පෝරකයට නියම වූ සිරකරුවෝත් ජනාධිපතිට එරෙහිව උසාවි යති

0

ජනාධිපතිවරයා විසින් එල්ලුම් ගහ ක්‍රියාත්මක කිරීමට ගෙන ඇති තීරණය අත්හිටුවන ලෙස ඉල්ලා මරණීය දණ්ඩනය ලබා සිටින සිරකරුවන් කිහිප දෙනෙකු ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් ගොණු කර තිබේ.

එම රැඳවියන්ට අමතරව විකල්ප ප්‍රතිපත්ති කේන්ද්‍රය, ගල්කන්දේ ධම්මානන්ද හිමි, මහාචාර්ය සී. ගුණරත්න, ආචාර්ය තාර ද මැල් සහ ආචාර්ය කේ සේනාරත්න ඇතුළුව මරණ දණ්ඩනයට එරෙහිව ජුලි 01 වනදා වන විට පෙත්සම් 12 ක් ශ්‍රේෂ්ඨාධිකරණයට ඉදිරිපත් කර ඇත.

නීතිපතිවරයා, අධිකරණ අමාත්‍යවරිය, අධිකරණ අමාත්‍යාංශයේ ලේකම්, බන්ධනාගාර කොමසාරිස් ජනරාල්, වැලිකඩ බන්ධනාගාර අධිකාරි ඇතුළු පාර්ශව කීපයක් පෙත්සම් වල වග උත්තරකරුවන් ලෙස නම් කර තිබේ.

මරණීය දණ්ඩනය ලබා සිටින විත්තිකරුවන් අතුරින් මත්ද්‍රව්‍ය ජාවාරමට සම්බන්ධ පුද්ගලයන් පමණක් තෝරාගෙන එම දඬුවම ක්‍රියාත්මක කිරීමට ජනාධිපතිවරයා ගත් තීරණය තුළින් ආණ්ඩුක්‍රම ව්‍යවස්ථාව‍ තුළින් සහතික කර තිබෙන නීතිය ඉදිරියේ සමාන සැලකිලි ලැබීමේ මූලික අයිතිය උල්ලංඝනය වන බවයි පෙත්සම්කරුවන් පෙන්වා දෙන්නේ.

එබැවින් මරණ දණ්ඩනය ක්‍රියාත්මක කිරීම අත්හිටවන ලෙස නියෝග කරන ලෙසයි පෙත්සම්කරුවන් ශ්‍රේෂ්ඨාධිකරණයෙන් වැඩි දුරටත් ඉල්ලා සිටින්නේ.

Facebook Comments

wedding people