පාරම්පරික හේන් ගොවියකුට කැලෑ මහත්තුරුන්ගෙන් ගුටි බැට

නැගෙනහිර පළාතේ දුගී හේන් ගොවියකුට පහර දී පැල්පත් තුනක් ගිනි තැබු බවට රාජ්‍ය නිලධාරින් පිරිසකට චෝදනා එල්ල වී තිබේ.

පහර කෑමට ලක්වු මඩකලපුව, කෝරලේ පත්තුව උතුර ප්‍රාදේශීය ලේකම් කාර්යාලයට අයත් වාකරේ, කට්ටුමුරිවු ගම් වාසියකු පවසන්නේ වන සංරක්ෂණ දෙපාර්තම්න්තුවේ නිලධාරීන් තමන්ගේ ගෙල මිරිකා පහර දුන් බවයි.

“වාඩි තුනක් ගිනි තිබ්බා. මගේ බෙල්ල මිරිකාගෙන මට ගැහුවා. මේක පොරස්ට් ඒරියා. කාටවත් මෙතන ඉන්න බෑ. එම්.පී ආවත් ඩී.එස් ආවත් අපි වෙඩි තියනවා. නැත්තං අත්අඩංගුවට ගන්නවා. අපි කාටවත් බය නැහැ. වහාම මෙතනින් යන්න ඕන කියලා වාඩි වලට ගිනි තිබ්බා.”

ගම්වාසීන් පවසන්නේ නැගෙනහිර පළාතේ දරුණු යුද ගැටුම් ඇතිවු සමයේ තමන් පාරම්පරිකව හේන් ගොවිතැන් කටයුතු කරගෙන ජීවත් වු භුමියෙන් ඉවත් වී යළි 1999 සහ 2000 යන වසර වල යළි එම භුමිය වෙත පැමිණි බවයි.

පළාත් බද වාර්තාකරුවන් පවසන පරිදි එතැන් පටන් මේ දක්වා ගෙවි ගිය වසර 25 ක පමණ කාලයක් කිසිදු අයකුගේ බාධා කිරීමකින් තොරව ගම් වැසියන් හේන් ගොවිතැන් කළ භුමියට 2025 පෙබරවාරි 25 වැනිදා කඩා වැදුනු වන සංරක්ෂණ දෙපාර්තම්න්තු නිලධාරින් එම භුමිය තමන්ට අයත් බව පවසමින් හේන් ගොවියකුට පහර දී ඔවුන්ගේ පැල්පත් ගිනි බත් කර ඇත.

වන සංරක්ෂණ දෙපාර්තම්න්තුවේ නිලධාරින් සිදු කළ විනාශය පැහැදිලි කරන තවත් කට්ටුමුරිවු ගම් වාසියෙකු ඉල්ලා සිටින්නේ සිය පාරම්පරික වගා භුමිය වහාම නිදහස් කර දෙන ලෙසයි.

“මේ ඉඩම අපට නිදහස් කරලා දෙන්න ඕනේ. මෙහෙ ඉන්න අනුමැතිය නැහැ කියලා තහනම් කරනවා. වාඩිවලට ගිනි තිිබ්බා. අපේ ඇඳුම්, බඩු බාහිරාදිය ගිනි තිබ්බා. ඇයි අපිට මේ බිමේ ඉන්න දෙන්නේ නැත්තේ? අපේ සියා, සියගේ සීයා නිදහසේ ජීවත් උන ඉඩම තමයි මේක. ඇයි දැන් අනුමැතිය දෙන්නේ නැත්තේ? ”

වන සංරක්ෂණ දෙපාර්තම්න්තුවේ නිලධාරින් මඩකලපුව, කෝරලේ පත්තු, උතුර ප්‍රාදේශිය ලේකම් කාර්යාලයට අයත් වාකරේ, කට්ටුමුරිවු ගම්වාසීන්ට සිදු කර තිබෙන විනාශය සම්බන්ධයෙන් සොයා බැලීම සදහා ඉලංගෙයි තමිල් අරසු කච්චි (ITAK) මඩකලපුව දිස්ත්‍රික් පාර්ලිමේන්තු මන්ත්‍රී ඉලයතම්බි ශ්‍රීනාත් පෙබරවාරි 26 වැනිදා එම ප්‍රදේශයට ගොස් තිබුනි.

තමන්ට ජීවත් වීමට වෙනත් කිසිදු ජීවනෝපායක් නොමැති බව පෙන්වා දෙමින් කට්ටුමුරිවු ගම් වාසීන් දෙමළ ජනතා නියෝජිතයාගෙන් ඉල්ලා ඇත්තේ ඉදිරියටත් වගා කටයුතු කර සිය බඩ වියත රැක ගැනීම සදහා එම භුමිය තමන්ට ලබා දෙන ලෙසයි.

මේ සම්බන්ධයෙන් පාර්ලිමේන්තුවේද අවධානයට ලක් කොට අදාල නිලධාරීන් සමග සාකච්ඡා කර විසදුමක් ලබා දෙන බවට මඩකලපුව දිස්ත්‍රික් පාර්ලිමේන්තු මන්ත්‍රී ඉලයතම්බි ශ්‍රීනාත් එම ජනතාවට පොරොන්දු වු බව පළාත් බද වාර්තාකරුවෝ වැඩි දුරටත් පවසති.