සිව් වසරකට ඉහතදී පිරිසිදු පානීය ජලය ඉල්ලා උද්ඝෝෂණයේ යෙදුණු රතුපස්වල ජනතාවට වෙඩි තැබීමට අණ දුන් යුධ හමුදාවේ බ්‍රිගේඩියර් දේශප්‍රිය ගුණවර්ධන අත්අඩංගුවට ගෙන තිබේ.
උද්ඝෝෂණයේ නිරත ජනතවට යුද හමුදාව විසින් 2013 අගෝස්තු පළමු දා සිදු කල වෙඩි තැබීමෙන් රවිශාන් පෙරේරා, අකිල දිනේෂ් සහ නිලන්ත පුෂ්පකුමාර ඝාතනයට ලක් වු අතර තවත් 37කට තුවාල සිදු විය.
රතුපස්වල වෙඩි තැබීම සම්බන්ධව ප්‍රකාශයක් සටහන් කර ගැනීමට 25 බ්‍රහස්පතින්දා රහස් පොලිසියට කැඳවු අවස්ථාවේදී රහස් පොලිසියේ විශේෂ විමර්ශන ඒකකය විසින් බ්‍රිගේඩියර් දේශප්‍රිය ගුණවර්ධන අත්අඩංගුවට ගත් බව පොලිසිය පවසයි.
මීට පෙර මෙම සිද්ධිය සම්බන්ධයෙන් යුද හමුදාවේ මාණ්ඩලික සැරයන්වරයකු සහ කෝප්‍රල්වරුන් දෙදෙනකු වන ඩී.ඒ සිරිසේන, ජේ.එම් තිලකරත්න සහ ලලිත් ග්‍රේ රහස් පොලිසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කර ඇත.
අත්අඩංගුවට ගත් යුධ හමුදාවේ බ්‍රිගේඩියර් දේශප්‍රිය ගුණවර්ධන ගම්පහ මහේස්ත්‍රාත් අධිකරණයට ඉදිරිපත් කිරීමට නියමිත බවද පොලිසිය කියා සිටී.
වතුර ඉල්ලූ පිරිසට වෙඩි තැබීම සම්බන්ධයෙන් යුද හමුදාව වගකිව යුතු බවට සදහන් කරමින් මානව හිමිකම් කොමිසම විසින් වාර්තාවක් නිකුත් කර තිබේ.
ආණ්ඩුක්‍රම ව්‍යවස්ථාව උල්ලංඝණය කිරීම, යුධ හමුදා නීති උල්ලංඝණය කිරීම, මානව හිමිකම් කඩ කිරීම සහ රතුපස්වල වෙඩි තැබීමේ සිද්ධිය සම්බන්ධයෙන් ගම්පහ මහේස්ත්‍රාත් අධිකරණයේ නඩුවක් විභාග වෙමින් පවතින විට විදේශ ගත වීම යන චෝදනා පදනම් කරගනිමින් යුධ හමුදාවේ බ්‍රිගේඩියර් දේශප්‍රිය ගුණවර්ධන අත්අඩංගුවට ගෙන පරීක්ෂණයක් පවත්වන ලෙසට “සියනෑ ජලය සුරැකීමේ ජන නැගුම සංවිධානයේ කැදවුම්කරු” ප්‍රමිත හෙට්ට්ආරච්චි අපරාධ පරීක්ෂණ දෙපාර්තමේන්තුවට පැමිණිල්ලක් කර තිබුණි.
Facebook Comments
