එක්සත් ජාතීන්ගේ 71 වන මහා මණ්ඩල සැසිවාරය අද (13) ඇමෙරිකාවේ නිව්යෝක් නුවර එක්සත් ජාතීන්ගේ සංගමයේ ප්‍රධාන කාර්යාලයේදී ආරම්භ වේ.
සමාරම්භක සැසිවාරයෙන් අනතුරුව පැවැත්වෙන විශේෂ සාකච්ඡාවලදී සරණාගත සංක්‍රමිකයන් සහ සංක්‍රමණයන් පිළිබඳව විශේෂ අවධානයක් යොමු කිරීමට බලාපොරොත්තුවේ.
එක්සත් ජාතීන්ගේ මහා ලේකම් බෑන් කි මුන් , එක්සත් ජාතින්ගේ මානව හිමිකම් කොමසාරිස් සයිඩ් අල් හුසේන් කුමරු, එක්සත් ජාතීන්ගේ සංක්‍රමණික කොමසාරිස් ෆිලිපෝ ග්‍රන්දී , ජාත්‍යන්තර සංක්‍රමිකයන්ගේ සංවිධානයේ අධ්‍යක්ෂ ජෙනරාල් විලියම් ස්වින්ග් , ලෝක බැංකු සමුහයේ සභාපති කිම් යොන් කිම් ද මෙම සමුළුව ඇමතීමට නියමිතයි.
සැසිවාරයේ ප්‍රධාන විවාදය ලබන සඳුදා (20) ආරම්භ වීමට නියමිත අතර මෙවර සැසිවාරයේ තේමාව වී ඇත්තේ “තිරසාර සංවර්ධන අභිමතාර්ථ-ලෝකය පරිවර්තනය සඳහා සර්ව බලපෑමක්”( “The Sustainable Development Goals: a universal push to transform our world”) යන්නයි .
එහිදී ලෝක නායකයන් ලෝකයේ පවතින ගැටළු ඉදිරිපත්කිරිමටත් එම ගැටළු නිරාකරණයට අවශ්‍ය යෝජනාද ගෙන හැර දක්වමින් එක්සත් ජාතීන්ගේ සැසිවාරය ඇමතීමට නියමිතයි. මෙම විවාදය ලබන සැප්තැම්බර 26 දක්වා පැවැත්වේ.
ශ්‍රී ලංකා ජනාධිපති මෛත්‍රිපාල සිරිසේන මහා මණ්ඩල සැසිවාරයට සහභාගිවීම සඳහා ලබන 19 වෙනිදා ඇමෙරිකාවට පැමිණීමට නියමිත අතර මෙවරද ශ්‍රී ලංකා ජනාධිපතිවරයා ප්‍රධාන සැසිවාරය ඇමතීමට නියමිතයි.
විදේශ කටයුතු අමාත්‍යංශය කියා සිටියේ සැප්තැම්බර් මස 21 වන දින ජනාධිපතිවරයා එක්සත් ජාතීන්ගේ මහා මණ්ඩල සැසිවාරය ඇමතීමට නියමිත බවයි.
Facebook Comments
