හිටපු නාවික හමුදා ලොක්කා පැහැරගැනීම් ගැන “දැන සිටියා”

0

නාවික හමුදා විශේෂ බුද්ධි ඒකකයක් විසින් කප්පම් ලබා ගැනීම පිණිස පුද්ගලයන් පැහැර ගත් බව හිටපු නාවික හමුදාපති අද්මිරාල් වසන්ත කරන්නාගොඩ නිශ්චිතවම දැන සිටි බව හෙළිව තිබේ.

අද්මිරාල් වසන්ත කරන්නාගොඩ සහ නාවික හමුදා හිටපු බුද්ධි අධ්‍යක්ෂක කපිතාන් ආනන්ද ගුරුගේ ප්‍රමුඛ නාවික නිලධාරීන් කිහිප දෙනකු විසින් අපරාධ පරීක්ෂණ දෙපාර්තමේන්තුව හමුවේ කරන ලද ප්‍රකාශ පදනම් කරගෙන කොළඹ කොටුව මහේස්ත්‍රාත් රංග දිසානායක හමුවට ජුලි 09 දා ඉදිරිපත් කරන ලද වාර්තාවකින් මේ බව අනාවරණය වී ඇත.

කල්තියා දැන සිටි තොරතුරු සම්බන්ධයෙන් නිසි පියවර නොගැනීමෙන් හිටපු නාවික හමුදාපති ජීවිත අනතුරේ හෙලා ඇති බවට අපරාධ පරීක්ෂණ දෙපාර්තුමේන්තුව සිය වාර්තාවෙන් චෝදනා කර ඇතැයි ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය පවසයි.

යුද්ධයේ අවසාන භාගයේ පැහැර ගන්නා ලද පිරිසක් ත්‍රිකුණාමලයේ ‘ගන්සයිට්’ භූගත සිර කඳවුරේ රඳවාගෙන සිටි බව හිටපු නාවික හමුදාපතිවරයා දැනුවත්ව සිට ඇත.

2009 මැයි මාසයේ දිනක වර්තමානයේ රියර් අද්මිරාල් ජේ ජේ රණසිංහ ලුතිනන් කොමදෝරු සම්පත් මුණසිංහ ප්‍රමුඛ පිරිසක් විසින් ළමයින් පස් දෙනකු පැහැරගෙන පැමිණ ගන්සයිට් කඳවුරේ සිරකර ගෙන සිටින බව තමන්ට දැනුම් දුන් බව අහස් පොලිසියට පවසා ඇති හිටපු හමුදාපතිවරයා ඒ පිළිබඳව සොයා බැලීමට නාවික හමුදා බුද්ධි අංශයේ එවකට සිටි අධ්‍යක්ෂක කපිතාන් ආනන්ද ගුරුගේ, නාවික හමුදාවේ විනයාරක්ෂක හිටපු ප්‍රධානි කපිතාන් සේනක හංවැල්ල සහ නැගෙනහිර පළාත් නාවික ආඥාපතිව සිටි රියාර් අද්මිරාල් තුසිත් වීරසේකර යන අයට බාර කළ බව සඳහන් කර තිබේ.

හිටපු නාවික හමුදාපතිවරයාගේ ප්‍රකාශය පදනම් කොටගෙන අපරාධ පරීක්ෂණ දෙපාර්තමේන්තුව ඉහත තිදෙනාගෙන් ද ප්‍රශ්න කර ඇති බවයි JDS සංවිධානය වාර්තා කරන්නේ.

රියර් අද්මිරාල් වීරසේකර සඳහන් කොට තිබෙන්නේ තමන් ඒ පිළිබඳව සොයා බැලුව ද සිරකර ඇති කිසිදු අයකු පිළිබඳ තොරතුරු දැන ගන්නට නොලැබුණු බවයි.

ගන්සයිට් සිරකඳවුරේ පාලනය එවකට භාරව සිටියේ ලුතිනන් කොමදෝරු සුමිත් රණසිංහ විසින් බවත්, එම කඳවුරු පරිශ්‍රය නිරීක්ෂණය කිරීමට තමන්ට අවසරයක් හෝ බලයක් නොතිබුණු බවත් රියර් අද්මිරාල්වරයා කියා ඇත.

