රටේ ආර්ථික ක්‍රියාවලිය නැවත පටන් ගැනීමට මුල්තැන දීමේ අවශ්‍යතාවයෙන් පෙලෙන ආණ්ඩුව කොරෝනා රෝගීන් හදුනා ගැනීම සදහා ලෝක සෞඛ්‍ය සංවිධානය ප්‍රමුඛ වසංගත විශේෂඥයන් ලබා දී ඇති උපදෙස් නිසි අයුරින් ක්‍රියාවේ නොයොදවා ශ්‍රී ලංකාවේ සිටින සැබෑ කොරෝනා රෝගීන් ප්‍රමාණය රටට සැඟවීමේ උත්සාහයක නිරත වන බවට විපක්ෂය නියෝජනය කරන හිටපු අමාත්‍යවරයෙක් චෝදනා කරයි.
රට තුළ සිටින කොරෝනා රෝගීන් ප්‍රමාණය නිශ්චිතව ගණනය කිරීම සදහා වැඩි වශයෙන් වෛද්‍ය පරීක්ෂණ සිදු කළ යුතු වුවද ආණ්ඩුව එසේ නොකරන බවට චෝදනා කරන දමිළ ප්‍රගතිශීලි සන්ධානයේ නායකයා අවධාරණය කරන්නේ රෝගීන් හදුනා ගැනීම වෙනුවෙන් සිදු කරන වෛද්‍ය පරීක්ෂණ ප්‍රමාණය තව දුරටත් වැඩි කළ යුතු බවයි.
” අපිට ඕනේ ටෙස්ටින්, ටෙස්ටින්, ටෙස්ටින්, පරීක්ෂණ, පරීක්ෂණ, පරීක්ෂණ, සෝදනෙයි, සෝදනෙයි, සෝදනෙයි!”
කොරෝනා වෛරස් ආසාදිතයන් හදුනා ගැනීම සදහා සිදු කරන වෛද්‍ය පරීක්ෂණ ප්‍රමාණය ඉහළ දැමිය යුතු බවට ලෝක සෞඛ්‍ය සංවිධානය විසින් නිරන්තරයෙන් කෙරෙන අවධාරණයකි.
හිටපු අමාත්‍ය මනෝ ගනේෂන් අප්‍රේල් 17 සිකුරාදා කොළඹදී පැවැති මාධ්‍ය හමුවේදී සදහන් කළ පරිදි මේ වන විට චීනයෙන් ලබා දී ඇති වෛද්‍ය උපකරණ ප්‍රමාණය අනුව පුද්ගලයන් 40000 කගේ වෛද්‍ය පරීක්ෂණ සිදු කිරීමේ හැකියාව දැනට රට තුළ පවති.
සෞඛ්‍ය සේවා අධ්‍යක්ෂ ජනරාල්වරයා ප්‍රකාශ කරන පරිදි පරීක්ෂණ සදහා අප රටට දිනකට ඇති උපරිම ධාරිතාව 1500 ට ආසන්නය. කෙසේ නමුත් තවමත් වෛද්‍ය බලධාරීන් විසින් සිදු කරමින් සිටිනුයේ දිනකට පරීක්ෂණ 500 ක් වැනි ගණනකි.
රෝගීන් හදුනා ගැනීම සදහා පරීක්ෂණ වැඩි වශයෙන් සිදු නොකරන ආණ්ඩුව ශ්‍රී ලංකාව තුළ කොරෝනා වසංගතය මර්දනය කර ඇති බවට ලෝකය හමුවේ සපත කරමින් එහි ශ්‍රේනිගත කිරීම් වල ඉහලින් වැජඹීමේ අවශ්‍යතාවය මත කටයුතු කරමින් බවයි හිටපු අමාත්‍ය මනෝ ගනේෂන් පවසන්නේ.
කැත හදිසියක්
මැතිවරණය පැවැත්වීම සදහා ආණ්ඩුවට ඇති උනන්දුව මනෝ ගනේෂන් විසින් මාධ්‍ය හමුවේදී හදුන්වනු ලැබුවේ “කැත හදිසියක්” ලෙසිනි.
“අපි රේටින් වල කියුබාවට වඩා, සිංගප්පුරුවට වඩා, කොරියාවට වඩා, ඉහලින් ඉන්නවා කියලා පෙන්නන්න ආණ්ඩුවට උවමනාවක් තියනවා. ඒකයි අපි කීවේ කැත හදිස්සියක් කියලා. ”
ශ්‍රේණිගත කිරීම් පෙන්වමින් ආණ්ඩුව මැතිවරණයට අවතිරණය වීමට උත්සාහ ගන්නා බව පවසු හිටපු අමාත්‍යවරයා එහිදී වැඩි දුරටත් සදහන් කළේ මැතිවරණය පැවැත්වීම සදහා අවම වශයෙන් කෝටි අට සීයක් පමන වැය වන බැවින් මේ මොහොතේ එම මුදල රටේ ජනතාගේ සුභ සිද්ධිය සදහා යෙදවීම වැදගත් බවයි.
