රාජ්‍ය කම්කරු ඇගයීම් උළෙලකදී කාන්තා කම්කරු නායිකාවන් බුහුමනට ලක් නොවීම ගැන අග්‍රාමාත්‍යවරයා සිය කනස්සල්ල පළ කර තිබේ.
“කම්කරු නායිකාවන් නැතිකම මම දකින්නේ ලොකු අඩුවක් විදියට. ජාත්‍යන්තර වශයෙන් පවා අවධානයට ලක්වුණු පොන්සිනාහාමි, එමලියා, වැනි සටන්කාමී කම්කරු නායිකාවන් ගැනත් අපේ රටේ ඉතිහාසයේ සඳහන්. මට මතක විධියට මරදාන සුදුවැල්ලේ පදිංචි සාමාන්‍ය පවුලක කාන්තාවක් වූ පොන්සිනා හාමිගේ සටන්කාමීත්වය ගැන කියැවෙන්නේ 1923 මහා වැඩ වර්ජනයත් සමඟ. ඇය ජාත්‍යන්තරයේ සම්මානයට පවා ලක්වූ කම්කරු සටන්කාරියක්. එමිලියාද 53 හර්තාලයේ දී ක්‍රියාකාරී වැඩ කොටසක් කළා.”
කම්කරු නායකයින් සහ කම්කරුවන්ගේ උන්නතිය උදෙසා තම සේවා කාලය කැප කළ රාජ්‍ය නිලධාරීන් ඇගයීම සඳහා සංවිධානය කළ අරලියගහ මන්දිරයේ පැවති “ශ්‍රමයට අභිමන්-ජනතා බුහුමන්’’ 2021 ඇගයීම් උළෙලට එක්වෙමින් අගමැති මහින්ද රාජපක්ෂ මේ බව සඳහන් කළේය.
අග්‍රාමාත්‍ය මහින්ද රාජපක්ෂ කම්කරු අමාත්‍යවරයාව සිටියදී කළ යෝජනාවකට අනුව බිහි වූ ශ්‍රම වාසනා අරමුදලේ පුරෝගාමීත්වයෙන් කම්කරු අමාත්‍යාංශයේ සහ මුදල් අමාත්‍යාංශයේ මෙහෙයවීමෙන් මෙම සම්මාන උළෙල සංවිධානය කළ කම්කරු අමාත්‍ය පවසයි.
සැබෑ කම්කරු නායකයන් සිය සටන් මෙහෙයවන්නේ පටු දේශපාලන වාසි සඳහා නොවන බව පැවසු අගමැතිවරයා “සැබෑ කම්කරු නායකයෝ සටන් කරන්නේ පටු දේශපාලන වාසි වෙනුවෙන් නෙමෙයි. රැකියා අහිමිව හිරේ විලංගුවේ වැටෙමින් කොතරම් දුෂ්කරතාවලට මුහුණ දෙන්නට සිදුවුණත් ඒ සියල්ලක්ම විද දරාගෙන ඒ අය සටන්කරනවා.” යි කියා සිටියේය.
වෘත්තිය සමිති සටන් සීත කාමරවල සිට කළ හැකි දෙයක් නොවන බව අවධාරණ කළ අගමැතිවරයා “ගුටි බැට කන්නත් සිද්ධ වෙනවා. හිරේ විලංගුවේ වැටෙන්නත් වෙනවා.” යි ද තව දුරටත් සඳහන් කළේය.
සම්මාන ප්‍රදානෝත්සවයේ දී කම්කරු ප්‍රජාව වෙනුවෙන් විශිෂ්ට සේවයක් ඉටුකළ කීර්තිමත් වෘත්තිය සමිති නායකයින් 09 දෙනෙකු සහ විශ්‍රාමික රාජ්‍ය නිලධාරීන් දෙදෙනෙක් අග්‍රාමාත්‍යතුමාගේ ප්‍රධානත්වයෙන් මෙහි දී ඇගයීමට ලක්වූහ.
මෙරෙඤ්ඤගේ දයාරත්න මුණිදාස ප්‍රනාන්දු (සමස්ත ලංකා එක්සත් මෝටර් කම්කරු සංගමය) ලෙස්ලි ෂෙල්ටන් දේවේන්ද්‍ර ( ශ්‍රී ලංකා නිදහස් සේවක සංගමය) , සුප්පයියා සුබ්‍රමනියම් රාමනාදන් (වතු සේවක සංගමය), හේම අමරතුංග පියදාස (සමස්ත ලංකා වෙළඳ හා කර්මාන්ත කම්කරු සංගමය), රෙන්ගසාමි පලිනමුතු (ලංකා කම්කරු කොංග්‍රසය), විජේවන්ත පද්මසිරි අමරසිංහ (ලංකා වතු සේවක සංගමය) , රෙන්ගයියා මරුදමුත්තු ක්‍රිෂ්ණසාමි (කෘෂිකාර්මික හා වතු කම්කරු සංගමය), අරුමුගම් මුතුලිංගම් (එක්සත් වතු කම්කරු සංගමය), තුවාන් මන්සූර් රහීම් රසිඩීන් (ලංකා කම්කරු ෆෙඩරේෂන්) මහත්වරු සහ කම්කරු අමාත්‍යාංශයේ ලේකම්වරයකු ලෙස සේවයේ නිරතව සිට මේ වන විට රාජ්‍ය සේවයෙන් විශ්‍රාම ලැබ සිටින මහින්ද මඩිහහේව සහ කම්කරු කොමසාරිස් ජනරාල් ලෙස සේවයේ නිරතව සිට රාජ්‍ය සේවයෙන් මේ වන විට විශ්‍රාම ලැබ සිටින ගුණසිරි වීරකෝන් යන වෘත්තිය සමිති නායකයන් අග්‍රාමාත්‍යතුමා අතින් ඇගයීම් සම්මාන ලබාගත්හ.
Facebook Comments