එසේ වීමට හේතුව හේතුව ලෙස නැගෙනහිර හිටපු නාවික ආඥාපතිවරයා රහස් පොලිසියට සඳහන් කර ඇත්තේ සුමිත් රණසිංහ සෘජුවම එවකට සිටි නාවික හමුදාපති වසන්ත කරන්නාගොඩට පමණක් වගකීමට බැඳි සිටි නිසා බවයි.

සම්පත් මුණසිංහ යටතේ ක්‍රියාත්මක කෙරුනු ඒකකයේ සියළු නිලධාරීන් සහ සෙබළුන්ගෙන් ඔහු ඒ පිළිබඳව ප්‍රශ්න කොට ප්‍රකාශ සටහන් කර ගත් බව කපිතාන් ආනන්ද ගුරුගේ විසින් රහස් පොලිසියට ප්‍රකාශ කර තිබේ.

ඒ වන විටත් පැහැරගෙන රඳවා සිටි පිරිස් ඝාතනය කර ඇති බව අනාවරණය වු බවයි කපිතාන්වරයා වැඩි දුරටත් සඳහන් කර ඇත්තේ.

ගන්සයිට් සිරකඳවුරේ රඳවා සිටි පුද්ගලයන් පැහැරගෙන පැමිණියේ කවරෙක් ද, ඔවුන් ඝාතනය කළේ කවරෙක් ද යන වග තමන් විසින් අනාවරණය කොට ගෙන අද්මිරාල් කරන්නාගොඩට දැනුම් දුන්න ද ඔහු ඒ සම්බන්ධව කිසිදු තැකීමක් කොකළ බව ද නාවික හමුදාවේ හිටපු බුද්ධි අධ්‍යක්ෂ ප්‍රකාශ කොට ඇත.

පුද්ගලයන් පිරිසක් පැහැරගෙන පැමිණ සිරකරගෙන සිටින බවට තොරතුරු ලැබුනු පසු අද්මිරාල් වසන්ත කරන්නාගොඩ ඒ පිළිබඳව සැළකිලිමත් වෙමින් කටයුතු කළේ නම් එම රැඳවියන්ගේ ජීවිත ආරක්ෂාකර ගැනීමට හැකිව තිබු බව අපරාධ පරීක්ෂණ දෙපාර්තුමේන්තුව අධිකරණය වෙත දැනුම් දී තිබේ.

ඒ වෙනුවට, තමන්ගේ නියෝග යටතේ ක්‍රියාත්මක කෙරුනු නාවික හමුදා විශේෂ බුද්ධි ඒකකයේ පිරිස් විසින් කරන ලද අපරාධ ඔහු විසින් සිතාමතාම සඟවා ඇතැයි ද, එම අපරාධ සිදුකළ පුද්ගලයන් නීතිය හමුවට නොපමුණුවා ආරක්ෂා කර ඇතැයි ද අපරාධ පරීක්ෂණ දෙපාර්තමේන්තුව චෝදනා කරයි.

කෙසේ වෙතත්, අද්මිරාල් වසන්ත කරන්නාගොඩ රණවිරුවකු සේ සලකා අත්අඩංගුවට නොගත යුතු බව බුවනෙක අලුවිහාරේ, ප්‍රීති පද්මන් සූරසේන සහ විජිත් කේ මලල්ගොඩ යන ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් පසුගිය මාර්තු මාසයේ ඒකමතිකව තීන්දු කරනු ලැබුණි.

එම තීන්දුව දෙනු ලැබුවේ අපරාධ පරීක්ෂණ දෙපාර්තමේන්තුව විසින් තමන් අත්අඩංගුවට ගැනීමේ සුදානමක් පවතින බවට බිය පල කරමින්, එසේ අත්අඩංගුවට ගැනීම වළකාලන ලෙස ඉල්ලමින් හිටපු නාවික හමුදාපති ගොනු කළ පෙත්සමක් සළකා බැලීමෙන් අනතුරුව ය.

Facebook Comments

wedding people