කෝවිඩ් අවදානමට වැඩියෙන්ම මුහුණ පා සිටින ලෝකයේ රටවල් 20 දක්වන අතරින් ශ්‍රී ලංකාව අප්‍රේල් 12 දා වන විට සිටියේ 16 වැනි ස්ථානයේය.
ටෙස්ටින්, ටෙස්ටින්,ටෙස්ටින්
කොරෝනා ආසාදිතයන් ගේ පළමු සම්බන්ධතාවට (first contact) අයත් වන පුද්ගලයන් සියල්ල කොරෝනා පරීක්ෂාවට ලක් කරන තුරු රටේ ආර්ථික ක්‍රියාවලිය නැවත පටන් ගැනීමේ සැලසුම ගැන තීරණ නොගන්නැයි රජයේ වෛද්‍ය නිලධාරීන් ගේ සංගමය (GMOA)රජයට අවධාරණය කර තිබුනි.
එම සංගමයේ සහකාර ලේකම් වෛද්‍ය නවින් ද සොයිසා මාධ්‍ය වෙත ද අවධාරණය කර තිබුනේ, රටේම තත්ත්වය නිවැරදි ලෙස තක්සේරු නොකොට රටේ ආර්ථික ක්‍රියාවලිය නැවත පණ ගැන්වීම නොකළ යුතු බවයි.
“මුලින්ම දැනට හමුවූ රෝගීන්ගේ පළමු සම්බන්ධතාව (first contact) කොරෝනා පරීක්ෂාවට ලක් කරන්න ඕනේ. ඒ ප්‍රතිපල අනුව ඊළගට තීරණය කරන්න ඕනේ දෙවන සහ තෙවන සම්බන්ධකම් වලට අදාල පුද්ගලයන්වත් කොරෝනා පරීක්ෂාවට ලක් කරනවද කියලා.”
“කොරෝනා රෝග ව්‍යාප්තිය – රටේ සෞඛ්‍ය හා රට නැවත යථා තත්වයට පත් කිරීමේ හැකියාව ” මැයෙන් අප්‍රේල් මස 17 සිකුරාදා නිකුත් කර තිබෙන මාධ්‍ය නිවේදනයක් මගින්ද රජයේ වෛද්‍ය නිලධාරීන්ගේ සංගමය චෝදනා කර තිබුනේ සෞඛ්‍ය අංශ විසින්ම ප්‍රකාශ කළ පළමු පෙලේ සමීප ස්පර්ශකයන් 3000 ට ආසන්න පිරිස හෝ පරීක්ෂාවට ලක් කර අවසන් කිරීමට මේ වන තෙක් බලධාරීන් අපොහොසත් වී ඇති බවටයි.
“තත්වය වඩාත් බෑරැරුම් වනුයේ සෞඛ්‍ය අමාතාංශයට අනුබද්ධ වසංගත රෝග විද්‍යා අංශ වලට රෝග ස්පර්ශකයන් ව්‍යාප්තිය හා ඒ හරහා මතුව ඇති වර්තමාන අවධානම පිළිබද සැබෑ චිත්‍රය මේ දක්වා රටට ඉදිරිපත් කිරීමට නොහැකි වීමයි. ඒ අය සතුව තිබිය යුතු සමහරක් තොරතුරු පාර්ශවකරුවන් සමග බෙදා නොගැනීම මීලග බරපතල ගැටළුවයි,” එහි චෝදනාත්මකව සදහන්ව තිබුනි.
ඉතා භයානක සමාජ ව්‍යාප්තියක් සිදු වන තෙක් පරීක්ෂණ ඇතුළු පහසුකම් ඉතිරිකරගත යුතුය යන මානසිකත්වයෙන් මිදී සමාජ ව්‍යාප්තිය දක්වා රෝගය දරුනු වීම වැළැක්වීමට අවශ්‍ය උපක්‍රමශිලී ප්‍රවේශයකට සෞඛ්‍ය බලධාරීන් මේ මොහොතේ හෝ යොමු විය යුතු බව රජයේ වෛද්‍ය නිලධාරීන්ගේ සංගමයේද අදහසයි.
Facebook Comments
