විෂබීජ නාශක ඇඟට ඉසීම “ලෝක සෞඛ්‍ය සංවිධාන නිර්දේශවලට පටහැනියි”

0

පිරිසිදු කිරීමේ කුටි භාවිතය සහ ප්‍රසිද්ධ ස්ථාන වල විෂබීජ නාශක ඉසීම මිනිස් සිරුරට හානිදායක බවට අනතුරු අඟවන ශ්‍රී ලංකාවේ විද්‍යාඥ මණ්ඩලයක් එමගින් කෝවිඩ් 19 පැතිරීම වැළකෙන්නේ නැතැයි ලෝක සෞඛ්‍ය සංවිධානයද පෙන්වා දී ඇතැයි ප්‍රකාශයට පත් කර තිබේ.

මහජනයා ගැවසෙන බොහෝ ස්ථාන වල ඇතුල්වීමේ හා පිටවීමේදී මෙම විෂබීජහරන කුටි ගමන් කිරීම අනිවාර්ය කර ඇති බවත් පෙන්වා දෙන ශ්‍රී ලංකා ක්ෂුද්‍රජීව විද්‍යා විද්‍යාලය, මෙහිදී ජනයා මත ස්ප්‍රේ කරනු ලබන්නේ මධ්‍යසාර, ක්ලෝරීන් සංයෝග, ඕසෝනිකාරක ජලය, සබන් වතුර හා පාරජම්බූල කිරණ ආදිය බව හෙළි කර සිටී.

මෙම ක්‍රියාවලිය ජාත්‍යන්තර වශයෙන් සම්මත වුවක් නොවන බව ලෝක සෞඛ්‍ය සංවිධානය උපුටා දක්වමින් ඔවුහු පෙන්වා දෙති.

“මොනම වාතාවරණයක් යටතේ වත් තනි පුද්ගලයන් හෝ කණ්ඩායම් මත ස්ප්‍රේ කිරීම අනුමත නොකරන බව අපි දැඩි ලෙස අවධාරණය කරමු. තනි පුද්ගලයකු හෝ කණ්ඩායමක් මත රසායනික විෂබීජ නාශක හෝ කුණු ඉවත් කරන රසායනික ඉසීම ශාරීරිකව හා මානසිකව හානිකර වන අතර එමගින් කොවිඩ්-19 ව්‍යාප්තිය සීමා නොකරයි. කොවිඩ්-19 වෛරසයෙන් ආසාධිත පුද්ගලයෙකුගේ වුවද බාහිර ශරීර අංග වලට (රසායනික ද්‍රව්‍ය) ඉසීමෙන් ඇග ඇතුලේ ඇති වෛරසය විනාශ නොවන අතර එම පුද්ගලයාගේ සෞඛ්‍ය තත්වය තවදුරටත් අසාධ්‍ය වීමටද හේතු විය හැකිය.”

මධ්‍යසාර හෝ වෙනත් විෂබීජ නාශක හෝ ප්‍රතිඵලදායක වීමට නම් ඒවාසැලකිය යුතු ප්‍රමාණයක් (වෛරසය) සමග ගැටෙන කාලපරිච්ඡේදය තුළ තිබිය යුතු බව පෙන්වා දෙන ක්ෂුද්‍ර ජීව විද්‍යාඥයන් වැඩිදුරටත් ප්‍රකාශ කර සිටින්නේ මෙවැනි කුටි වල ස්වභාවය අනුව එය ප්‍රමාණවත් ලෙස ලැබෙන්නේ නැති බවයි. එමෙන්ම ඇමරිකානු ආහාර හා ඖෂධ පාලක මණ්ඩලයට (FDA) අනුව, හානිකර බැක්ටීරියා විනාශ කිරීමේදී ඕසෝන් ප්‍රතිඵලදායක වීමට නම්, එය මිනිසාට ආරක්ෂිත යැයි සැළකෙන ප්‍රමාණයට වඩා එහා ගිය සාන්ද්‍රණයකින් යුක්ත විය යුතු බව ඔවුන් තවදුරටත් පෙන්වා දෙයි.

කළ යුත්තේ ඇඟ හේදීම නොවේ

කොවිඩ්-19 බෝ වීමේ ප්‍රධාන ආකාරය වනුයේ වෛරසය තැන්පත් වූ අත් වලින් මුහුන (ඇස්, නාසය, මුඛය) ඇල්ලීම වීම නිසා වෛරසය පැතිරීම වැළැක්වීමට කළ යුත්තේ, මුළු ශරීරයම විශබීජහරණය කිරීමට උත්සාහ කිරීමට වඩා දෑත් විෂබීජහරණය කිරීම බව මෙම නිවේදනය මගින් ඔවුන් පෙන්වා දේ.

