රාජ්‍ය ප‍්‍රතිපත්තිය යහපාලන නාම පුවරුවට පමණක් සීමා නොකර අධිකරණය, රාජ්‍ය සේවය ඇතුළු සියලු ක්ෂේත‍්‍රවල තිබිය යුතු නිදහස සහ ස්වාධීනත්වය තහවුරු කරන බව ජනාධිපතිතුමා අවධාරණය කළේය.
‘නඩු කටයුතු ප‍්‍රමාදය වැළැක්වීම සහ අධිකරණ සේවය පිළිබඳ ජනතාවගේ විශ්වාසය දිනා ගැනීම’ යන තේමාව යටතේ අධිකරණ සේවා සංගමය සංවිධානය කර තිබු උත්සවයකට සහභාගීවෙමින් ජනාධිපති මෛත්‍රීපාල සිරිසේන මේ බව පැවසීය.
විධායකයේ සෙවණැල්ල කෙතරම් දුරට අධිකරණයට බලපෑම් එල්ල කළේ ද යන්න පසුගිය දශක කිහිපය අධ්‍යයනය කිරීම තුළින් සියලුදෙනාට පෙනී යන බව ප‍්‍රකාශ කළ ජනාධිපතිතුමා අධිකරණයේ ස්වාධීනත්වය සහ අපක්ෂපාතිත්වය ඇතිකිරීමේ මූලික වගකීම ඉටු කළ යුත්තේ රජය බව ද කියා සිටියේය.
අධිකරණය සහ නීතිය සැමට සාධාරණ විය යුතු අතර තරාතිරම අනුව අධිකරණයේ සහ සිරගෙදර වෙනම සැලකිලි හිමිවන බවට සාමාන්‍ය ජනතාවගෙන් සහ විවිධ අංශවලින් නැගෙන චෝදනාව පිළිබඳ ක්ෂේත‍්‍රයේ සියලුදෙනාගේ කඩිනම් අවධානය යොමු විය යුතු බව ජනාධිපතිතුමා පෙන්වා දුන්නේය.
අධිකරණ සේවා කොමිෂන් සභාව තුළ පත්වීම් සහ උසස්වීමේ ලබාදීමේ දී අත්දැකීම් සහ දක්ෂතාවයට ප‍්‍රමුඛත්වය හිමිවිය යුතු අතර ඒ සඳහා රජය ඉඩ කඩ සලසා තිබෙන බව ද ජනාධිපතිතුමා කියා සිටියේය.
අධිකරණ අමාත්‍ය විජයදාස රාජපක්ෂ මහතා ද අධිකරණ සේවා සංගමයේ සභාපති, ලේකම් ඇතුළු එහි සාමාජිකයින් ද, නීති ක්ෂේත‍්‍රයේ විද්වතුන්, ප‍්‍රවීණයින් ඇතුළු පිරිසක් මෙම අවස්ථාවට එක්ව සිටියහ.
Facebook Comments
