ස්වාභාවික පරිසරය හා ජන ජීවිතය විනාශ කරමින් සාගරයේත්, ගොඩබිමත් සම්පත් කොල්ලකමින් රාජපක්‍ෂ ආණ්ඩුවේ හවුල්කාර පාර්ශවයක් විසින් වත්මන් ආණ්ඩුව යටතේද ඇරඹීමට වෙර දරන ඉස්සන් වගා ව්‍යාපෘතියකට හා දැනටමත් ආරම්භ කර ඇති ඉල්මනයිට් කැනීමකට එරෙහිව නැගෙනහිර අරගලයක් දියත් කර තිබේ.
මඩකලපුව ගාන්ධි උද්‍යානය ඉදිරිපිටදී අප්‍රේල් 25 වැනි බ්‍රහස්පතින්දා උද්ඝෝෂණය දියත් කළ විරෝධතාකරුවන් අවධාරණය කළේ ජනතා විරෝධය නිසා 2019 වසරේ සිට අත හැර දැමීමට සිදුවු මෙම ව්‍යාපෘති යළි ආරම්භ කිරීමේ සුදානමක් පවතින බවයි.
උද්ඝෝෂණය හමාර කිරීමෙන් පසු දිස්ත්‍රික් ලේකම්වරයා මුණගැසී මෙම ව්‍යාපෘති සදහා සිය විරෝධය ඇතුලත් සන්දේශයක් බාර දීමට මඩකලපුව දිස්ත්‍රික් ලේකම් කාර්යාලයට ගිය උද්ඝෝෂකයන්ට ඉස්සන් වගා කිරීමේ ව්‍යාපෘතියට හා ඉල්මනයිට් කැනීමේ ව්‍යාපෘතියට සහාය දක්වන සුළු පිරිසක් විසින් බාධා පැමිණවු බව පළාත් බද වාර්තාකරුවෝ පවසති.
ගාන්ධි උද්‍යානය ඉදිරිපිටදී දියත් කළ උද්ඝෝෂණයට එක්ව සිටි එක් විරෝධතාකරුවකු චෝදනා කළේ ව්‍යාපෘතිකරුවන් පළාතේ ආණ්ඩුකාරවරයාගේ සහ දිස්ත්‍රික් සංවර්ධන කමිටු සභාපතිවරයාගේ සහාය ඇතිව මෙම ව්‍යාපෘති ආරම්භ කිරීමට යලිත් විශාල උත්සාහයක් දියත් කරන බවයි.
“ඉල්මනයිට් කැණීම සඳහා ඉඩම් පවරාගෙන ඇති අතර, කැණීම් කටයුතු සිදු කිරීමට බොහෝ මාර්ග වලින් උත්සාහ කරනවා. අපි පසුගිය අවුරුදු හය තුළ පා ගමන් සහ උද්ඝෝෂණ රාශියක් පවත්වා තිබෙනවා. නමුත් ඔවුන් ආණ්ඩුකාරවරයාගේ සහ දිස්ත්‍රික් සංවර්ධන කමිටු සභාපතිවරයාගේ සහාය ඇතිව සූක්ෂම ලෙස කටයුතු කරනවා. මෙවැනි සමාගම් අපේ ගමට එනවාට අපි සම්පූර්ණයෙන්ම විරුද්ධයි.”
නැගෙනහිර පළාත් ආණ්ඩුකාරවරයා සෙන්දිල් තොන්ඩමාන්ය. දිස්ත්‍රික් සංවර්ධන කමිටු සභාපති ලෙස කටයුතු කරන්නේ පිල්ලෙයාන් නමින් ප්‍රකට ග්‍රාමීය මාර්ග සංවර්ධන රාජ්‍ය අමාත්‍ය සිවනේසතුරෙයි චන්ද්‍රකාන්තන්ය.
