හිටපු මුදල් අමාත්‍ය රවී කරුණානායක සිදු කිරීමට නියමිතව සිටි විශේෂ ප්‍රකාශය කතානායකවරයා නැවැත්වීම සම්බන්ධයෙන් එක්සත් ජාතික පක්ෂය තුල දැඩි ආන්දෝලනයක් මතු වෙමින් ඇති බව වාර්තා වේ.
පෙර දැනුම් දීමකින් තොරව කතානායක කරූ ජයසුරිය හිටපු අමාත්‍යවරයාගේ ප්‍රකාශය වාරණයට ලක් කල බවට චෝදනා කරන එජාප පසුපෙල මන්ත්‍රීවරුන් කතානායකවරයාගේ මෙම හැසිරීම සැක සහිත බවට කියා සිටි.
එසේම 23 අඟහරුවාද පාර්ලිමේන්තුව හමුවේ ප්‍රකාශයක් සිදුකරමින් කතානායකවරයා පවසා සිටියේ බැඳුම්කර කොමිසමේ වාර්තා ජනාධිපති කාර්යාලයට, පාර්ලිමේන්තුවට, නීතිපති කාර්යාලයට සහ මහ බැංකුවට පමණක් ලබාදුන් බවට ජනාධිපති කාර්යාලය සහතික කර තිබෙනවා බවයි.
රවී කරුණානායක මන්ත්‍රීවරයාද බැඳුම්කර වාර්තාවේ පිටපතක් තොරතුරු දැන ගැනිමේ අයිතිය යටතේ ලබා ගත් බවට ප්‍රකාශ කර තිබු නමුත් ඒ පිළිබඳව නොවිමසීමට කතානායක කරූ ජයසුරිය වග බලා ගෙන තිබුණි.
පාර්ලිමේන්තු මන්ත්‍රී රවී කරුණානායක අත්අඩංගුවට ගැනීමේ සූදානමක් පවතින බවට මාධ්‍ය වාර්තා පළවෙමින් ඇති මොහොතක මන්ත්‍රීවරයාගේ වරප්‍රසාද කඩවීමේ ප්‍රකාශය සිදුකිරීමට වළක්වාලීමට කතානායකවරයා ගත් තීරණය හිටපු අමාත්‍යවරයා අවධානමේ හෙළිමක් බව නම සඳහන් නොකරන ලෙස ඉල්ලා සිටි එජාප මන්ත්‍රීවරයෙකු සිලෝන් ජර්නල්ස් වෙත කියා සිටියේය.
ප්‍රකාශය මාධ්‍ය වෙත
බැඳුම්කර වාර්තාවේ තමා ගැන සඳහන් තොරතුරු සම්බන්ධයෙන් ප්‍රකාශයක් කිරීමට හිටපු මුදල් ඇමැති රවී කරුණානායක 24 බදාදා පාර්ලිමේන්තුවේදී කරන ලද ඉල්ලීම කතානායකවරයා ප්‍රතික්ෂේප කළේය.
එය වරප්‍රසාද ප්‍රශ්නයක් නොවන බැවින් කතා කිරීමට ඉඩ දිය නොහැකි බව කී කරූ ජයසූරිය අවශ්‍ය නම් වෙනත් දිනයක් ලබාදිය හැකි බවට කියා තිබුණි.
කතානායකගේ ලද අවසරය මත හිටපු අමාත්‍ය රවී කරුණානායක සිදු කිරීමට නියමිතව තිබු විශේෂ ප්‍රකාශය මේ වන විට මාධ්‍යයට නිකුත් කර ඇත.
Facebook Comments
