ජනතා ආශිර්වාදයෙන් බිහිවන සමගි ජන බලවේග රජය තුළ දේශීය හා විදේශීය විනිසුරුවන් හා විමර්ශකයන්ගෙන් සමන්විත
විශේෂ විමර්ශන කොමිෂන් සභාවක් පිහිටුවා කොන්දේසි විරහිතව විනිවිදභාවයෙන් යුත් පරීක්ෂණයක් පවත්වා පාස්කු ප්‍රහාර මාලාව පිළිබඳව විමර්ශණය කරන බව විපක්ෂ නායකවරයා පවසයි.
ඊට අමතර ව ඒ සඳහා වෙනම ම ස්වාධීන කාර්යාලයක් ස්ථාපිත කර එම කොමිෂන් සභාව ලබා දෙන නිර්දේශ ක්‍රියාත්මක කර නීතිපතිවරයා විසින් අපරාධ නඩුකටයුතු ආරම්භ කර ඒ සඳහා විශේෂ අධිකරණයක් ද පිහිටුවන බවයි විපක්ෂ නායක සජිත් ප්‍රේමදාස පෙන්වා දෙන්නේ.
ස්වාධින රජයේ අධිචෝදක කාර්යාලයක් ද ස්ථාපිත කරන බවත් මේ හරහා පාස්කු ප්‍රහාරයට සම්බන්ධ වූ මුල් වූ දායක වූ කණ්ඩායම්, මහමොළකරුවන්, ත්‍රස්තවාදීන් නීතිය හමුවට ගෙනවිත් ඉහළ ම දඩුවම් ලබා දීමට නොපැකිලෙන බව ද ඔහු සඳහන් කළේය.
පසුගිය විවාද අවස්ථාවල දී සමගි ජන බලවේගය පාස්කු ප්‍රහාරය සම්බන්ධයෙන් සිදු කරන ලද අනාවරණ සම්බන්ධයෙන් කිසිදු තැකීමක් නොකර පාස්කු ප්‍රහාරය නොවුණා සේ සලකා නින්දිත ආකාරයට මෙම විවාදයට වගකිවයුතු රජයේ පාර්ශ්ව සහභාගී නොවෙමින් පාස්කු ප්‍රහාරයෙන් අගතියට පත් පාර්ශ්වයන්ට නිග්‍රහ සිදු කළ බව ද පාර්ලිමේන්තුවේ පැවැති පාස්කු ප්‍රහාරය සම්බන්ධයෙන් වන විවාදයේ දී විපක්ෂ නායක අද (24) පැවසීය.
ගෝඨාභය රාජපක්ෂ පරීක්ෂණ යට ගැහුවා
ගෝඨාභය රාජපක්ෂ රජය පාස්කු ප්‍රහාරයේ මහමොළකරුවන් ලෙස හිජාස් හිස්බුල්ලා, රිෂාඩ් බදියුදීන්, රියාඩ් බදියුදීන් නම් කර සිටි බවත් ඔහු බලය ලබා ගත් පසුව පරීක්ෂණ යට ගැසීමට කටයුතු කළ බවට සජබ නායකයා චෝදනා කළේය.
ශානි අබේසේකර ප්‍රමුඛ 30 දෙනෙකු මාරු කිරීම, පරීක්ෂණ කටයුතු මෙහෙයවූ ශානි අබේසේකර නිලයෙන් පහළට දමා දකුණේ ඩී.අයි.ජී. කෙනෙකුගේ පෞද්ගලික සහකාරයකු ලෙස පත් කර විමර්ශන නතර කර සත්‍ය යටපත් කිරීම වැනි අකටයුතුකම් රැසක්ම සිදු කළ බව ද හෙතෙම පෙන්වා දුන්නේය.
පොලිස් ඇමැති කිව්වාට පරීක්ෂණ අවසන් නැහැ
එදා මෙන් ම අද දවසේත් මෙම නීච නින්දිත ත්‍රස්ත ප්‍රහාරය සැගවීමට වත්මන් රජයත් කටයුතු කරන බවත් පොලිසිය බාර ඇමතිවරයා 99%ක් විමර්ශන අවසන් බවට ප්‍රකාශ කළත් එවැනි දෙයක් සිදු නොවී ඇති බවයි විපක්ෂ නායකවරයා පවසන්නේ.
වත්මන් රජයට පවා මේ ගැන සත්‍ය සොයන්න උනන්දුවක් නොමැති නම් මේ වසර අවසානයේ ජනතා ආශිර්වාදයෙන් බලයට පත් වන සමගි ජන බලවේගය කිසිදු අයකුට, කිසිදු පුද්ගලයකුට යටත් නොවී මුදලට වරදාන වරප්‍රසාදවලට තර්ජන ගර්ජනවලට යට නොවී නිවැරැදි සත්‍ය හෙළිදරව් කරන බව අවධාරණය කරන ලදී.
වත්මන් රජය පාස්කු ප්‍රහාරයෙන් විපතට පත් පාර්ශ්වයන්ට හිමි නියමිත වන්දි පවා ලබා නොදුන්නත් අරගලය නිසා නිවාස හානි වූ මැතිඇමතිවරුන්ට නම් කලට වේලාවට වන්දි ලබා දීම සිදු කළ බව ද ඔහු සිහිපත් කළේය.
සජිත් ඩීල් දාන්නේ කාත් එක්කද?
තමා කිසිදු තර්ජනයකට ගර්ජනයකට බිය නොමැති පුද්ගලයකු ලෙස හිටපු ජනාධිපතිවරු සමඟ දැමූ ඩීල් තමා සමඟ දැමීමට නොඑන ලෙසත් තමාට මේ සම්බන්ධයෙන් ඩීල් එකක් ඇත්තේ පාස්කු ප්‍රහාරයෙන් විපතට පත් අහිංසක ජනතාව සමඟ පමණක් බවයි සජබ නායකයා සඳහන් කළේය.
සත්‍ය සොයන්න උත්සාහ කරන විට විවිධ කුමන්ත්‍රණ සිදු කළ හැකි නමුත් ඒ සියල්ලට මුහුණ දීමට තමා සූදානම් බවයි විපක්ෂ නායක සජිත් ප්‍රේමදාස අවධාරණය කරන්නේ.
කිසිදු බලවේගයකට කුමන හේතුවකටවත් සත්‍ය හෙළිදරව් වීම නතර කිරිමට ඉඩ නොදෙන බවත් සත්‍ය හෙළිදරව් කළ නොහැකි නම් තනතුරෙන් යන එක තමාට ගෞරවයක් බව ද විපක්ෂ නායකවරයා වැඩිදුරටත් පැවසීය.
Facebook Comments