වාකරේ ප්‍රාදේශීය ලේකම් බල ප්‍රදේශයට අයත් වෙරුගල් සිට කායන්කුඩා දක්වා ප්‍රදේශයට අයත් වන අදිරවේලි, පුතුර්, පුච්චාකේනි ඇතුළු ගම්මාන ඇතුලත් වන සේ කිලෝ මීටර් 15 ක මුහුදු තීරය සහ එයට යාබද ගොඩබිම සහිත භුමියේ ඇතැම් ස්ථාන වල ඉල්මනයිට් කැනීමේ කටයුතු ආරම්භ කර ඇති බවට උද්ඝෝෂකයා වැඩි දුරටත් සදහන් කළේය.
මඩකළපුව වාකරේ ප්‍රාදේශීය ලේකම් බල ප්‍රදේශයට අයත් තට්ටුමුනෛ, පුලියන්කඩල් අඩි, පාල්සේනෛ, කදිරවේලි, කට්ටුමුරිචි සහ අම්බන්දන්වේලි ගම් වැසියන් පෙන්වා දෙන්නේ පනිච්චංකේනි ගඟ ආසන්නයේ ඉස්සන් ගොවිපළ ආරම්භ කිරීමේ සැලසුමක් පවතින බවයි.
“මේ ඉස්සන් ගොවිපළ අක්කර 2000ක 2500ක පමණ භූමි ප්‍රමාණයකින් ආරම්භ කිරීමට නියමිත ව්‍යාපෘතියක්. ගඟ ආසන්නයේ තමයි මේ ව්‍යාපෘතිය ආරම්භ කරන්න යන්නේ. පසුගිය කාලයේ මිනින්දෝරු දෙපාර්තමේන්තුව හරහා තමයි මේකට ඉඩම් මැනලා තියෙන්නේ. අපි උද්ඝෝෂණ කරලා ඒක නතර කළා. ඒක නැවත ආරම්භ කිරීමට සියලු පියවර ගනිමින් සිටිනවා.”
පනිච්චංකේනි ගඟ ආසන්නයේ ඉස්සන් ගොවිපළ ආරම්භ කිරීම තුලින් ප්‍රදේශයේ සුළු පරිමාන ධීවරයන් හා ඒ අවට ගම්මානවල ධීවරයන් දහස් ගණනකට සිය ජීවිනෝපාය අහිමිව යන බව ඔවුහු වැඩි දුරටත් පෙන්වා දෙති.
“ධීවරයන් 15000ක් තම ජීවනෝපාය සඳහා යැපෙන්නේ මේ ගංගාවෙන්. මෙම ඉස්සන් ගොවිපළ ආවොත් එම පවුල්වල ජීවනෝපාය සම්පූර්ණයෙන්ම අඩාල වෙනවා. කිරි ගවයන් 45,000 කට වැඩි ප්‍රමාණයකට තණබිම් මෙතන තියනවා. මුහුදු ජලය ගඟට පොම්ප කරලා තමයි මේ ඉස්සන් වගාව සිදු කිරීමට ඔවුන් සැලසුම් කරලා තියෙන්නේ.”
කෝරලේපත්තු උතුර ප්‍රාදේශීය ලේකම් කාර්යාලය ඉදිරිපිට දී 2022 වසරේ පැවති විරෝධතාවකින් අනතුරුව ප්‍රදේශයේ එක්සත් ජාතික පක්‍ෂ සංවිධායක වී.කේ.ලිංගරාජා මගින් ජනාධිපති රනිල් වික්‍රමසිංහ වෙත සන්දේශයක් යොමු කරමින්, දෙමළ ජනතා නිදහස් කොටි පක්ෂයේ නායක, පිල්ලෙයාන් නමින් ප්‍රකට හිටපු ග්‍රාමීය මාර්ග සංවර්ධන රාජ්‍ය ඇමැති සිවනේසතුරෙයි චන්ද්‍රකාන්තන්ගේ මැදිහත්වීමෙන් ආරම්භ කෙරෙන මෙම ඉස්සන් වගා කිරීමේ ගොවිපල නිසා ඇතිවන හානිය ප්‍රදේශයේ ජනතාව විසින් පැහැදිලි කර තිබුනි.
