන ආණ්ඩුවේ අධ්‍යාපන අමාත්‍යවරයා වශයෙන් මලයහ සමාජයට සහ එහි ඇති අධ්‍යාපනික ගැටලු වෙනුවෙන් ගත් පියවර මොනවාද යන්න විමසමිනි.
“1970 ගණන්වල වතුකරයේ පාසල් රජයට පවරා ගත්තා. නමුත් මලයහ ප්‍රදේශයේ රජයේ පාසල් සඳහා ඉඩම් අයිතිය තවම පවරා දීලා නැහැ. ඒ සඳහා අධ්‍යාපන ඇමැති විදිහට ගෙන ඇති පියවර මොනවාද? අද විදුහල්පතිවරුන්ට, ගුරුවරුන්ට සහ පාසල් ප්‍රජාවන්ට තම පාසල් භූමිය ආරක්ෂා කර ගැනීම සඳහා කසිප්පු කාරයෝ, මැරයෝ සහ ප්‍රාදේශීය දේශපාලනඥයන් සමඟ ගැටීමේ තත්වයක් මතු වෙලා තියනවා. බොහෝ විදුහල්පතිවරුන්ට, පොලිස් ස්ථානවල ඉන්න වෙලා තියනවා.”
මලය කඳුරට දෙමළ ජනතාව අධ්‍යාපනයක් ලබා වැඩි වැටුප් ලබන රැකියා සඳහා කොළඹ ඇතුළු නගර කරා සංක්‍රමණය වීම වතුකරයේ කම්කරුවන් ලක්ෂ ගණනින් හිඟ වීමට මග පාදා ඇති බව අධ්‍යාපන අමාත්‍ය සුසිල් ප්‍රේමජයන්ත ජුලි 09 වැනිදා පාර්ලිමේන්තුවේදී පවසා තිබුනි.
කදුකරයේ පාසල් ඉඩම් ආක්‍රමණය වී ඇති ආකාරයේ පෙන්වීම සදහා පාර්ලිමේන්තුවේදී ඊට පසුදා නිදසුන් තුනක්ද සැපසු වේලු කුමාර් මන්ත්‍රීවරයා ඒ වෙනුවෙන් වත්මන් අධ්‍යාපන අමාත්‍යවරයා ගත් පියවර කවරේදැයි වැඩි දුරටත් විමසීම් කළේය.
“නාවලපිටිය දොලොස්බාගේ පාසලේ ඉඩම ආක්‍රමණය කරලා තියනවා. මහනුවර දිස්ත්‍රික්කයේ පොත්තපිටිය දෙමළ විද්‍යාලයේ ඉඩම අනවසරයෙන් අල්ලාගෙන තිබෙනවා. එලෙසම රත්නපුර කොලඹගේ විද්‍යාලයේ ඉඩම කවුරුන් හෝ ආක්‍රමණය කරලා තියනවා. අධ්‍යාපන ඇමතිවරයා ගත් ක්‍රියාමාර්ගය කුමක්ද?” ඔහු විමසා සිටියේය.
Facebook Comments
