ජනපති විසින් දේශප්‍රේමී පෙරමුණ සකස් කරන බවට කර ඇති ප්‍රකාශයෙන් තමන් “බිරන්තට්ටු” වී ඇති බවට දේශප්‍රේමීන්ගේ නිරන්තර ප්‍රහාරයට ලක් වන ජාතිවාදයට එරෙහි වාමාංශික නායකයෙකු පවසයි.
“මේ රටේ දේශප්‍රේමී පෙරමුණු කරපු දේවල් අපි දන්නවා, දේශමාමක බලවේග කරපු විනාශය අපි දන්නවා, ඒ නිසා අපි බිරන්තට්ටු වෙනවා මෛත්‍රී මැතිඳු දේශප්‍රේමීන්ගේ පෙරමුණක් හදනවා කියල කියනකොට,” යැයි නව සම සමාජ පක්ෂ නායක ආචාර්ය වික්‍රමබාහු කරුණාරත්න කියා සිටියේය.
ජනපති මෛත්‍රීපාල සිරිසේන සකස් කරන බවට ප්‍රකාශ කර ඇති දේශප්‍රේමීන්ගේ ස්වාභාවය කුමක් දැයි 24 බදාදා කොළඹදී පැවැති මාධ්‍ය හමුවකදී ඔහු ප්‍රශ්න කළේය.
හොරු ද ප්‍රශ්නේ
ජනාධිපතිවරයා විසින් හොරු ඇල්ලීමට මුල් තැන දී තිබෙන අතර හොරු ඇල්ලීම සිදු කළ යුතු දෙයක් වුවත් රට විනාශ වුයේ හොරු නිසා දැයි ප්‍රශ්න කරන නව සම සමාජ පක්ෂ නායකයා මේ රට විනාශ වුයේ ජාතිවාදින් හා ආගම්වාදින් නිසා බව පෙන්වා දෙයි.
රට තුල ඇති වු කැරළි දෙකෙන් එක් කැරැල්ලක් ඇති වුයේ බලය බෙදීමට විරුද්ධව ඇති වු වුවක් වන අතර රටේ භාෂා තුනම එක හා සමානව පිලිනොගන්නා ලෙස ගෙන ගිය සටනට 88 නායකත්වය දුන්නේ ජනතා විමුක්ති පෙරමුණ බව දේශප්‍රේමී ජනතා ව්‍යාපාරයේ වෙඩි පහරට ලක්වූ ආචාර්ය වික්‍රමබාහු සිහිපත් කළේය.
එම සටන් සුළු ජනයාගේ අයිතිවාසිකම් කුටුපට්ටම් කරන පදනමින් දියත් වු බව අවධාරණය කළ නව සම සමාජ පක්ෂ නායක ආචාර්ය වික්‍රමබාහු කරුණාරත්න දේශප්‍රේමී සටනක් ලෙස හඳුන්වා ගත්තත් එය දේශ ද්‍රෝහී සටනක් බව වැඩි දුරටත් කියා සිටියේය.
Facebook Comments
