පුරප්පාඩු වී ඇති පාර්ලිමේන්තු නියෝජ්‍ය කතානායක ධුරය මුජිබර් රහුමාන් මන්ත්‍රීවරයා හට ලබා දෙන ලෙස එක්සත් ජාතික පක්ෂ පසුපෙල මන්ත්‍රීවරුන් අගමැතිවරයාගෙන් ඉල්ලා තිබේ.
එම ඉල්ලීම සහිතව එක්සත් ජාතික පක්ෂ පසුපෙල මන්ත්‍රීවරුන් විසි දෙනෙකුට වැඩි පිරිසකගේ අත්සනින් යුත් ලිපිය 19 බ්‍රහස්පතින්දා අගමැති රනිල් වික්‍රසිංහ වෙත යොමු කර ඇත.
අගමැතිවරයාට එරෙහිව ඒකාබද්ධ විපක්ෂය විසින් ගෙන ආ විශ්වාස භංග යෝජනාවට පක්ෂ ජන්දය ලබා දීමෙන් පසු තිලංග සුමතිපාල මන්ත්‍රීවරයා නියෝජ්‍ය කතානායක ධුරයෙන් ඉල්ලා අස්විය.
පාර්ලිමේන්තු මන්ත්‍රී මුජිබුර් රහුමාන් එක්සත් ජාතික පක්ෂයේ මැද කොළඹ ප්‍රධාන සංවිධායකවරයා ද වන අතර දක්ෂ ක්‍රියාශීලි තරුණ නායකයෙකු නියෝජ්‍ය කතානායක ධුරයට පත්කරගත යුතු හෙයින් මෙම ඉල්ලීම කළ බවයි එක්සත් ජාතික පක්ෂ මන්ත්‍රීවරුන් පවසන්නේ.
ආණ්ඩුව නියෝජනය කරනු ලබන ශ්‍රී ලංකා නිදහස් පක්ෂය ද මෙම යෝජනාවට සහාය ලබා දෙනු ඇති බවටයි එක්සත් ජාතික පක්ෂය විශ්වාසය පල කරන්නේ.
Facebook Comments
