මළවුන් සිහිකිරීමේ යෙදී සිටි දෙමළ ජනයා බිය ගන්වමින් ඔවුන්ගේ උපවාසයක් වාර්තාකරනයෙහි නියැලෙමින් සිටි උතුරේ මාධ්‍යවේදීන්ට පොලිස් ඔත්තුකරුවන් විසින් රාජකාරියට බාධා කර තිබේ.
දෙමළ නිජභූමියේ පාලනය පවරාගෙන සිටි ඉන්දීය හමුදාවට ඉවත් වන ලෙස බල කරමින් වසර 33 කට ඉහතදී මාරාන්තික උපවාසයක නියැලුණු තිලීපන් ලෙසින් ප්‍රචලිත, රාසයියා පාර්තීපන් අනුස්මරණය වෙනුවෙන්, දෙමළ ජනයා විසින් මුලතිව් දිස්ත්‍රික්කයේ ඔඩ්ඩුසුඩාන් ඊශ්වර කෝවිල් භූමියේ උපවාසයක් සංවිධානය කර තිබුණි.
උතුරු නැගෙනහිර පුරා සංවිධානය කර තිබු දීලීපන් සමරු නැවැත්වීම සඳහා අධිකරණ නියෝග ඇතුළු ක්‍රියාමාර්ග ගනිමින් ආණ්ඩුව විසින් වැරවෑයම් කර තිබියදී ම, ආගමික සිද්ධස්ථාන වල උපවාස සංවිධානය කර තිබුණි. දෙමළ ජනතාව හා ඔවුන්ගේ දේශපාලන නායකයන් එක්ව ඔඩ්ඩුසුඩාන් හි තන්තෝන්ඩ්‍රීස්වර කෝවිලේ සංවිධානය කරනු ලැබ තිබුණේද එවැනිම උපවාසයකි.
මෙම අවස්ථාව වාර්තා කිරීමේ නිරතව සිටි ජනමාධ්‍යවේදීන් හමුවේ උපවාසකරුවන් තම අදහස් බෙදා හදා ගැනීම වැලැක්වීමේ, නැතිනම් බාධාකිරීමේ පරමාර්ථයෙන් යුතුව, නිල ඇදුමින් මෙන්ම සිවිල් ඇදුමට මුවාවී සිටි පොලිස් සහ බුද්ධි අංශ නිලධාරීන් විශාල කණ්ඩායමක් තර්ජනාත්මක ලීලාවෙන් මෙම පූජාස්ථානය තුළ යොදවනු ලැබ තිබුණි. පුජාවට සහභාගීව සිටි ජනයා කියන්නේ මෙවැනි හැගීම්බර මොහොතකට පොලීසිය සහ බුද්ධි අංශ යෙදවීම හුදු බිය ගැන්වීමක් පමණක් නොව බරපතල තර්ජනාත්මක වාතාවරණයක් නිර්මාණය කිරීමක් ද වන බවයි.
ජනතාව තම හැඟීම් වාර්තාකරුවන්ට ප්‍රකාශ කරන අතරවාරයේ, රාජ්‍ය පොලිස් හා බුද්ධි අංශ විසින් ද ඒවා සිය කැමරා වලද පටිගත කිරීම සිදු කර තිබේ. මේ අවස්ථාවේදී ජනතාව හා ජනමාධ්‍ය අතර කෙරෙන මෙම විවෘත සාකච්ඡාව පටිගත නොකරන ලෙස ජනමාධ්‍ය වේදීන් සහ ජනතාව විසින් පොලිසියෙන් ඉල්ලා සිටීමත් සමඟ අර්බුදකාරී තත්වයක් උද්ගත වී තිබේ.
එහි දී මාධ්‍ය සමඟ සිය අදහස් හුවමාරු කරගන්නා අවස්ථාවේදී එය පොලිසිය මගින් පටිගත කරනු ලැබීමෙන් ජනතාව බිය ගැන්වෙනු ඇති බවත් මාධ්‍යවේදීන් විසින් පැහැදිළි කරදෙන ලදී.
“පිටි පස්සෙන් ඉඳගෙන මෙයාලා ගන්න කොට ඒ ගොල්ලෝ වොයිස් කට දෙන්න කැමති නෑ,” යැයි වාර්තාකරණයේ යෙදී සිටි හිරු මාධ්‍යවේදී ෂන්මුගම් තවසීලන් විසින් නිල ඇඳුමෙන් සැරසී සිටි ජ්‍යෙෂ්ඨ පොලිස් නිලධාරියෙකු හට ප්‍රකාශ කර සිටියේය.
පොලිස් ඔත්තු කරුවන් මාධ්‍යවේදීන්ගේ වාර්තාවට සමගාමීව කෙරෙන පටිගත කිරීම් බෙදා හදා ගැනීම ආයතනික මට්ටමින් තමන්ට රාජකාරි ගැටළු ඇති කරන බවත් ඔහු වැඩිදුරටත් පෙන්වා දුන්නේය.
“වීඩියෝ ඊට පස්සේ ගියොත් අපෙන් අහනවා ඔයාලා ගත්ත වීඩියෝ කොහොමද මෙහෙම ගියේ කියලා.”
සිවිල් ඇඳුමින් සිටි බුද්ධි අංශ නිලධාරියකු ප්‍රකාශ කර සිටියේ සිය ඉහල නිලධාරීන් හට මෙම අවස්ථාව සම්බන්ධයෙන් වාර්තාවක් ලබා දීම සඳහා මෙම පටිගත කිරීම් පොලිසියට අවශ්‍ය කර තිබෙන බවයි.