විනාශයේ තරම
ප්‍රදේශයේ බහුජන සංවිධාන පෙන්වා දෙන ආකාරයට ඉස්සන් වගා කිරීමේ මුළු ව්‍යාපෘතිය යටතට ඉඩම් හෙක්ටයාර් 3000 ක පමණ ප්‍රමාණයක් යටත් කිරීමට නියමිතය.
ස්වභාව සෞන්දර්යෙන් අනුන පරිසරයකට හිමිකම් කියන වාකරේ කලපුව ආශ්‍රිත ප්‍රදේශය මෙම ඉස්සන් වගා බිම් හේතුවෙන් හානියට පත්වෙන අතර මුහුදු ශාක ඇතුළු සෙසු සම්පත් විනාශයට හේතුවන බව ප්‍රදේශවාසින් 2022 වසරේ ජනාධිපති රනිල් වික්‍රමසිංහ වෙත දැනුම් දී තිබුනි.
එමෙන්ම කිරි නිෂ්පාදනයට ඉවහල් වන ගවයන්ගේ හා එළුවන්ගේ ආහාර සැපයෙන තෘණ බිම් මෙම ව්‍යාපෘතිය හේතුවෙන් විනාශයට පත්වෙන බව වාකරේ ප්‍රදේශයේ 4000 ක් පමණ වන සත්ව පාලන ගොවීන්ගේ මැසිවිල්ල වී තිබේ.
පරම්පරා තුනක සිට සත්ව පාලනයට හා කිරි නිෂ්පාදනයට දායක වූ වාකරේ තෘණ බිම් කලාපය කිරි ගවයන් දහස් ගණනකට කට ආහාර සපයන බව ප්‍රාදේශීය ලේකම් කාර්යාල වාර්තා පසක් කරයි.
ඊට අමතරව දෛනිකව රුපියල් 2000 ක පමණ මුදලක් උපයා ගන්නා සුළු පන්න ධීවර කරමාන්තය ද මේ ඉස්සන් වගා ව්‍යාපෘතිය යටතේ අර්බුදයට ලක්වේ.
වන විනාශය, ගංගා ජලය අපවිත්‍ර වීම, වගා බිම් අහිමිවීමේ තර්ජනය, ගංවතුර අවදානම වැනි හේතුන් නිසා වාකරේ ප්‍රදේශයේ දුගී ජනයාගේ ජන දිවිය තවදුරටත් විනාශ මුඛයට ඇද නොදමා, දේශපාලන අවශ්‍යතා වෙනුවෙන් ඇරඹීමට අර අඳින ඉස්සන් වගා ගොවි බිම් අත්හැර දමන ලෙස විරෝධතාකරුවන් ඉල්ලා සිටී.
වාකරේ ඉස්සන් වගා වැඩසටහන 2022 වසරේ මාර්තු මාසයේදීත් දියත් කිරීමට වෑයම් කළ ද ප්‍රදේශයේ ධීවර, කාන්තා, ආගමික, ක්‍රීඩා හා ග්‍රාම සංවර්ධන සමිති සමාගම් විසින් දියත් කළ විරෝධය හමුවේ අදාළ ව්‍යාපෘතිය සඳහා ඉඩම් මැනීම නවතා දමන බවට ප්‍රාදේශීය ලේකම්වරයාට පොරොන්දු වීමට සිදුවිය.
යළිත් විරෝධතා ඇරඹි ඇත්තේ නවතා දමා තිබු ඉස්සන් වගා කිරීමේ ව්‍යාපෘතිය නැවත ආරම්භ කිරීමට ඇති සුදානම හා මේ වන විටත් ඉල්මනයිට් කැනීමේ කටයුතු ආරම්භ කර ඇති බවට ගම්වාසීන්ට තොරතුරු වාර්තාවීමත් සමගය.
Facebook Comments
