පසුගිය වසරේ දී පාවහන් හා සම්භාණ්ඩ අපනයනයෙන් රුපියල් කෝටි 1,848 ක ආදායම් ලැබු බව කර්මාන්ත හා වාණිජ කටයුතු අමාත්‍ය රිෂාඩ් බදියුදීන් පවසයි.
ශ්‍රි ලංකා පාවහන් හා සම්භාණ්ඩ අපනයන කර්මාන්තයට හොඳ ඉඩකඩක් ලැබී ඇති බව පවසන කර්මාන්ත හා වාණිජ කටයුතු අමාත්‍යාංශය මෙම කර්මාන්තයේ දෙස් විදෙස් පිළිගැනීමක් ඇති කිරීමට තම අමාත්‍යංශය සුවිශාල දායකත්වයක් ලබා දුන් බව 25 බ්‍රහස්පතින්දා නිකුත් කළ නිවේදනයක දැක්වේ.
“අපේ සම්භාණ්ඩ හා පාවහන් කර්මාන්තය පුළුල් කිරීම සඳහා මගේ අමාත්‍යාංශයේත්, ආයතනවලත් පූර්ණ සහයෝගය ලබා දුන්නා. ඒ වගේම අපි විදේශ වෙළෙඳපොළ තව තවත් පුළුල් කිරීමටත්, නිෂ්පාදන ධාරිතාව වැඩි කිරීමටත් කටයුතු කරනු ලැබුවා. අප රටේ පාවහන් හා සම්භාණ්ඩ කර්මාන්තය තුළ සෘජු හා වක්‍ර වශයෙන් ලක්‍ෂ 03 කට ආසන්න පිරිසක් රැකියාවල නිරත වෙනවා” කර්මාන්ත හා වාණිජ කටයුතු අමාත්‍යාංශයේ මාධ්‍ය අධ්‍යක්ෂ ඩී.එස්.එන්.රාජපක්‍ෂගේ අත්සනින් නිකුත් කල නිවේදනයේ සඳහන්ව ඇත.
මෙම කර්මාන්තයේ සමස්ත නිෂ්පාදනවල වටිනාකම රුපියල් බිලියන 60 ක් හෙවත් කෝටි 6000 ක් පමණ වන බව මෙන්ම එයින් සියයට 75 ක්ම ලබා දෙන්නේ දේශීය නිෂ්පාදකයන් බවයි අමාත්‍යංශය පවසන්නේ.
“එම නිසා අප අපගේ ආයතන වෙළඳපොළ තව තවත් පුළුල් කිරීමටත්, දේශීය පාවහන් නිෂ්පාදනවල ප්‍රමිතිය ඉහළ මට්ටමින් පවත්වාගෙන යාමටත් පියවර ගත යුතු වෙනවා. ඒ සඳහා දේශීය පාවහන් නිෂ්පාදකයාගේ සහායද අවශ්‍ය වෙනවා” යැයි අමාත්‍යවරයා වැඩි දුරටත් සදහන් කර තිබේ.
Facebook Comments