ඒ සඳහා එක් අයකුගේ සේවය ලබා නොගෙන නිලධාරීන් දහ පහළොස් දෙනකු යොදවන්නේ මන්දැයි හිටපු වන්නි දිස්ත්‍රික් පාර්ලිමේන්තු මන්ත්‍රී ශාන්ති ශ්‍රීස්කන්ධරාජා විසින් කළ ප්‍රශ්න කිරීමට පොලිස් නිලධාරීන්ගෙන් පිළිතුරක් ලැබුනේ නැත.
බාධා කිරීම් වලින් තොරව තම වාර්තාකරණය කිරීමට ඉඩ දෙන ලෙස මාධ්‍යවේදීන් විසින් සිදු කරන ලද ඉල්ලීම් පසක ලූ පොලිස් සහ ඔත්තු සේවා නිලධාරීන් මාධ්‍යවේදීන් හට පීඩාකාරී වූත් හා ජනතාවට තර්ජනාත්මක වූත් සිය පටිගත කිරීම් දිගටම කරගෙන යාමට මුරණ්ඩු ලෙස ක්‍රියා කළ බව හිටපු මන්ත්‍රීවරිය සදහන් කළාය.
බුද්ධි අංශ නිලධාරීන් විසින් දිගටම වීඩියෝ පටිගත කිරීම සිදු කිරීම තුළ සිය ආරක්ෂාව පිළිබඳ බියෙන්, රැස්ව සිටි ජනතාවට මාධ්‍ය වේදීන් හමුවේ අදහස් දැක්වීමට සිදුවුයේ එදින මධ්‍යාහනය වන විට සිය උපවාසය අත්හිටුවා කෝවිල් භූමියෙන් පිටතට ගොසිනි.
“වතුර උගුරක් නොබී දින 11ක් තිස්සේ උපවාසයේ යෙදී සිය ජීවිතය පූජා කළ තිලීපන්ගේ මරණය මහත් වූ හැගීමකින් යුතුව සිහිපත් කිරීමටයි අපි අද මේ ඔඩ්ඩුසුඩාන් ශිව දේවාලයට එකතු වුනේ” යි මෙම අවස්ථාවට සම්බන්ධ වූ අයෙක් පැවසීය.
“එතනදී පොලීසියයි, බුද්ධි අංශයි අපට බොහොම හිරිහැර කළා. නිදහසේ ඔහු වෙනුවෙන් අපගේ ප්‍රණාමය පුද කිරීමට අවස්ථාවක් ලැබුනේ නැහැ. එතන වාතාවරණය ඒ තරමට පීඩාකාරී වූ නිසා අපට මාධ්‍ය සමඟ අපගේ හැගීම් හරියාකාර බෙදාහදා ගැනීමට ඉඩ ලැබුනෙත් නෑ.”
පොලිස් බාධාවට මැදිවුණු සමරුවට සහභාගී වුවන් පවසන්නේ අලුත් ආණ්ඩුව යටතේ මාධ්‍ය නිදහස සහතික කර තිබියදී සිදුවූ මෙම තර්ජනය විසම්මුතීන් නොඉවසන බවට සමාජයට යැවෙන පණිවිඩයකට කදිම උදාහරණයක් බවයි.
ජනතාව විසිර යන අවස්ථාවේදී කිහිප දෙනෙකු ප්‍රාදේශීය මාධ්‍ය වෙත අදහස් දක්වමින් ප්‍රකාශ කර සිටියේ, මෙම අනුස්මරණය රජය විසින් තහනම් කිරීම දෙමළ සංස්කෘතියටම එල්ල කළ ප්‍රහාරයක් බවයි.
“අපගේ උතුරු සහ නැගෙනහිර දෙමළ නිජබිමේ නිදහස වෙනුවෙන් අවිහිංසාවාදීව විරෝධය පෑ තිලීපන් අනුස්මරණය කිරීමෙන් අද බලයේ සිටින මෙම නව රජය අපව වැළැක්වුවා. මළවුන් අනුස්මරණය කිරීම සහ අපගේ විමුක්තිය වෙනුවෙන් සටන් කළවුන් අභිනන්දනය කිරීම අපගේ දෙමළ සංස්කෘතියේම කොටසක්. නමුත් වර්තමාන රජය අගතිගාමී ආකාරයෙන් හැසිරෙමින් අපේ සිහිපත් කිරීමට අකුල් හෙලුවා.”
තම අයිතීන් වලට ගරු කරනු ලැබිය යුතු බවත්, කිසියම්ම වූ රාජ්‍ය ඇඟිලිගැසීමකින් සහ තර්ජනය කිරීමකින් තොරව සිය හැඟීම් ප්‍රකාශ කිරීමට ඉඩ ලැබිය යුතු බව ඔවුහු ඉල්ලා සිටිති. ඔවුන් ප්‍රකාශ කරනුයේ අදහස් ප්‍රකාශ කිරීමේ නිදහස තර්ජනයට ලක්ව ඇති හෙයින් අනාගතයේදී තම අයිතීන්ගේ සුරක්ෂිත බව හා තමන්ගේ මළවුන් සිහි කිරීමේ නිදහස සහතික විය යුතු බවයි.
Facebook Comments
