සජිත් – ගෝටා මානව හිමිකම් රැකගනි කියා විශ්වාසයක් නෑ (VIDEO)

0

ඉදිරි ජනපතිවරණය සඳහා ප්‍රධාන පක්ෂ නියෝජනය කරමින් නාමයෝජිත අපේක්ෂකයන් දෙදෙනාම මානව හිමිකම් ආරක්ෂා කිරීමට කැප වනු ඇතැයි විශ්වාසය තැබිය නොහැකි බවට අතුරුදහන්වුවන්ගේ පවුල් එකතුවේ සභාපතිවරයා ප්‍රකාශ කර තිබේ.

මානව හිමිකම් ආරක්ෂා කරනු ඇතැයි සිතන විකල්ප අපේක්ෂයෙකු පිළිබඳව ද තමන්ට අදහසක් නොමැති බවයි බ්‍රිටෝ ප්‍රනාන්දු පවසන්නේ.

“ගෝඨාභය රාජපක්ෂවත් මහින්ද රාජපක්ෂවත් කියලා නෑ ඔවුන් පහුගිය කාලේ කරපු කිසිදෙයක් වැරදි කියලා. මහින්ද රාජපක්ෂ එක කාලේක අපේ නායකයා නමුත් ඔහු තරම් පාවා දුන්න නායකයෙක් මම දැකලා නෑ, සජිත් ප්‍රේමදාස මහත්තයත් පහුගිය කාලේ ජිනිවා යෝජනා වලට විරුද්ධව තමයි කතා කලේ. ඒ නිසා ඔහු ගැනත් විශ්වාසයක් නැහැ. මේ ඉදිරිපත් වෙලා ඉන්න අපේක්ෂකයෝ දෙන්නම යමක් කරයි කියන විශ්වාසය මං තුල නෑ. ඒකට විකල්පයක් හැටියට මේ මොහොතෙ මට වෙන කවුරුත් කියන්නත් නෑ.”

අතුරුදහන් වුවන් පිළිබඳ ජාත්‍යන්තර දිනය යෙදී තිබු අගෝස්තු 30 අතුරුදහන් වුවන් පිළිබඳ කාර්යල විසින් සංවිධානය කර තිබු උත්සවයෙන් අනතුරුව මාධ්‍යවේදී චමිල්ක සම්පත් කළ ප්‍රශ්න කිරීමක දී අතුරුදහන්වුවන්ගේ පවුල් එකතුවේ බ්‍රිටෝ ප්‍රනාන්දු මෙලෙස දැනට යෝජනා වී ඇති ජනපති අපේක්ෂකයන් දෝෂ දර්ශනයට ලක් කළේය.

ගෝඨා ගැන ඇති විශ්වාසය

ශ්‍රී ලංකාවේ සංහිඳියාව ඇති කිරීම වෙනුවෙන් ඉදිරිපත් වී ඇති ජිනිවා යෝජනා සම්බන්ධව ගෝඨාභය මෙන්ම සජිත් ප්‍රේමදාස ඇමැතිවරයාද අතීතයේදී විරුද්ධ කටයුතු කළ බව කී මානව හිමිකම් ක්‍රියාධර බ්‍රිටෝ ප්‍රනාන්දු ඔවුන්ගෙන් කෙනෙකු බලයට පත්වුවහොත් එම යෝජනා වලට කුමක් සිදුවේ දැයි බිය වී සිටින බව ද පැවසීය.

මහින්ද රාජපක්ෂ පාලන සමයේ සිදුවු අතුරුදහන් කරවීම හා සුදුවෑන් ගැන වින්දිතයන්ගේ චෝදනාවට ලක්වී ඇති එවක ආරක්ෂක ලේකම් වී සිටි ගෝඨාභය රාජපක්ෂ බලයට පත්වුවහොත් ඒ මාර්ගයයේ හැර වෙනත් මඟක නොයනු ඇති බවට අතුරුදහන්වුවන්ගේ පවුල් එකතුවේ සභාපතිවරයා විශ්වාසය පළ කළේය.

“මට එක විශ්වාසයක් තියෙනවා නැවත සුදුවෑන් වෙනුවට වෙන සංකේතයක් එන්න ඉඩ තියෙනවා. නැවත අතුරුදහන් කිරීම්, පැහැර ගැනීම් සහ ඝාතන වීමට නම් බොහෝ ඉඩ තියෙනවා කියලා මම හිතනවා.” යැයි දශක තුනකටත් වැඩි කළක් තිස්සේ අතුරුදහන් කරවීම වලට එරෙහිව සටන් වඳින බ්‍රිටෝ ප්‍රනාන්දු කියා සිටියේය.

OMPයට දොස්

අතුරුදහන් වුවන් පිළිබඳ වු කාර්යාල හරහා එකඳු අතුරුදහන් වු පුද්ගලයෙකු පිළිබඳව හෝ මෙතෙක් සත්‍ය සොයා ගැනීමට නොහැකි වීම බ්‍රිටෝ ප්‍රනාන්දුගේ දැඩි දෝෂ දර්ශනයට ලක් විය.

“අතුරුදහන් වු තැනැත්තන් පිළිබඳ වු කාර්යාල අඩුම ගණනේ මේ වසර තුළ එක කාරණයක් පිළිබඳවත් සත්‍ය හෙළි කළ යුතුමයි. නැත්නම් ඔවුන් හැමදාම කියන්න ඉඩ තියෙනවා අපි ඒ ගැන කටයුතු කරමින් ඉන්නවා කියලා. අපි අභියෝ කරනා අතුරුදහන් වුවන්ගේ කාර්යාලයට එක සිද්ධියක හරි සත්‍ය හෙළි කරන්න නැත්නම් මිනිස්සුන්ගේ විශ්වාසය දිනන්න බෑ. අද උතුරේත් තියෙන ප්‍රධානම චෝදනාව තමයි යටත් වු තැනැත්තන් මේ අතුරුදහන් වුවන්ගේ කොමිසමට හොයන්න බෑ කියන කාරනය.”

අතුරුදහන් කරවීමි වලට එරෙහිව අලුත් ආයතන හා නීතිරිති බොහෝමයක් ඇති වුවද අතුරුදහන් වුවන්ගේ වින්දිතයන් වෙනුවෙන් “ඇඟට දැනෙන යමක්” සිදුව නැති බව කී අතුරුදහන්වුවන්ගේ පවුල් එකතුවේ සභාපති බ්‍රිටෝ ප්‍රනාන්දු මේතාක් ඔවුන් හට වන්දි ප්‍රධානයක් හෝ අතුරුදහන්වුවන් වෙනුවෙන් නොදුටු සහතිකය ද නිකුත් කර නොමැති බවට චෝදනා කළේය.

Facebook Comments

wedding people