ඉන්දීය ධීවරයන් මෙරට මුහුදේ අනවසරයෙන් සිදු කරන මසුන් මැරීම නතර කර සිය බඩ වියත රැක දෙන ලෙස ඉල්ලමින් වන්නියේදී විරෝධතාවයක් දියත් කර තිබේ.
නොවැම්බර් 24 වැනි සිකුරාදා මුලතිව් දිස්ත්‍රික් ලේකම් කාර්යාලය ඉදිරිපිටදී මුලතිව් දිස්ත්‍රික් ධීවර සම්මේලනය එම විරෝධතාවය දියත් කළ බවයි පළාත් බද වාර්තාකරුවන් පවසන්නේ.
මුලතිව් දිස්ත්‍රික් ධීවර සම්මේලනයේ සභාපති වී. අරුල්නාදන් එහිදි කියා සිටියේ ඉන්දීය ධිවරයන් මෙරට මුහුදු සම්පත කොල්ලකෑම හේතුවෙන් වන්නියේ ධිවරයන්ට කුස ගින්නේ මියදීමට සිදුවන තත්වයක් උද්ගත වී ඇති බවයි.
“ඉන්දියන් ටෝලර් යාත්‍රාවලින් අපේ ජීවනෝපාය බේරගත්තොත් අපිට සහනයක් ලැබෙනවා. අපි බඩගින්නේ මැරෙන තත්වයකට මුහුණ දීලා ඉන්නවා. අපේ බඩු, මාළු දැල් සම්පුර්ණයෙන්ම විනාශ කරනවා. ඒකට කිසි ගෙවීමක් තාම දීලා නෑ. ධීවරයන් ගොඩ දෙනෙක් මේක නිසා පීඩාවට පත් වෙලා ඉන්නවා. ඇත්තටම වසර පහකට පෙර රුපියල් ලක්ෂයකට මිලදී ගත්ත බඩු ටික ගන්න දැන් ලක්ෂ තුන හතරක් යනවා. සීමා පනින ඉන්දියන් ටෝලර් යාත්‍රා මුහුදට ඇවිල්ලා අපේ සියළුම සම්පත් අරගෙන යනවා. ධිවරයෝ අඩනවා, වස බොන්න යනවා. මේක ගැන හිතලා අපේ දිස්ත්‍රික් ලේකම් අදාල අයත් එක්ක කතා කරලා ප්‍රශ්නයට විසදුමක් ලබලා දෙන්න ඕන.“
පළාත් බද වාර්තාකරුවන් පවසන්නේ මෙම විරෝධය සදහා එක්වු වන්නි ධිවරයන්ට සහාය දැක්වීම සදහා යාපනයේ සිට ධිවරයන් පිරිසක්ද පැමිණ සිටි බවයි.
විරෝධතාවය අවසානයේදී ජනාධිපතිවරයා සහ ධිවර අමාත්‍යවරයා වෙත යොමු කිරීම සදහා සිය ඉල්ලීම් ඇතුලත් සන්ද‌ේශයක් දිස්ත්‍රික්ලේකම් වෙත භාර දීමට වන්නි ධිවරයන් කටයුතු කර තිබේ.
මුලතිව් ධිවරයන් මුහුණ දී සිටින ගැටළු සම්බන්ධයෙන් තමන් හොදාකාරවම දන්නා බව පැවසු දිස්ත්‍රික් ලේකම්වරයා ඒ සම්බන්ධයෙන් බලධාරීන් දැනුවත් කරන බවට ධිවරයන් හමුවේ පොරොන්දු වු බව පළාත් බද වාර්තාකරුවෝ වැඩි දුරටත් පවසති.
Facebook Comments