කුටි තුළ මධ්‍යසාර හා වෙනත් විෂබීජ නාශක බහුල වශයෙන් භාවිතයේදී ගිනි ගැනීම් අනතුරු වලට පවා ලක්විය හැකි බව පෙන්වාදෙන අතරම මෙම රසායනික ද්‍රව්‍ය අත් විෂබීජහාරක සෑදීමට හා පාරිසරික විෂබීජහරණයට යොදා ගැනීම වඩා ඵලදායී බව පවසයි.

එසේම මෙම රසායනික ද්‍රව්‍ය මිනිසාට අනතුරුදායක විය හැකි බවද ඔවුහු පෙන්වා දෙති.

“ක්ලෝරීන් ඉසීම ඇස් සහ සමට හානිකර මෙන්ම, ආශ්වාසය ශ්වසනාබාධ හා ඕක්කාරය, වමනය වැනි ආමාශික සංකූලතා වලට හේතු විය හැකිය. ඕසෝන් ආශ්වාස කිරීම පෙනහලු වලට හානිකාරක විය හැකි අතර හතිය වැනි නිදන්ගත ශ්වසන රෝග උග්‍ර කර, ශ්වසන ආසාදන සමග සටන් කිරීමට ශරීරයට ඇති හැකියාව අනතුරේ හෙලනු ඇත. පාරජම්බූල කිරන වලට වැඩිපුර නිරාවරණය වීම ඇස් වලට හානි වීම, සම පිළිස්සීම පමණක් නොව සමේ පිළිකා ඇතිවීමේ අනතුරද වර්ධනය කරනු හැකිය. අද වනතුරු FDA සංවිධානය විසින් ඕසෝන් වායුව හෝ පාරිජම්බූල කිරණ යොදාගෙන අජීවී ද්‍රව්‍යයන් පිරිසිදු කිරීම සදහා හෝ නිෂ්පාදන නිකුත් කිරීමට අවසර දී නොමැත.”

මාර්ග හා ප්‍රසිද්ධ ස්ථාන වැනි විශාල එලිමහන් ස්ථාන වල විෂබීජනාශක ඉසීමේ ක්‍රියාමාර්ගය ගැන මෙම නිවේදනය දෙවනුව සිය අවධානය යොමු කරයි.

ශ්‍රී ලංකා ක්ෂුද්‍රජීව විද්‍යා විද්‍යාලයේ නිර්දේශය අනුව විෂබීජනාශක ඉසීම හෝ ගැල්වීම කළ යුත්තේ මහජනයා විසින් නිතර අල්ලනු ලබන අත්වැට වල්, දොර අගුලු, පොදු ප්‍රවාහනයේ ඇති ආධාරක, විදුලි සෝපාන බොත්තම්, උද්‍යාන බංකු ආදියෙහිය.

“මෙවැනි අපිරිසිදු මතුපිට මත වෛරසයට පැය ගණනක් හෝ දින ගණනක් ජීවත් විය හැකි බව ඔප්පු වී තිබේ. කෙසේ නමුත් විශාල වශයෙන් විෂබීජනාශක පරිසරයට මුදාහැරීම පරිසර දූෂණයට හා රසායනික ද්‍රව්‍ය නාස්තියට හේතු වනවා පමණක් නොව ඉහත පෙන්වා දුන් පරිදි මිනිසුන්ට මෙන්ම සතුන්ට හා මත්ස්‍යයන් හටද හානිකාරක වෙනවා. එසේම මෙම එලිමහන් පෘෂ්ඨ මත සිදු කරන විෂබීජහරණය කෙරතම් දුරට සාර්ථක දැයි තවමත් ගණනය කර නොමැති අතර හිරු එලිය වැනි විවිධ පාරිසරික තත්වයන් මත විෂබීජනාශක වල බලපෑම අඩු විය හැකිය.”

එම නිසා, මාර්ග වල හා ප්‍රසිද්ධ ස්ථාන වල විෂබීජ නාශක විශාල වශයෙන් ඉසීමට වඩා, නිතර ස්පර්ෂ වන පෘෂ්ඨයන් පිස දැමීමට මෙම විෂබීජ නාශක ද්‍රව්‍ය භාවිතා කරන ලෙස ශ්‍රී ලංකා ක්ෂුද්‍රජීව විද්‍යා විද්‍යාලය සිය නිවේදනයෙන් යෝජනා කර සිටී.

Facebook Comments

wedding people