වසංගතයක් සම්බන්ධයෙන් පියවර ගැනීමේදී මහජන ආරක්ෂක ආඥා පනත යටතේ ඇදිරිනීතිය පැනවීමේ හැකියාවක් නොමැති බව අධිකරණය විසින් ප්‍රකාශයට පත් කළ තීන්දුවකින් අනාවරණය වී තිබේ.
ගම්පහ මහේස්ත්‍රාත් අධිකරණය විසින් එම තීන්දුව ලබා දී ඇත්තේ නිරෝධායන ඇදිරි නීතියේ නීත්‍යනුකූල භාවය අභියෝගයට ලක් කරමින් අධි කරණය හමුවේ මුලික විරෝධයක් එල්ල වු අවස්ථාවකදීය.
කොරෝනා වෛරස් ව්‍යාප්තිය අවම කිරීම සදහා රට පුරා පැනවු නිරෝධායන ඇදිරි නීතිය නීත්‍යනුකූල නොවන බවට ජනාධිපති නීතිඥයන් පවා තර්ක ඉදිරිපත් කර තිබු නමුත් පිටු 15කින් යුක්තව තීන්දුවක් ප්‍රකාශයට පත් කරමින් ගම්පහ මහේස්ත්‍රාත් අධිකරණය පෙන්වා දී ඇත්තේ දින 50 ට ආසන්න කාලයක් රට පුරා පනවා තිබු ඇදිරී නීතිය නීත්‍යනුකූල බවයි.
රටේ ඇදිරිනීතිය පැවති මොහොතක ගම්පහ නගරයේ ඖෂධ හලක් විවෘතව තබා ඇදිරිනීතිය කඩ කිරීමේ චෝදනාවට අත්අඩංගුවට ගත් පුද්ගලයෙකු ගම්පහ අධිකරණයට ඉදිරිපත් කිරීමේදී නිරෝධායන ඇදිරිනීතිය යටතේ අත්අඩංගුවට ගැනීම සම්බන්ධයෙන් මුලික විරෝධතාවයක් එල්ල වු බවයි පොලිස් අධිකාරී නීතිඥ රුවන් ගුණසේකර පවසන්නේ.
මැයි 12 අගහරුවාදා පැවැති මාධ්‍ය හමුවකදී පොලිස් අධිකාරී රුවන් ගුණසේකර සදහන් කළේ එම නඩුවේදී ගම්පහ ප්‍රධාන මහේස්ත්‍රාත් මංජුල කරුණාරත්න විසින් පිටු 15කින් යුක්තව “ඓතිහාසික නියෝගයක් ” ප්‍රකාශයට පත්කර ඇති බවයි.
එම නියෝගයේ අන්තර්ගත මුලික කාරනා දෙකක් මාධ්‍ය හමුවේ පැහැදිලි කර දෙමින් පොලිස් අධිකාරී රුවන් ගුණසේකර අවධාරණය කළේ මහජන ආරක්ෂක ආඥා පනත යොදා ගනිමින් ඇදිරිනීතිය ක්‍රියාත්මක කිරීම සම්බන්ධයෙන් එහිදී අධිකරණය සලකා බලා ඇති බවයි.
“ගරු අධිකරණය පැහැදිලිව සදහන් කර තිබෙනවා මේ මහජන ආරක්ෂක ආඥා පනත යටතේ ඇදිරිනීතිය පනවන්නේ යුධමය එහෙමත් නැත්නම් දේශපාලනමය, වාර්ගික, සමාජීය, හෝ ආගමික වශයෙන් මහජන තාව තුළ නොසන්සුන්තාවයක් සාමය කඩ වීමක් සිදු වෙලා තිබෙන අවස්ථාවක බව, මේ නියෝගයේ පැහැදිලිව සදහන් වෙලා තියනවා. ”
“දෙවැනි කාරණය තමයි ගරු අධිකරණය පෙන්වා දීලා තිබෙනවා වර්තමානයේ අප රට තුළ තිබෙන මේ කොවීඩ් 19 වසංගතයට අදාලව මේ කියපු ආකාරයේ කිසිදු මහජන සාමය උල්ලංඝණය වීමක් සිදුව නොමැති බව.”
ඒ අනුව මහජන ආරක්ෂක ආඥා පනත යටතේ ඇදිරිනීතිය පැනවීමට මේ අවස්ථාවේ හැකියාවක් නොමැති බව පෙන්වා දෙන පොලිස් අධිකාරීවරයා අවධාරණය කළේ 1897 අංක 3 දරන නිරෝධායන හා රෝග වැළැක්වීමේ ආඥා පනත, හා එම ආඥා පනත යටතේ නිර්මාණය කර ඇති රෙගුලාසි යටතේ වන ගැසට් පත්‍ර වලින් පනවා ඇති රෙගුලාසි යටතේත්, වසංගත සමයේ නිසි බලධාරියා ලෙස කටයුතු කරන සෞඛ්‍ය සේවා අධ්‍යක්ෂ ජනරාල්වරයා වරින් වර පොලිස්පතිවරයා වෙත බලය පැවරීම් හා එම ක්‍රියාවලිය යටතේත් පොලිස්පති විසින් පනවා ඇති නිරෝධායන ඇදිරිනීතිය සම්පුර්ණයෙන්ම නීත්‍යනුකුල බව අධිකරණය පෙන්වා දී ඇති බවයි.
එම මාධ්‍ය හමුවේදී පොලිස් අධිකාරී රුවන් ගුණසේකර වැඩි දුරටත් සදහන් කළ පරිදි කොරෝනා සමය තුළ ඇදිරි නීතිය කඩ කිරීමේ චෝදනාව යටතේ අත්අඩංගුවට ගත් පනස්දහසක් ඉක්මවු පිරිසෙන් අධිකරණයට ඉදිරිපත් කර ඇත්තේ පුද්ගලයන් 9783 ක් පමනි.
Facebook Comments
