උතුරේ පළවන ප්‍රමුඛ පෙලේ දෙමළ පුවත්පතක මාධ්‍යවේදීන් තිදෙනකු, මාස එක හමාරකට වඩා අඩු කාලයක් තුලදී ත්‍රස්ත මර්දන හා විමර්ශන කොට්ඨාශයට කැදවා ප්‍රශ්න කර තිබේ.
මෑතදීම එසේ ප්‍රශ්න කොට ඇත්තේ උතුරේ දෛනිකව පළ කෙරෙන උදයන් පුවත්පතේ මාධ්‍යවේදී රාසරත්නම් දර්ශන්ගෙනි.
දෙසැම්බර් 11 වැනි සදුදා පෙරවරුවේ ත්‍රස්ත මර්දන හා විමර්ශන කොට්ඨාශයේ යාපනයේ ඒකකයට ඔහු කැඳවා පැය තුනක කාලයක් ප්‍රශ්න කර ඇති බවයි පළාත් බද වාර්තාකරුවන් පවසන්නේ.
යාපනය විශ්වවිද්‍යාලයේ කලා ශිෂ්‍ය සංගමයේ සභාපති ලෙස රාසරත්නම් දර්ශන් කටයුතු කළ 2022 වසරේ යාපනය විශ්වවිද්‍යාලයේ සිදු කළ 13 වැනි මුල්ලිවයික්කාල් අනුස්මරණයේදී, දෙමළ ඊලාම් විමුක්ති කොටි සංවිධානයේ ගීත වාදනය කළේ යයි නැගෙන චෝදනාවක් සම්බන්ධයෙන් එහිදී ත්‍රස්ත මර්දන හා විමර්ශන කොට්ඨාශයේ (CTID) නිලධාරීන් ඔහුගෙන් ප්‍රශ්න කර තිබේ.
දෙමළ වර්ග සංහාර අනුස්මරණ සතිය සෑම වසරකම උතුරු නැගෙනහිර පුරා මැයි 12 වැනිදායින් ආරම්භ කර මැයි 18 වැනිදා මුල්ලිවයික්කාලේ පවත්වනු ලබන රැලියකින් නිමාවට පත්වන්නේ යුද්ධයෙන් මරාදමා මේතාක් යුක්තිය නොලද ස්වකීය ආදරණීයයන් දෙමළ ජනයා විසින් සිහිපත් කරමිනි.
දෙසැම්බර් 11 වැනිදා උදෑසන 10.00 සිට පස්වරු 1300 දක්වා සිදු කළ ප්‍රශ්න කිරීම් වලදී උතුරු නැගෙනහිර දෙමළ ශිෂ්‍ය සංගමයේ ක්‍රියාකාරකම් සම්බන්ධයෙන් මෙන්ම උතුරේ දෙමළ ජනයා සිය අයිතීන් දිනා ගැනීම වෙනුවෙන් සිදු කරන අරගල සම්බන්ධයෙන් ශිෂ්‍ය සංගම් නායකයකු ලෙස රාසරත්නම් දර්ශන් ලබා දුන් ප්‍රකාශ සම්බන්ධයෙන්ද එහිදී ත්‍රස්ත මර්දන හා විමර්ශන කොට්ඨාශයේ නිලධාරීන් ප්‍රශ්න කර ඇති බවයි පළාත් බද වාර්තාකරුවන් පවසන්නේ.
එල්.ටී.ටී.ඊ සංවිධානයේ නායකයාගේ උපන් දිනය පිළිබඳ පුවතක් සහ ඔහුගේ ඡායාරූපයක් තුන් වසරකට ඉහත දී පළ කිරීම සම්බන්ධයෙන් උදයන් පුවත්පතේ ප්‍රධාන කර්තෘ තංගරාජා ප්‍රභාකරන් කොළඹ පිහිටි CTID ප්‍රධාන කාර්යාලයට නොවැම්බර් 27 වැනිදා කැදවා පුරා පැය හතරක කාලයක් ප්‍රශ්න කර තිබුනි.
උදයන් පුවත්පතේ ප්‍රවෘත්ති සංස්කාරක සම්මානලාභී මාධ්‍යවේදී කේ. ඩිලීප් අමුදන්ගෙන් ද කොළඹ පිහිටි CTID ප්‍රධාන කාර්යාලයට කැදවා නොවැම්බර් 1 වැනිදා පැය හතරකට අධික කාලයක් ප්‍රශ්න කර තිබුනේද එල්.ටී.ටී.ඊ සංවිධානයේ නායකයාගේ උපන් දිනය පිළිබඳ පුවතක් සහ ඔහුගේ ඡායාරූපයක් තුන් වසරකට ඉහත දී පළ කිරීම සම්බන්ධයෙනි.
Facebook Comments
