ජනතාව නොමඟ යවන පුවත් පල කරමින් කියා සිටින්නේ “ජන වරම ක්‍රියාවට නංවන්න එපා” දැයි අගමැතිවරයා යෝජිත නව ව්‍යවස්ථාව සම්බන්ධව ජනතාව නොමඟ යවන පුවත් පළ කරන මාධ්‍යයන්ගේ ප්‍රශ්න කරයි.
සියම් නිකායේ මල්වතු සහ අස්ගිරි විහාර දෙකේ කාරක සංඝ සභා විසින් ව්‍යවස්ථා සම්පාදනයට එරෙහිව 18 බදාදා සම්මත කර ගත් යෝජනාව ජාතික පුවත්පත් කිහිපයක් මල්වතු අස්ගිරි මහා නායක හිමිවරුන්ගේ ඡායාරූප සහිතව පල කර ජනයා නොමඟ යැවීම සම්බන්ධව දොස් නඟමින් අගමැති රනිල් වික්‍රමසිංහ මේ බව කියා සිටියේය.
ලංකාදීප,ඩේලි මිරර් සහ දිවයින වැනි ජාතික පුවත්පත් කිහිපයක් මාධ්‍ය වෙත ප්‍රදර්ශනය කරමින් “මෙතන දාලා තියෙනවා මල්වත්තයි අස්ගිරියයි මහ නායක ස්වාමින් වහන්සේලා දෙනමම ගියෙ නැහැ මල්වත්තේ ස්වාමින් වහන්සේ ලංකාවෙත් නැහැ” යි අගමැතිවරයා කියා සිටියේ 19 බ්‍රහස්පතින්දා පාර්ලිමේන්තු සංකීර්ණයේ පැවැති යෝජිත ආණ්ඩුක්‍ර ව්‍යවස්ථාව පිළිබඳව ශ්‍රී ලංකා ජනමාධ්‍ය විද්‍යාලය ඇතුළු ආයතන තුනක් විසින් සිදුකළ සමීක්ෂණ වාර්තාව පිළිගැන්වීමේ අවස්ථාවට සහභාගීවෙමිනි.
“නමුත් මෙම ප්‍රවෘත්තිය දැකීමෙන් පසු මම මහ නාහිමියන් සම්බන්ධ කර ගැනීමට කල්පනා කළා. සත්‍ය තත්වය මට අවබෝධ වුණේ එවිටයි. එම ප්‍රවෘත්ති සාකච්ඡාව කැඳවූයේ මහනුවර දියවඩන නිලමේ නම්, එම ප්‍රවෘත්තිය සමග පළකළ යුත්තේ දියවඩන නිලමේගේ ඡායාරූපය මිස මල්වතු මහනාහිමියන්ගේ ඡායාරූපය නොවේ. ඉදිරියේ දී මේ සම්බන්ධයෙන් දියඩවන නිලමේ තුමාගෙන් විමසීමට මම බලාපොරොත්තු වෙනවා” යැයි හෙතෙම කියා සිටියේය.
මල්වතු මහා නාහිමියන් ව්‍යවස්ථාව සම්බන්ධයෙන් පක්ෂව හෝ විපක්ෂව අදහස් පළ කරනවා නම් එය නිවැරදිව වාර්තා කරන ලෙස ඉල්ලා සිටි අගමැතිවරයා අසත්‍ය ප්‍රවෘත්තියක් පළකරන්නේ ඇයි දැයි මාධ්‍ය ආයතනයන්ගෙන් ප්‍රශ්න කළේය.
Facebook Comments
