පොරොන්දු ඉටු නොකිරීමට ජනපති ලෝක සහාය පතයි (VIDEO)

0
846
Ivory Agency Sri Lanka
HailHost
wedding people

මානව හිමිකම් මණ්ඩලයේදී හවුලේ ගිවිසගත් යෝජනාවෙන් ඉවත් වී රටටත්, පිටටත් පොරොන්දු වූ ප්‍රජාතන්ත්‍රවාදී ප්‍රතිසංස්කරණ වලින් ඉවත්වීමේ අවසරය දෙන ලෙස ජනාධිපතිවරයා ජාත්‍යන්තර බලවතුන්ගෙන් ඉල්ලා තිබේ.

රට තුල සාමය සංහිඳියා ස්ථාපිත වී ඇති බවත් නැවත යුද්ධයක් ඇති වීමට ඉඩ කඩ නොමැති බැවින් “අලුත් මානයකින් රට දෙස බලා” සහාය ලබා දෙන ලෙස ද ජනාධිපති මෛත්‍රීපාලන සිරිසේන 73 වැනි එක්සත් ජාතීන්ගේ මහා මණ්ඩල සැසිය අමතමින් ඉල්ලා සිටියේය.

ජාත්‍යන්තර මැදිහත් වීමක් හරහා යුක්තිය ඉටු කරන ලෙස යුද පීඩිතයන් විසින් දිගින් දිගටම ඉල්ලා සිටියදීත් “අපේ ප්‍රශ්න අපට විසඳා ගන්නට ඉඩ දෙන්නැ” යි ජනාධිපතිවරය ජාත්‍යන්තර ප්‍රජාවගෙන් ඉල්ලීමක් කළේය.

පොදුරාජ්‍ය මණ්ඩලය ප්‍රමුඛ විදේශීය විනිශ්චයකරුවන්ද සහිත විශේෂ අධිකරණයක් මගින් යුද හමුදාවට එල්ල වන චෝදනා විභාග කරන බවට ආණ්ඩුව පිහිටවූ අලුත 2015 සැප්තැම්බරයේ දී ශ්‍රී ලංකාව එක්සත් ජාතීන්ගේ මානව හිමිකම් මණ්ඩලයේ දී ගිවිස ගනු ලැබීය.

එසේ වෙතත්, විදේශීය සහභාගිත්වයකට විරුද්ධව ජනාධිපතිවරයා සහ හිටපු ජනාධිපති වරයා ඇතුළු සිංහල ජාතිකවාදී බලවේග විසින් දිගින් දිගටම යෝජනා කරන දේශීය ක්‍රියාදාමයකට සහාය වන ලෙස ශ්‍රී ලංකාවේ රාජ්‍ය නායකයා ජගත් බලවතුන්ගෙන් ඉල්ලා සිටියේ “කිසිදු විදේශ බලපෑමක්, විදේශ තර්ජන ස්වාධීන රටක් ලෙස අපට අවශ්‍ය වන්නේ නැහැ,” යි පවසමිනි.

යුද්ධයෙන් පීඩිත උතුරේ ජනතාව තමන්ට ඉටු නොවූ යුක්තිය ඉල්ලා අඛණ්ඩ අරගලයක යෙදී සිටින ශ්‍රී ලංකාව ජනාධිපතිවරයා විසින් ජගත් බලවතුන් හමුවේ හඳුන්වා දෙන ලද්දේ “ජාතික සංහිඳියාව ශක්තිමත් කරන, ජාතික සමගිය ශක්තිමත් වූ” රටක් ලෙසයි.

එක්සත් ජනපදය බලා පිටත්ව යාමට පළමු ජනාධිපතිවරයා මාධ්‍ය ප්‍රධානීන් හා කියා සිටියේ “ජාතික ආරක්ෂාවට සහ ති‍්‍රවිධ හමුදාවේ ගෞරවයට හානියක් නොවන අයුරින් කටයුතු කිරීම” අරමුණු කොටගත් යෝජනාවලියක් එක්සත් ජාතීන්ගේ මානව හිමිකම් මහ කොමසාරිස්වරිය වෙත මෙන්ම එක්සත් ජාතින්ගේ සංවිධානයේ මහලේකම්වරයා වෙත ද ලිඛිතව භාරදීමට අපේක්ෂා කරන බවයි.

කෙසේ වෙතත් ජනාධිපතිවරයා විසින් එවැනි සංශෝධන කිසිවක් එක්සත් ජාතීන්ගේ බලධාරීන්ට භාර දෙනු ලැබුයේ දැයි වාර්තා නොවේ.

Facebook Comments

HailHost