ඒකීය, ස්ථාවර හා සෞභාග්‍යමත් ශ්‍රී ලංකාවක් වෙනුවෙන් කැප වී සිටිනවා – ඉන්දීය අගමැති ශ්‍රී නරේන්ද්‍ර මෝදි

0
332

ඉන්දියාව සැමවිටම ඒකීය, ස්ථාවර හා සෞභාග්‍යමත් ශ්‍රී ලංකාවක් වෙනුවෙන් කැප වී සිටින බව ඉන්දීය අග්‍රාමාත්‍යවරයා පවසයි.

දෙරට අතර සහයෝගීතාවයේ අරමුණ ද එය බවයි ඉන්දීය අගමැති ශ්‍රී නරේන්ද්‍ර මෝදි පවසන්නේ.

ඔහු ඒ බව සදහන් කළේ ඉන්දීය රජයේ මැදිහත්වීමෙන් මෙරට ක්‍රියාත්මක හදිසි ප්‍රතිචාර ගිලන් රථ සේවාව ආරම්භ කිරීම නිමිත්‍‍තෙන් ගාලු මුවදොරදී 28 බ්‍රහස්පතින්දා පෙරවරුවේ පැවැති උත්සවය නවීන තාක්ෂණය ඔස්සේ අමතමිනි.

‘ශ්‍රී ලංකාව තුළ මෙම හදිසි ගිලන්රථ සේවාව සමාරම්භ කරන මෙම අවස්ථාවේදී නැවතත් මා හටත් බිලියන 1.25 ක් වූ ඉන්දීය ජනතාවටත් තාක්‍ෂණය ඔස්සේ අපගේ ශ්‍රී ලාංකේය මිත්‍රවරුන් ඇමතීමට ලැබීම පිළිබඳව මා ඉතාමත් සතුටට පත් වෙනවා’. ඉන්දීය අගමැතිවරයා සිය කතාව ආරම්භ කළේ එලෙසිනි.

නවීකරණය කරන ලද දුරෙයිඅප්පා කී්‍රඩාංගණය ජනාධිපති මෛත්‍රීපාල සිරිසේන සමඟින් ශ්‍රී ලාංකේය ජනතා අයිතියට පත් කළේ පසුගිය මාසයේදී බව එහිදී සිහිපත් කළ ඔහු පැවසුයේ ‘එදින අප ශ්‍රී ලංකාවේ උතුරු පළාතට අප දෙරට අතර පවතින සහයෝගීතාවයේ ප්‍රතිලාභ ලබාදුන් අතර අද දින ඇරඹෙන මෙම ඒකාබද්ධ ව්‍යාපෘතිය මගින් මෙම සහයෝගීතාවය ශ්‍රී ලංකාවේ බස්නාහිර සහ දකුණු පළාත් කරාද ගෙන යනු ලබනවා’ යනුවෙනි.

සුවිසල් ඉලක්ක ළඟා කර ගැනීමට අරමුණු කරන මෙම ව්‍යාපෘතිය මගින් දකුණු හා බස්නාහිර පළාත් තුළ මිලියන 8කට වැඩි ජනතාවකට සෙත සැලසෙන බව පෙන්වා දෙන ඔහු වැඩි දුරටත් පැවසුයේ තමාට දැනුම් දුන් පරිදි මෙමගින් දේශීය ජනතාව සඳහා සැලකිය යුතු රැකියා ප්‍රමාණයක් ද ජනනය වන බවයි.

එසේම මෙම සේවාව මගින් ශ්‍රී ලංකා රජය හා මෙම ව්‍යාපෘතිය ක්‍රියාත්මක කිරීමට පත් කළ හවුල්කාර සමාගම අතර තිබෙන රාජ්‍ය හා පෞද්ගලික අංශ සහයෝගීතාවයේ සාර්ථකත්වයද නිරූපණය වෙන බව ඉන්දීය අගමැති ශ්‍රී නරේන්ද්‍ර මෝදිගේ අදහසයි.

ශ්‍රී ලංකාවේ සංවර්ධනයට ඉන්දියාව දක්වන සහයෝගීතාවය විවිධ ආර්ථික ක්‍රියාකාරකම් ඔස්සේ ශ්‍රී ලංකාව පුරාම පැතිරී පවතින නමුත් එය සිදුවිය යුත්තේ මෙරට අභිලාෂයන්ට අනුකූලව බවයි ඔහු පවසන්නේ.

‘අපගේ සහයෝගීතා ව්‍යාපෘතීන් ශ්‍රී ලාංකේය ජනතාවගේ හා රාජ්‍ය නායකත්වයේ තේරීම් හා ප්‍රමුඛතා මත පදනම්ව ඇත්තේ මේ නිසායි’ ඔහු වැඩි දුරටත් එහිදී පැවසීය.

ඉන්දීය අගමැති ශ්‍රී නරේන්ද්‍ර මෝදි විසින් එහිදී ශ්‍රී ලාංකේය ජනතාවට සිය සුභාශිංසන පරිනැමු අතර ආර්ථික සෞභාග්‍ය වෙත යන ගමනේදී සිය ශක්තිමත් සහයෝගීතාවය ද ලබාදෙන බවට ද එහිදී පොරොන්දු විය.

LEAVE A REPLY